ޝާހްރުކްގެ ފިލްމު ނަޔަންތަރާ ދޫކޮށެއްނުލާ

ޝޫޓިން ފަށާފައި އޮތް ޝާހްރުކް ޚާންގެ ފިލްމު "ލަޔަން" ލީޑް ބަތަލާގެ ރޯލަށް ސޮއިކުރި އިންޑިއާގެ ދެކުނު ފިލްމު އިންޑަސްޓްރީގެ މަޝްހޫރު ބަތަލާ ނަޔަތަންތަރާ އެ ފިލްމުން ވަކިނުވާ ކަމަށް ރިޕޯޓްތައް ބުނެފި އެވެ.

މިދިޔަ މަހު ބައެއް މީޑިއާތަކުން ބުނި ގޮތުގައި ތަމަޅަ ޑައިރެކްޓަރު އެޓްލީ ހަދާ ފިލްމުން ނަޔަންތަރާ ވަކިވީ ޝާހްރުކްގެ ދޮށީ ފިރިހެން ދަރިފުޅު އަރިއަން ޚާން މަސްތުވާތަކެތީގެ މައްސަލަގަނޑެއްގައި ބެދި ޝާހްރުކް ވަގުތީ ގޮތުން ފިލްމީ މަސައްކަތްތައް މެދުކަނޑާލުމުން، ކުރިން ރޭވި ގޮތަށް "ލަޔަން" ގެ ޝޫޓިން ކުރިއަށް ނުގެންދެވޭތީ ސޮއި ކޮށްފައި ހުރި އެހެން ޕްރޮޖެކްޓްތަކަށް ބުރޫ އަރާނެތީ އެވެ.

އަރިއަން މިހާރު ކަފާލާތުގެ ދަށުން ދޫކޮށްލާފައިވާތީ އަންނަ މަހުގެ ތެރޭގައި ޝާހްރުކް އަލުން ފިލްމީ މަސައްކަތްތައް ފަށާނެ އެވެ. ދަރިފުޅުގެ މައްސަލަގަނޑު ފެންމަތިވި އިރު "ލަޔަން" ގެ އިތުރުން އޭނާ އޮތީ ޑައިރެކްޓަރު ސިދާތު އާނަންދުގެ "ޕަތާން" ގެ މަސައްކަތް ވެސް ފަށައިފަ އެވެ.

އެޓްލީގެ ފިލްމާ ގުޅުން ހުރި މީހަކު ބޮލީވުޑް ހަންގާމާ އަށް ބުނެފައިވާ ގޮތުގައި "ލަޔަން" އިން ނަޔަންތަރާ ވައްކެއް ނުވެ އެވެ. އަދި ކުރިން ވެސް އޮތް ގޮތަށް އެ ފިލްމުގައި އޭނާ ކުޅެން އޮތް އިންވެސްޓިގޭޝަން އޮފިސަރުގެ ރޯލު ކުޅޭނެ އެވެ. ނަޔަންތަރާ އަކީ އެޓްލީ އެންމެ ފަހުން ގެނެސްދިން ފިލްމު ބިޖިލް (2019" ގެ ވެސް ބަތަލާ އެވެ. "ލަޔަން" އަކީ އޭނާ ކުޅޭނެ ފުރަތަމަ ހިންދީ ފިލްމެވެ.

ޝާހްރުކް ޑަބަލް ރޯލެއް ކުޅޭ ފިލްމު ނަޔަންތަރާ ދޫކޮށްލި ކަމަށް ބުނި ވާހަތަކާ އެކު އެރި އަޑަކީ އޭނާގެ ބަދަލުގައި ދެކުނުގެ މަޝްހޫރު އެހެން ބަތަލާއެއް ކަމަށްވާ ސަމަންތާ ރޫތު ޕްރަބޫ އަށް ދޭން ނިންމި ވާހަކަ އެވެ. އޭނާ އަކީ އާމިރު ޚާންގެ ކުރިއަށް އޮތް ފިލްމު "ލާލް ސިންގް ޗައްޑާ" ގެ ރޯލެއް ކުޅުނު ތެލެގޫ އެކްޓަރު ނާގަ ޗައިނަތިއާގެ ކުރީގެ އަންހެނުންނެވެ.

އޮގަސްޓް މަހުގެ ފަހުކޮޅު ޝޫޓިން ފެށި "ލަޔަން" ގެ ކާސްޓްގައި ސާނިއާ މަލްއުތުރާ އާއި ސުނިލް ގްރޯވާ އާއި ޕްރިޔަމަނީ އާއި ރާނާ ދަގޫބަތީ އަދި އާކަންކްޝާ ސިންގް ހިމެނޭ ކަމަށް މީޑިއާތަކުން ބުނެ އެވެ.