ޔޫތު ސިޓީގެ ނަމުގައި ތަރައްގީކުރާ ހުޅުމާލޭގެ ދެ ވަނަ ފިޔަވަހީގެ މަގުތައް ދެ އަހަރުވީއިރު ވެސް ނުނިމި ދިގުލައިގެން ހިނގައްޖެ އެވެ.
ހިއްކައިގެން ތަރައްގީކުރާ ރަށުގެ މަގުތައް ހެދުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންޑިއާގެ މޯހަން މުތާ އެކްސްޕޯޓް އާއި އަޝޯކާ ބިލްޑްކޮން ލިމިޓެޑް ގުޅިގެން އުފައްދާފައިވާ ޖޮއިންޓްވެންޗާއާ ހަވާލުކުރީ 40.3 މިލިއަން ޑޮލަރު (621.4 މިލިއަން ރުފިޔާ) އަށް އޮކްޓޯބަރު 28، 2015ގަ އެވެ.
އެ އެއްބަސްވުމުގައި ސޮއި ކުރުމަށް ފަހު އެޗްޑީސީން ބުނީ ދެ ވަނަ ފިޔަވަހީގެ މަގުތައް ހެދުމުގެ މަސައްކަތް 18 މަސް ދުވަހުގެ ތެރޭގައި ނިމޭނެ ކަމަށެވެ. ނަމަވެސް އެ މަސައްކަތް އެ ކުންފުންޏާ ހަވާލުކުރިތާ ދެ އަހަރަށް ވުރެ ގިނަ ދުވަސްވީ އިރު އަދިވެސް އެ ރަށުގެ މަގުތަކުގައި ތާރުއަޅައި ނުނިމެ އެވެ.
އެޗްޑީސީގެ މެނޭޖިން ޑިރެކްޓަރު މުހައްމަދު ސައިމަން މިއަދު ވިދާޅުވީ އެ މަސައްކަތް ނުނިމި ލަސްވީ އެ ޕްރޮޖެކްޓަށް ބޭނުންވާ ލޯނު އިންޑިއަން އެގްޒިމް ބޭންކުން ހަމަޖައްސަން ވަގުތުތަކެއް ހޭދަވުމުން ކަމަށެވެ.
"އެގްރިމަންޓްގައި ސޮއިކުރި ނަމަވެސް އެކަމަށް ބޭނުންވާ ލޯނު އިންޑިއަން އެގްޒިމް ބޭންކުން ޕްރޮސެސްކުރަން ވަގުތުތަކެއް ނެގި. އެހެންވެ މަސައްކަތް ފެށުމަށް ވަގުތުތަކެއް ހޭދަވި،" އޭނާ ވިދާޅުވި އެވެ.
އޭނާ ވިދާޅުވީ ދެ ވަނަ ފިޔަވަހީގެ މަގުތަކުގައި މިދިޔަ މަހުގެ ފަހުކޮޅު ތާރު އަޅަން ފަށާފައިވާ ކަމަށެވެ. އަދި އެ މަސައްކަތް އަންނަ މަހުގެ ތެރޭގައި ނިންމާލެވޭނެ ކަމަށް ވެސް ސައިމަން ވިދާޅުވި އެވެ.
ދެވަނަ ފިޔަވަހީގެ ދަށުން ހިއްކާފައިވާ ސަރަހައްދުގެ މަގުތައް ހެދުމަށް، އެޗްޑީސީން އިންޑިއާގެ އެގްޒިމް ބޭންކުން ނެގި 34.3 މިލިއަން ޑޮލަރު (528 މިލިއަން ރުފިޔާ)ގެ ލޯނަށް ސަރުކާރުން ވަނީ ގެރެންޓީދީފަ އެވެ. އަދި އެ ލޯނު ނެގުމަށް މަޖިލީހުގެ މާލިއްޔަތު ކޮމިޓީން ރުހުން ދިނީ ނޮވެމްބަރު 23، 2016ގަ އެވެ. ނަމަވެސް އެ ލޯނު އެއްބަސްވުމުގައި ސޮއިކުރި ދުވަހެއް އެޗްޑީސީން ނުބުނެ އެވެ.
އެޗްޑީސީން ބުނީ އެ މަޝްރޫއުގެ ދަށުން ދެ ވަނަ ފިޔަވަހީގެ ހުރިހާ ބޮޑެތި މަގުތަކެއް ހަދައި ނިމޭ އިރު، ޕޭމަންޓާއި މަގުބައްތި އާއި މަގުމަތީގެ ނިޝާންތަކާއި މަގުމަތީގެ ފާހަގަތައް ކުރެހުން ވެސް ހިމެނޭ ކަމަށެވެ.
ހުޅުމާލޭ ދެ ވަނަ ފިޔަވަހީގެ ދަށުން 240 ހެކްޓަރުގެ ބިން ހިއްކައި އެ ރަށާ އިންވެގެން އޮންނަ ފަރުކޮޅާ ވަނީ ގުޅުވާލައިފަ އެވެ. އަލަށް ހިއްކި ސަރަހައްދު ތަރައްގީކުރުމުގެ މަސައްކަތް މިހާރު ވަނީ ފަށައިފަ އެވެ.
