އެމެރިކާގެ އެކްޓްރެސް ޒެންޑަޔާ އާއި އިނގިރޭސި އެކްޓަރު ޓޮމް ހޮލެންޑް ކައިވެނިކޮށްފި ކަމަށް ބުނާ އަޑުތަކެއް ފެތުރިއްޖެ އެވެ.
ރިޕޯޓްތައް ބުނި ގޮތުގައި، ޒެންޑަޔާ އާއި ޓޮމް ވަރަށް ސިއްރުން ކައިވެނިކުރިން ހާމަކުރީ ޒެންޑައާގެ ގާތް އެކުވެރިޔާ އަދި ސްޓައިލިސްޓް ލޯ ރޯޗް އެވެ.
މިދިޔަ އާދީއްތަ ދުވަހު ބޭއްވި ސެގް އެވޯޑްސްގައި "އެކްސެސް ހޮލީވުޑް" އަށް ދިން އިންޓަވިއުއެއްގައި ރޯޗް ބުނީ "ކައިވެނި މިހާރު ވަނީ ނިމިފައި، އެކަން ތި މީހުންނަށް އޮތީ މިސްވެފައި،" ކަމަށެވެ.
މިކަމާ ގުޅޭ ގޮތުން އެ ދެ ތަރިން އަދި އެއްވެސް އެއްޗެއް ބުނެފައި ނުވި ނަމަވެސް، ރޯޗް ބުނި ގޮތުގައި އެއީ "ވަރަށް ބޮޑު ތެދެކެވެ".
މިދިޔަ އަހަރުގެ ގޯލްޑެން ގްލޯބްސް އެވޯޑުގެ ރެޑްކާޕެޓަށް ޒެންޑަޔާ ދިޔައިރު އޭނާގެ ވާތުގެ ކަށި އިނގިލީގައި ބޮޑު ޖަވާހިރު އަނގޮޓި އޮއްވާ ވަނީ ފެނިފައިވެ އެވެ. އެއީ އޭނާގެ އެންގޭޖުމަންޓް އަނގޮޓި ކަމަށް ޓީއެމްޒީން އޭރު ރިޕޯޓްކުރި އެވެ.
"ޕީޕަލް" މެގަޒިން އިން ރިޕޯޓްކޮށްފައިވާ ގޮތުގައި، މިދިޔަ އަހަރުގެ ސެޕްޓެމްބަރު މަހު ނޫސްވެރިންނާ ވާހަކަދައްކަމުން ޓޮމް ވަނީ ޒެންޑައާ އަށް ނިސްބަތްކޮށް "ފިއާންސޭ"، މި ލަފުޒު ބޭނުންކޮށްފަ އެވެ.
ޓޮމް އާއި ޒެންޑަޔާ ލޯބީގެ ގޮތުން ގުޅިގެން އުޅޭކަން ކަށަވަރުވީ ޖުލައި 2021 ގަ އެވެ. އެމީހުން ފުރަތަމަ ބައްދަލުވީ 2017 ވަނަ އަހަރު ނުކުތް "ސްޕައިޑާ މޭން: ހޯމްކަމިން"ގެ ސެޓުންނެވެ. އޭގެ ފަހުން، ދެމީހުން ވެސް ވަނީ އިންސްޓަގްރާމްގައި އެކަކު އަނެކެއްގެ ލޯބި ޕޯސްޓުތައް ކޮށްފަ އެވެ.
ޓޮމް މީގެ ކުރިން ބުނެފައިވާ ގޮތުގައި، އެމީހުންގެ އަމިއްލަ ދިރިއުޅުމުގެ ވާހަކަތައް އާންމުކުރުމަކީ އޭނާ ކުރަން ބޭނުންވާ ކަމެއް ނޫނެވެ. އެކަމުގެ ސަބަބުން އެމީހުންގެ ޒާތީ މިނިވަންކަން ގެއްލޭ ކަމަށް އޭނާ ގަބޫލުކުރެ އެވެ.
ޒެންޑަޔާ ވެސް ވަނީ މީގެ ކުރިން މި ކަހަލަ ކަންކަމާ ބެހޭ ގޮތުން މީހުން ސުވާލުކުރުމަކީ އޭނާއަށް ވަރަށް "އުނދަގޫ އަދި އާދަޔާ ހިލާފު" ކަމެއްގެ ގޮތުގައި ސިފަކޮށްފަ އެވެ.