އުމުރުން 50 އަހަރުގައި ދަރިއަކު ވެސް ލިބިފައި ވަނިކޮށް، މަޝްހޫރު ލަވަ ކިޔުންތެރިޔާ ޖެނެޓް ޖެކްސަންގެ ފަސް އަހަރުވީ ކައިވެނި ނިމުމަކަށް އަތުވެއްޖެ އެވެ.
ޖެނެޓަކީ ޕޮޕް ލަވައިގެ ރަސްގެފާނު މައިކަލް ޖެކްސަންގެ ކޮއްކޮ އެވެ.
މީޑިއާ ރިޕޯޓްތައް ބުނާ ގޮތުގައި ޖެނެޓާއި، ގަތަރަށް އުފަން ވިޔަފާވެރިޔާ ވިސާމް އަލް މަނާގެ ކައިވެނި ނިމުމަކަށް އައި ނަމަވެސް، ދަރިފުޅުގެ ކަންކަމުގައި އޮންނަން ޖެހޭ ގުޅުން ދެ މީހުންގެ މެދުގައި އަބަދުވެސް އޮންނާނެ އެވެ.
އެ މީހުންގެ ފުރަތަމަ ދަރިފުޅު އެއިސާ އަލް މަނާ އުފަންވީ މިދިޔަ ޖެނުއަރީ 3 ގަ އެވެ.
ރިޕޯޓްތައް ބުނާ ގޮތުން، ޖެނެޓާއި ވިސާމް ވަކިވީ، އެކަކު އަނެކަކަށް މިހާރު ވަގުތު ދެވޭލެއް މަދުވުމުން އެކަމާ އުފެދުނު ހުރި ނުތަވަސްކަމާ ހެދި އެވެ.
ހާއްސަކޮށް ވިސާމް ވިޔަފާރީގެ ކަންކަމުގައި މިހާރު ވަރަށް ބުރަކޮށް އުޅޭ ކަމަށާއި ޖެނެޓް ބޭނުންވާ ވަރަށް ވަގުތު ނުދެވޭ ކަމަށްވެ އެވެ.
ލަވަ ކިޔުމުގެ އިތުރަށް ބައެއް ފިލްމްތަކުން ވެސް ފެނިފައިވާ ޖެނެޓާއި ވިސާމް ވިސާމް އެންމެ ފުރަތަމަ ބައްދަލުވީ 2010 ގައި ޑުބާއީންނެވެ. އެ ދެ މީހުން އެންގޭޖްވެ، ކައިވެނި ކުރީ އޭގެ ދެ އަހަރު ފަހުންނެވެ.
ވިސާމާ ކައިވެނި ކުރުމަށް ފަހު، ޖެނެޓް ވަނީ އިސްލާމް ވެފައިވާ ކަމުގެ އަޑުތަކެއް ވެސް ފެތުރިފައިވެ އެވެ. ނަމަވެސް އެކަމުގެ ހަގީގަތް ޖެނެޓް ހާމަކޮށްފައެއް ނުވެ އެވެ.