ބޭރުގެ ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނެގުމަށް ސަރުކާރުން ގާނޫނަށް ގެނައި ބަދަލަށް މީރާއިން އިއްޔެ އިން ފެށިގެން އަމަލުކުރަން ފެށުމާ ގުޅިގެން، އެކަމާ ދެކޮޅުހެދުމަށްޓަކައި އިޓަލީގެ މަގުބޫލު ޓުއާ އޮޕަރޭޓަރެއް ކަމަށްވާ "ކިއާ އޯރާ ވިއާޖީ" އިން ރާއްޖެއަށް އާ ބުކިންތައް ނެގުމާއި ދަތުރުތައް ވިއްކުން މެދުކަނޑާލައިފި އެވެ.
އެ ކުންފުނީގެ ވެބްސައިޓްގައި އާންމުކުރި ބަޔާނެއްގައި ބުނީ، އިއްޔެއިން ފެށިގެން ރާއްޖެއަށް ދަތުރުތައް ވިއްކުމާއި އާ ބުކިންތައް ނެގުން ވަނީ މެދުކަނޑާލާފައި ކަމަށެވެ.
ކިއާ އޯރާ ވިއާޖީ ކުންފުނިން ބުނި ގޮތުގައި މިއީ އިންސާފުވެރިކަމާއި ބައިނަލްއަގުވާމީ ގާނޫނުތަކަށް ދިވެހި ސަރުކާރުން އިހުތިރާމުކުރާ މާހައުލެއް އަލުން ގާއިމުވަންދެން ދެމިއޮންނާނެ ނިންމުމެކެވެ.
ރާއްޖޭގައި އޮފީހެއް ގާއިމްކުރުމެއް ނެތި، އިޓަލީގައި ހިންގާ ކޮންސަލްޓެންސީ އަދި އިންޓާމީޑިއަރީ މަސައްކަތްތަކުގެ މާޖިންއިން 17 ޕަސެންޓުގެ ޓީޖީއެސްޓީ ނެގުމަށާއި މީރާގައި ރަޖިސްޓްރީވާން އެންގުމަކީ ބައިނަލްއަގުވާމީ ގާނޫނީ ހަމަތަކާ ހިލާފު ކަމެއް ކަމަށް އެ ކުންފުނިން ދެކެ އެވެ. ރާއްޖޭގެ ރިސޯޓުތަކާއި ދަތުރުފަތުރާއި ސީދާ ރާއްޖެއިން ލިބިގަންނަ ހުރިހާ ހިދުމަތްތަކަކަށް މިހާރު ވެސް ގަވާއިދުން ޖީއެސްޓީ އާއި ގްރީން ޓެކްސް ދައްކަމުން އަންނަ ކަމަށް ވެސް ބުންޏެވެ.
މިހާރު ކޮންފާމް ކޮށްފައިވާ ބުކިންތައް ހުރި ޓޫރިސްޓުން ކަންބޮޑުވާން ނުޖެހޭނެ ކަމަށާއި އެއްބަސްވެފައިވާ އަގުގައި އެ ބުކިންތައް ކުރިއަށް ގެންދިއުމަށް މަސައްކަތް ކުރަމުން އަންނަ ކަމަށް އެ ކުންފުނިން ބުންޏެވެ.
ކިއާ އޯރާ ވިއާޖީން ބުނި ގޮތުގައި މި ނިންމުމަކީ ޔޫރަޕްގެ އިއްތިހާދުގެ ޓްރޭޑް ޔުނިއަންތަކުން މިކަމާ ގުޅިގެން ކުރިއަށް ގެންދާ ފުޅާ އިހުތިޖާޖެއްގެ ބައެކެވެ.
ޔޫރަޕްގެ ޓްރެވަލް އެޖެންޓުންގެ ފެޑެރޭޝަން (އީސީޓީއޭއޭ) އިން ވަނީ ބްރަސަލްސްގައި ހުންނަ ރާއްޖޭގެ އެމްބަސީއަށް ކަންބޮޑުވުމުގެ ސިޓީއެއް ފޮނުވާފައި ކަމަށާއި އިނގިރޭސި ވިލާތުގެ ޓްރެވަލް އެޖެންޓުންގެ ޖަިއިއްޔާ (އޭބީޓީއޭ) އިން ވެސް މި ބަދަލަށް އަމަލުކުރުން ފަސްކޮށްދިނުމަށް އެދި ރާއްޖޭގެ ޓޫރިޒަމް މިނިސްޓްރީއަށް ހުށަހަޅާފައިވާ ކަމަށް ބުނެފައިވެ އެވެ.
ދައުލަތުގެ ޓެކްސް ބަލައިގަންނަ އިދާރާ ކަމަށްވާ މީރާ އިން ވަނީ މި މަހުގެ އެކެއް ނުވަތަ އިއްޔެއިން ފެށިގެން ބޭރުގެ ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނެގުން ތަންފީޒުކުރަން ފަށައިފަ އެވެ.