ހުޅުމާލޭގައި އެޕާޓްމަންޓްތަކެއް ހަދަން އެންސިސްއާ ހަވާލުކޮށްފި

ހުޅުމާލޭ ވޯޓަ ފްރަންޓް އޭރިއާގައި 94 އެޕާޓްމަންޓް ހިމެނޭގޮތަށް މިކްސް ޔޫސް ރެސިޑެންޝަލް އެޕާޓްމަންޓް ކޮމްޕްލެކްސްއެއް ހަދަން އެންސިސް ފިޝަރީޒްއާ ހަވާލުކޮށްފި އެވެ.

މި އެއްބަސްވުމުގައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ސައިމަން އެވެ. އެންސިސް ފިޝަރީޒުން ސޮއިކުރެއްވީ މެނޭޖިން ޑިރެކްޓަރު މުހައްމަދު ވަސީމެވެ. އެންސިސް އިން ބުނިގޮތުގައި ހުޅުމާލޭގައި ހުންނަ އެސްޓީއޯގެ ސިޓީ ހޮޓާ ކައިރި، ފިތުރޯނުމަގުގައި އިމާރާތްކުރާ ސީވިއު އެޕާޓްމަންޓް ކޮޕްލެކްސްގައި ތިން ކޮޓަރީގެ 45 އެޕާޓްމަންޓާއި ދެ ކޮޓަރީގެ 26 އެޕާޓްމަންޓް، އެއް ކޮޓަރީ 13 އެޕާޓްމަންޓް އަދި 10 ޕެންޓް ހައުސް ހިމެނެ އެވެ. އޭގެ އިތުރުން ތިން ކޮޓަރީގެ އެޕާޓްމަންޓާއި ދެ ކޮޓަރީގެ އެޕާޓްމަންޓްތަކުގައި މެއިޑް ރޫމް ހިމަނާފައިވާނެ ކަމަށް ވެސް އެ ކުންފުނިން ބުންޏެވެ.

އެންސިސް އިން ހުޅުމާލޭގައި ހަދަން ފަށާ އެޕާޓްމަންޓް ކޮމްޕްލެކްސްގެ ކުރެހުމެއް.

އެންސިސް އިން ބުނީ އެޕާޓްމަންޓް ކޮމްޕްލެކްސްގައި ސްވިމިން ޕޫލަކާއި ކިޑްސް ސްވިމިން ޕޫލަކާއި ޖަކޫޒީ ޕޫލަކާއި ހެލްތް ކްލަބެއް އަދި ބޭސްމަންޓް ޕާކިން އޭރިއާއެއް ވެސް ހުންނާނެ ކަމަށެވެ. އަދި އެތަނުގައި ކޮމާޝަލް ފިހާރަތަކާއި، ފަންކްޝަން ހޯލާއި މީޓިން ރޫމް ފަދަ ހިދުމަތް ވެސް ލިބެން ހުންނާނެ ކަމުގައި އެ ކުންފުނިން ބުންޏެވެ. މި އެޕާޓްމަންޓް ކޮމްޕްލެކްސް އަކީ އެންސިސް އިން ހުޅުމާލޭގައި ތަރައްގީކުރާ ދެ ވަނަ އެޕާޓްމަންޓް ކޮމްޕްލެކްސް ޕްރޮޖެކްޓެވެ. މީގެ ކުރިން ހުޅުމާލޭގައި އެންސިސްއިން ވަނީ "ސައިމާ-ރެސިޑެންސް" ގެ ނަމުގައި 10 އެޕާޓްމަންޓް ހިމެނޭ އެޕާޓްމަންޓް ކޮމްޕްލެކްސްއެއް ހަދައިފަ އެވެ. އެންސިސް އިން ބުނީ އަލަށް ހަދާ އެޕާޓްމަންޓް ކޮމްޕްލެކްސްގެ އެޕާޓްމަންޓްތައް އޮންލައިންކޮށް ޕްރީ ބުކް ކުރެވޭނެ ކަމަށެވެ. އޮންލައިން ބުކިން، www.nirutha.comއިން ހެދޭނެ ކަމަށް ވެސް އެ ކުންފުނިން ބުންޏެވެ.