ދަތުރުވެރިންގެ މާރުކޭޓުގެ ގޮޅިއަކަށް މީހަކު ތަކެތި ގެންގޮސް ބަހައްޓަނީ: ރޯދައާ ދިމާކޮށް ބާޒާރުގައި ގިނަ ބާވަތްތަކުގެ އަގު ވަނީ ވަރަށް ބޮޑަށް އުފުލިފައި.
17 މެއި 2018 - 12:41
25 comments
މި ރޯދަ މަސް ފެށުނުއިރު ދަތުރުވެރިންގެ މާރުކޭޓުގައި ގިނަ ބާވަތްތަކުގެ އަގު އުފުލިފައި ވަނީ ރަށްރަށުގައި ހައްދާ ތަކެތި މަދުވެގެން ނޫން ކަމަށާއި އެ ބާވަތްތައް މާލެއަށް ގެންނަ މިންވަރު ދަށްވެގެން ކަމަށް ގޮޅިތަކުގައި ވިޔަފާރިކުރާ މީހުން މިއަދު ބުނެފި އެވެ.
ރޯދަމަސް ފެށޭއިރު ބާޒާރުގައި ކަރަ އާއި ދޮންކެޔޮ އަދި މިރުސް ފަދަ ބާވަތްތައް ގިނަ އަދަދަކަށް ހުރެ އެވެ. ނަމަވެސް މިފަހަރު ފެންނަނީ އެއާ މުޅިން ހިލާފަށެވެ.
ދަތުރުވެރިންގެ މާރުކޭޓާއި ލޯކަލް މާރުކޭޓުން ވެސް ފެންނަނީ އެއް މަންޒަރެކެވެ. ރޯދަމަސް ފެށުއިރު އާއްމުކޮށް ވިއްކާ ގިނަ ބާވަތްތައް ވަރަށް ބޮޑަށް މަދުވެ، އަގުތައް ވެސް ވަރަށް ބޮޑަށް އުފުލިފައިވެ އެވެ.
ބާޒާރުގައި ކަރާ ކިލޯއެއްގެ އަގު 35ރ. އަށް އުފުލިފައިވާ މައިގަނޑު ސަބަބާ ބެހޭ ގޮތުން ވާހަކަދެއްކި މީހަކު ބުނީ، ކަރަލުގެ އަގު އުފުލިފައި ވަނީ ހަމައެކަނި ތޮއްޑު އާއި އެހެން ބައެއް ރަށްތަކުގެ ދަނޑުތަކަށް ގެއްލުން ލިބިގެން ކަމަށް ބުނާ ވާހަކަ ގަބޫލުކުރަން ދަތި ކަމަށެވެ.
ލޯކަލް މާރުކޭޓުގައި މިރުސް: ރޯދައާ ދިމާކޮށް މިރުހުގެ އަގު ވަނީ ވަރަށް ބޮޑަށް އުފުލިފައި.
"ކަރާ ހައްދާ ރަށްރަށުގެ މީހުންނާ ވާހަކަދެއްކުމުން އެނގޭ ބޭނުންވާ ވަރަށް އެ ރަށްރަށުގައި ކަރާ އެބަހުރިކަން. އެކަމަކު ގެނެވޭނެ ގޮތެއް ނެތް ކަމަށް ބުނަނީ،" ދަތުރުވެރިންގެ މާރުކޭޓުގެ ގޮނޑިއެއްގައި ހުރި މީހަކު ބުންޏެވެ.
"އެ މީހުން ބަލަނީ ކަރަލުގެ އަގު އުފުލޭ މިންވަރަށް. ދެން މިތަނަށް ގެންނަނީ ކިރިޔަކިރިޔާ ހިފަހައްޓާލެވޭ ވަރަށް. އެއީ ކޮންމެ އަހަރަކު ވެސް ކަރާ ގެންނަ ރަށްރަށުން ހަދާ ގޮތެއް."
އޭނާ ބުނީ ކަރަލުގެ އިތުރުން މިރުހާއި ދޮންކޭލުގެ އަގު ވެސް އުފުލިފައި ވަނީ މާލެއަށް ގެންނަ އަދަދު މަދުވުމުން ކަމަށެވެ.
ގޮޅިއެއްގައި އިން އެހެން މީހަކު ބުނި ގޮތުގައި ވިއްސާރަވުމުން ދަތުރުފަތުރަށް މިހާރު އައިސްފައިވާ އުނދަގޫތަކާ ހެދި ވެސް ބާޒާރަށް އެއްޗެހި ގެނައުން ލަހެވެ.
ދޮންކެޔޮ ވަކެއްގެ އަގު 10ރ. އުފުލިފައިވެ އެވެ. ހެޔޮވަރު ސައިޒުގެ ދޮންކެޔޮގަނޑެއް މިހާރު ލިބެނީ 400ރ. އާއި 700ރ. އާ ދެމެދުގެ އަގެއްގަ އެވެ.
ބާޒާރުގައި މިހާރު އެވްރެޖްކޮށް މިރުހުގެ އަގު އުޅެނީ ކިލޯއެއް 150 އާއި 450ރ. އަށެވެ.
"ކުރިޔަށް އޮތް ތަނުގައި މިރުހުގެ އަގުތައް ވެސް އުފުލޭނެ ކަމަށް ބެލެވެނީ. މިފަހަރު ރޯދަމަސް ފެށުނުއިރު ވެސް މިރުސް ލިބުނު މިންވަރު މަދު،" ގޮޅިއެއްގައި އިން މީހަކު ބުންޏެވެ.
ރޯދަމަހު އާއްމުކޮށް ފަނި ގިރަން ބޭނުންކުރާ ގިނަ ބާވަތްތަކުގެ އަގުތައް ވެސް ބޮޑެވެ. އެގޮތުން އަނބެއްގެ އެވްރެޖް އަގަކީ 20ރ. އެވެ.
މާރުކޭޓުގެ ގޮޅިއެއްގައި ވިއްކަން ބަހައްޓާފައި ހުރި އަނބުތަކެއް
"އަނބު މޫސުން ނިމި މިހާރު ފުވައްމުލަކުން އަނބު ލިބުން ވަރަށް މަދުވެއްޖެ. އެކަމަކު މި މަސް ނިމެންދެން އަނބު ލިބޭނެ ކަމަށް އެ ރަށުން އަނބު ގެންނަ ބައެއް މީހުން ބުނޭ،" ގޮޅިއަކުން ވާހަކަ ދެއްކި މީހަކު ބުންޏެވެ.
އޭނާ ވެސް ބުނީ ރަށްރަށުން ތަކެތި ގެންނަ މިންވަރު ވަރަށް ބޮޑަށް މަދުވެފައިވާ ކަމަށެވެ. އަދި ތަކެތީގެ އަގުތައް ކުރިޔަށް އޮތް ދިހަ ވަރަކަށް ދުވަހާ ހަމަޔަށް އުފުލޭނެ ކަމަށް ލަފާކުރެވޭ ކަމަށް ވެސް ބުންޏެވެ.
"އާއްމުކޮށް ރޯދަމަހުގެ ފުރަތަމަ ދިހަ ދުވަހު ތަކެތީގެ އަގުތައް ދާނީ މައްޗަށް. ނަމަވެސް ފަހު ދިހައިން ފެށިގެން އަގުތައް ތިރިވާން ފަށާނެ،" އޭނާ ބުންޏެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދޮޅުކާރު
15 July 2018
އަގު ދަށްވިޔަ ނުދީ ހިފެހެއްޓުމަށް ތަކެތި މާލެ އަރުވާވަރު ކޮންޓްރޯލުކޮށްގެން ގެންނަނީ. ސަރުކާރުން ދަނޑު ހައްދާ ކުންފުންޏެއް އުފައްދައި ދަނޑު ހައްދަންފަށަންވީ. އެހެންނޫނީ އެސް.ޓީ.އޯ ނޫން ކުންފުންޏެއް އުފައްދައި ހަމައެކަނި ރޯމޭވާ ތަރުކާރީ ވިއްކާނެ ކުންފުންޏެއް އުފައްދައި އިމްޕޯރޓް ކޮށް ތަރުކާރި އާއި މޭވާ ވިއްކަން ފަށަންވެއްޖެ. ސިއްޙީ ނިޒާމަަށް އިންޝުއަރެންސެއް ދިނުމަކުން ނުފުދޭ. ރައްޔިތުންނަށް ރަނގަޅު ކާނާ ލިބި ދުޅަހެޔޮ ސިއްހަތެއްގައި ތިބެވޭނެ ސަރުކާރުގެ ބަޖެޓަށާއި ޢާއިލާތަކަށް ލުއި ދިރިއުޅުމަކަށް މަގުކޮށަންޖެހޭ.
މުޙައްމަދު ވ
18 May 2018
މާރުކޭޓު ގޮޅި ތައްއަތުލުމަށް މިނިސްޓްރީއަށް ގޮވާލަން
މަޑުލު
18 May 2018
ނޯތު ކޮރެޔާއާއި ވެނެޒުއޭލާފަދަ ފެއިލް ސްޓޭޓްތަކުގައިވެސް ތަރުކާރި މޭވާއަކީ މުއްސަނދިން އެކަނި ކެވޭ އެއްޗެކެވެ. ޝަކުވާނުކުރާށެވެ. ވަށައިގެން ފެންނަން ހުރި ހެއްކަށްވުރެ ސިއްރު ހެކިން މުހިންމު ވީމާ ތަމެންޖެހޭނީ ތަބާވެ އަތްޖަހާށެވެ.
ޢާޒަރު
18 May 2018
މަވެސް ކުޑަ ދަނޑެއް ގެންގުޅުނިން ކަރާ ހައްދައިގެން. ޢޭގްރޭޑް ކަރާ... ތިރީހުން ދަށުގަ އަގު ބެހެއްޓީ.
އަދިނާނި
18 May 2018
ރާއްޖޭގަ ހައްދާ ތަކެތިވާހަކަ އެކަނި ދެއްކީމަ ވަރަށް އައިބު ބަލަ ތޮއްޑޫ އާ ކާށިދޫ މީހުން ވެސް ކަރަލާ ފަޅޮލާ ދޮންކެޔޮ ހައްދަނީ ހަރަދު ތަކެއް ކޮށްގެނޭ. ޜޯކަދުރު ކިލޯ އެއް 400 އަށް އޯކޭ ކަރާ ކިލޯ 35 ކަޑަ މިހެންވީމަ މިއީ ދެރަވަރި
ޓޯކިޔޯ ސިޓީ.
18 May 2018
ރަށްރަށުން ތަކެތި ނުގެނަޔަސް ކުރިން ވިއްކަން ހުރި އެއްޗެއްގެ އަގު ބޮޑު ވެގެން ނުވާނެއެއްނު . އެއްޗެހި ނުލިބުނީމަ ކުރިން އެއްޗެހީގެ ކޮލިޓީ ރަނގަޅު ވަނީތަ؟ ނޫނީ އެއްފަހަރާ ބޮޑު ފައިދާ ބޭނުންވަނީތަ.؟
ކިޓޯމީ
17 May 2018
އަގު ވަކިވަރެއްގައި ބަަަަހައްޓަންވެގެން ތަކެތި ގެންނަނީ ވަކި އަދަދަކަށް. އަނެއް ބަޔަކު ތަކެތި ބާޒާރަށް ނުނެރެނީ އަގު އުފުލުވަން ވެގެން. މާލޭގައި އުޅޭ ޖާހިލުންތައް ގަނެ ހުސް ކުރާނެވިއްޔާ ކޮންމެ އަގެއްގައި ވިއްކިޔަސް.
މާލެމީހެއް
17 May 2018
ބުނާނެ މާލެ މީހުން ބޮޑު އަގުގަ ކުއްޔަށް ދޭ ވާހަކަ ...ހިހިހި
މަނިކުބޭ
17 May 2018
އަޖައިބެއްނު ދެން އެއްޗެހި އަވަހަށް މާލެ ގެންނަންވީނު އަގު ތިރިވޭތޯ.
މުޙައްމަދު.ޙ
17 May 2018
މީ ވިޔަފާރި ކުރަން ތިބޭ މީހުން ޖައްސާ ގޭމެއް. ޝަޢުބާން މަހު ފަހުކޮޅުން ފަށައިގެން ރޯދަ މަހު އަގު ބޮޑުކޮށް ވިއްކަން މުދާތައް ފޮރުވާފަ ބަހައްޓައިގެން ތިބެނީ. ދެން އެތިއެތިކޮޅުން ނެރެގެން ހިތުހުރިހާ އަގެއްގައި ރޯދަމަހު ފުރަތަމަކޮޅު ވިއްކާނީ، ފޮރުވާފަ ހުރެ ފީވެ ދެންވާ ހަލާކުވެދާނެ ހެން ހީވީމާ ފަހު ދިހައިގައި ވިއްްކަން ފަށާނީ ނުއަގުގައި. މި މީހުންނަށް ނޭގޭބާ އަގުބޮޑު ކޮށް މުދާ ވިއްކަން ފޮރުވުމަކީ ކަނޑައެޅިގެން ޙަރާމް ކަމެއްކަން. މީ މާރކެޓް މެކޭނިޒަމް މަސައްކަތް ކުރާ ތަނެއްނޫން އަމިއްލަ އެދުން ހުރިހާ ކަމެއްގަ. ޑިމާންޑް އެންޑް ސަޕްލައި އޭ ގޮވާލާނެ ކަމެއްވާ އިރަށް.