ކުރިން ބައެއް ކަހަލަ ރޯލުތަކަށް އެއްބަސްވާން ޖެހިލުންވި ކަމަށާއި އެކަމަކު މިހާރު އެ ބިރު ފިލާފައިވާތީ ދެން ކުޅެން ނުކެރޭނެ ކަހަލަ ރޯލެއް ނޯންނާނެ ކަމަށް ބޮލީވުޑްގެ އެކްޓަރު އަރުޖުން ކަޕޫރް ބުނެފި އެވެ.
ފިލްމު ކުޅެން ފެށުމުގެ ކުރިން ވަރަށް ފަލަކޮށް ހުރި އެކަމަކު ފިލްމީ ދާއިރާ އަށް ނުކުތް ފަހުން ފިޓްކޮށް ހުންނަން ވަރަށް މަސައްކަތްކޮށް މިހާރު ހަށިގަނޑަށް ބޮޑު ބަދަލެއް ވެސް ގެނެސްފައިވާ 36 އަހަރުގެ އެކްޓަރު ބުނީ މިހާރު ޝޫޓިން ފަށަން ތައްޔާރު ވަމުން އަންނަ "ކުއްތޭ" އަކީ ޖެހިލުންކުޑަވެގެން ނޫނީ ނުކުޅެވޭ ކަހަލަ ފިލްމެއް ކަމަށެވެ.
އެގޮތުން އޭނާގެ ލުކާއި އެ ފިލްމުން ފެންނާނެ ކެރެކްޓާ އަކީ ކުރިން ކުޅެފައިވާ ރޯލުތަކާ ވަރަށް ބޮޑަށް ތަފާތު ރޯލަކަށް ވާނެ ކަމަށް ބުންޏެވެ. "ކުއްތޭ" އަކީ މަޝްހޫރު ޑައިރެކްޓަރު ވިޝާލް ބަރަދްވާޖްގެ ދަރިފުޅު އާސްމާން ބަރަދުވާޖްގެ އަލަތު ފިލްމެވެ.
މި ޑާކް ކޮމެޑީގެ ކާސްޓްގައި ނަސީރުއްދީން ޝާހް، ތައްބޫ، ރާދިކާ މަދަން، ކޮންކޮނާ ސެން ޝަރުމާ، ކުމުދު މިޝްރާ އަދި ޝަރުދުލް ބަރަދްވާޖް ހިމެނެ އެވެ.
އަރުޖުން ބުނި ގޮތުގައި "ކުއްތޭ" އަކީ އަމިއްލަ ނަސުފަށް ވަރަށް ބޮޑަށް އިތުބާރެއް އޮވެގެން ކުޅޭ ފިލްމެކެވެ. އަދި އެންމެ ހިތްހަމަޖެހޭ ކަމަކީ އޭނާގެ ކެރެކްޓާ ފިލްމުގައި ދައްކުވައިދޭން ޑައިރެކްޓަރު ބޭނުންވާ ފެންވަރަށް ސިފައަށް ބަދަލުތަކެއް ގެނެވުމެވެ. އާންމުކޮށް ތަންކޮޅެއް ދިގުކޮށް އިސްތަށިގަނޑު ބަހައްޓާ އެކްޓަރު މި ފިލްމަށް ކުރުކޮށް ބޯކޮށާލައި، މަތިމަހެއްގައި ފެންނާނެ އެވެ.
"ދެން އޮންނާނީ ޑައިރެކްޓަރު ބުނާހާ ގޮތެއް ހެދުން. އެނގޭ ކަމަކީ މިހާރު އެއްވެސް ކަހަލަ ކެރެކްޓާއެއް ކުޅެން ދެން އަހަރެން ޖެހިލުން ނުވާނެކަން." ބަތަލާ ޖާންވީ ކަޕޫރްގެ ބޭބެ ބުންޏެވެ.
ދެހާސް ބާރައިގެ "އިޝަގްޒާދޭ" އިން ބޮލީވުޑަށް ނުކުތް އަރުޖުންގެ އެންމެ ފަހުގެ ފިލްމަކީ ސެޕްޓެމްބަރުގައި ގެނެސްދިން ހޮރޯ-ކޮމެޑީ "ބޫތު ޕޮލިސް" އެވެ. އޭނަގެ ކުރިއަށް ހުރި ފިލްމުތަކުގެ ތެރޭގައި "އޭކް ވިލަން ރިޓާންސް" އަދި "ލޭޑީކިލާ" ހިމެނެ އެވެ.
