ރަޖްނީކާތު އެނބުރި އަތުވެއްޖެ

އިންޑިއާގެ ސުޕަސްޓާރު ރަޖްނީކާންތުގެ ކާމިޔާބު ފިލްމު "ޖެއިލާ"ގެ ދެވަނަ ފިލްމުގެ ފުރަތަމަ ޓީޒާ އިއްޔެ އާންމުކޮށްފި އެވެ.

"ޖެއިލާ 2"ގެ ހަތަރު މިނެޓުގެ ޓީޒާއެއް ވަނީ ޔޫޓިއުބުގައި އާންމުކޮށްފަ އެވެ.

އާދައިގެ މަތިން، ރަޖްނީކާތުގެ އެހެން ފިލްމުތަކެކޭ ގޮތަށް މި ފިލްމުގައި ވަރަށް ވަރުގަދަ އެކްޝަން މަންޒަރުތަކެއް ފެންނާނެ ކަން މި ޓީޒާއިން އެނގެ އެވެ. މި ޓީޒާއަކީ ފިލްމު ރަސްމީކޮށް އިއުލާންކުރުމުގެ ވެސް ގޮތުން ގެނެސްދިން ޓީޒާއެކެވެ.

މި ޓީޒާގައި ރަޖްނީކާންތުއާ އެކު ފެންނަނީ މި ފިލްމުގެ ދެ ޑައިރެކްޓަރު ކަމަށްވާ ނެލްސަން ދިލިޕްކުމާރް އާއި އަނިރުދް ރަވިޗަންދުރަ އެވެ. ނެލްސަން އަކީ ފުރަތަމަ ފިލްމުގެ ވެސް ޑައިރެކްޓަރެވެ. އަދި އަނިރުދް އަކީ ފުރަތަމަ ފިލްމުގެ މިއުޒިކް ޑައިރެކްޓަރެވެ.

"ޖެއިލާ" އަކީ ރަޖްނީކާންތުގެ ސްޓައިލްގެ ވަރުގަދަ ތަޅާފޮޅާ މަންޒަރުތައް ހިމެނޭ ފިލްމެކެވެ. އެ ފިލްމުގައި އޭނާ ކުޅުނީ ފުލުހެއްގެ ރޯލެވެ.

މީގެ ދެ އަހަރު ކުރިން ނުކުތް "ޖެއިލާ"އަކީ ވަރަށް ކާމިޔާބު ފިލްމެކެވެ. އެ ފިލްމަށް ބޮކްސް އޮފީހުގައި ވަނީ 650 ކްރޯޑް ރުޕީސް ލިބިފަ އެވެ. އަދި އެއީ 2023 ވަނަ އަހަރު ނުކުތް ތަމަޅަ ފިލްމުތަކުގެ ތެރެއިން އެންމެ ބޮޑު އާމްދަނީއެއް ވެސް ހޯދި ފިލްމެވެ.