އައިލެންޑް އޭވިއޭޝަންގައި ހުރި މައްސަލަތަކާއި މުސާރައާ ގުޅޭ ގޮތުން، އެ ކުންފުނީގެ ޕައިލެޓުން ރައީސް އިބްރާހިމް މުހަންމަދު ސޯލިހާ މިއަދު ބައްދަލުކޮށް ޝަކުވާތައް ހުށަހަޅައިފި އެވެ.
މިއަދު މެންދުރު 12:00 ގައި މޯލްޑިވިއަންގެ ގިނަ އަދަދެއްގެ ޕައިލެޓުންނާއި ކެބިން ކްރޫންނާ ރައީސް ބައްދަލުކުރެއްވީ ރައީސް އޮފީހުގަ އެވެ.
މި ބައްދަލުވުމާ ބެހޭ ގޮތުން ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒް ވިދާޅުވީ، ޕައިލެޓުންގެ އެންމެ ބޮޑު ކަންބޮޑުވުމަކީ ކޮވިޑްގެ ކުރީގެ މުސާރަ އަލުން އިއާދަކޮށް ނުދީ ލަސްވުމެވެ.
އޭނާ ވިދާޅުވީ، ބައްދަލުވުމުގައި ޕައިލެޓުން މޯލްޑިވިއަން ހިންގުމުގައި ހުރި މައްސަލަތައް ވެސް ރައީސަށް ދެންނެވި ކަމަށެވެ. ކުންފުނި ހިންގުމުގައި ލޯންގް ޓާމް ޕްލޭނެއް ނެތި ކަންކަން ކުރަމުން ދާތީ ޕައިލެޓުން ކަންބޮޑުވުން ފާޅު ކުރި ކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ، ޕައިލެޓުން އިތުރަށް އިހްތިޖާޖު ކުރުމުގެ ވިސްނުމެއް ނެތް ކަމަށް ރައީސަށް ދެންނެވި ކަމަށެވެ. އަދި ކޮވިޑްގެ ދަތި އުނދަގޫ ހާލަތުގައި އެއްވެސް މުވައްޒަފަކު ވަޒީފާ އިން ވަކިކޮށްފައި ނުވާތީ އެކަމަށް ޕައިލެޓުން ޝުކުރު އަދާކުރި ކަމަށް ވެސް އޭނާ ވިދާޅުވި އެވެ.
މި ބައްދަލުވުމުގައި ރައީސް ވަނީ ކޮވިޑްގެ ދުވަސްވަރު ބަލި ޖެހިފައި ތިބި މީހުން އައިސޮލޭޝަން ސެންޓަރުތަކަށް ގެންދިއުމުގައި ޕައިލެޓުން އަދާކުރި މުހިއްމު ދައުރު ފާހަގަކުރައްވައި ޝުކުރު އަދާކުރައްވައިފަ އެވެ. އަދި މުސާރަ އާއި މެނޭޖްމެންޓާ މެދު ހުރި ހިތްހަމަނުޖެހުންތައް މަޝްވަރާއިން ހައްލުކޮށްދެއްވާނެ ކަމަށް ރައީސް ވިދާޅުވި ކަމަށް މަބްރޫކް ވިދާޅުވި އެވެ.
މި ބައްދަލުވުމުގައި ފިނޭންސް މިނިސްޓަރު އިބްރާހިމް އަމީރު ވެސް ބައިވެރިވެވަޑައިގަތެވެ. މިނިިސްޓަރު ވަނީ ކުންފުނި ހިންގުމުގައި ހުރި މައްސަލަތައް ހައްލުކުރުމުގައި ފިނޭންސް މިނިސްޓްރީން އިސް ނަގައިގެން މޯލްޑިވިއަންގެ މެނޭޖްމެންޓާ އެކު މަސައްކަތް ކުރައްވާނެ ކަމަށް ވިދާޅުވެފަ އެވެ.
ކޮވިޑާ ގުޅިގެން ޕައިލެޓުންގެ މުސާރައިގެ 40 ޕަސެންޓް ކަނޑާލި އެވެ. މުސާރަ ކުޑަ ކުރުމަށް ފަހު އަންނަ މަހު މުސާރައިގެ 80 ޕަސެންޓް ދޭން ސަރުކާރުން ނިންމާފައިވެ އެވެ. އަދި ޑިސެމްބަރު މަހަށް ފަހު ބާކީ ބައި ޕައިލެޓުންގެ މުސާރަ އަށް އިތުރުކުރާނެ ކަމަށް ބައްދަލުުވުމުގައި ފިނޭންސް މިނިސްޓަރު ވިދާޅުވި އެވެ.
އައިލެންޑް އޭވިއޭޝަންގެ ޕައިލެޓުންނާއި މެނޭޖްމެންޓާ ދެމެދު ޖެހުނު މައްސަލަތައް ބޮޑުވެ، ސީ ޕްލޭންގެ ގިނަ އަދަދެއްގެ ޕައިލެޓުން މިދިޔަ ހަފްތާގައި އިސްތިއުފާ ދީފައިވެ އެވެ. މި މައްސަލަތަކަށް ހައްލެއް ނުލިބިއްޖެ ނަމަ އިހްޖިޖާޖު ކުރާނެ ކަމަށް "މިހާރު" އާ ވާހަކަދެއްކި ޕައިލެޓުން އޭރު ބުންޏެވެ. މައްސަލަތައް ހައްލުކުރަން މިދިޔަ ހަފްތާ ބަންދުގައި ޕައިލެޓުން ވަނީ ކުންފުނީގެ އެމްޑީ މުހައްމަދު މިހާދާ ވެސް ބައްދަލުކުރެއްވި އެވެ.