ހަންގޭރީގެ ބުޑަޕެސްޓްގައި ކުރިޔަށް ދިޔަ "ރާބްތާ"ގެ ދިގު ޝެޑިއުލްގައި، ފިލްމުގެ ލީޑް ތަރިން ކަމަށްވާ ސުޝާންތު ސިންގް ރާޖްޕޫތާއި ކްރީތީ ސަނަންގެ ގުޅުން އެކުވެރިކަމަށް ވުރެ ގާތް ގުޅުމަކަށް ބަދަލުވެގެން ގޮސްފައިވާ ކަމަށް އިންޑިޔާގެ ފިލްމީ ނޫސްތަކުން ތަންކޮޅެއް ކުރިން ބުނެފައިވެ އެވެ.
މި ދެ ތަރިންގެ ގުޅުން ބަދަހިވި ވަރުން ކަނީ ވެސް އެއްތަށިން ކަމަށާއި ވެނިޓީ ވޭންގައި ގިނަ ވަގުތުތަކެއް ހޭދަކުރާ ކަމަށް ފިލްމު ޔުނިޓްގެ ބައެއް މީހުންނާ ހަވާލާދީ ނޫސްތަކުގައި ޖަހާފައިވެ އެވެ. އަދި ގާތް އެކުވެރިން ގާތުގައި ދެ މީހުން ރައްޓެހިވެގެން އުޅޭކަމަށް ޚުދް ސުޝާންތު އާއި ކްރީތީ ބުނެފައިވާ ކަމަށްވެ އެވެ.
ނަމަވެސް ކްރީތީ ޓުވީޓެއްގައި މި ވާހަކަތަކަކީ ކަނޑައެޅިގެން ދޮގެއް ކަމަށް ބުނެފައިވެ އެވެ.
ކްރީތީ ބުނެފައި ވަނީ ސުޝާންތު އާއި އޭނާ އަކީ އެކަކު އަނެކަކަށް ވަރަށް އިހްތިރާމްކުރާ ކޯ ސްޓާރުން ކަމަށާއި އެމީހުންނޭ ކިޔައިގެން ހަދަހަދައިގެން ދައްކާ ވާހަކަތަކުގައި އެއްވެސް ހަގީގަތެއް ނެތް ކަމަށެވެ.
ކްރީތީ މި ވާހަކަތައް ދޮގުކުރަނީ ސުޝާންތު އާއި އޭނާ މިހާރު ކުޅެމުންދާ "ރާބްތާ"އަށް އެކަމުން ނޭދެވޭ އަސަރުތަކެއް ކޮށްފާނެތީ ކަމަށް ވެސް އެމީހުންގެ ގާތް ބައެއް މީހުން ބުނެ އެވެ. އަދި ސުޝާންތުގެ ކުރީގެ ލޯބިވެރިޔާ އަންކިތާގެ ފަރާތުން އަތުވެދާނެ ހަމަލާއަކަށް ކްރީތީ ބިރުން އުޅެނީ ކަމަށް ވެސް ބައެއް މީހުން ލަފާ ކުރެ އެވެ.
ސުޝާންތު އާއި އަންކިތާ ދާދިފަހުން ރުޅިވެފައިވަނީ ހަތް އަހަރަށް ވުރެ ގިނަ ދުވަހު ރައްޓެހިވެގެން އަދި އެއް ގެއެއްގައި ގިނަ ދުވަހު އެކުގައި އުޅުމަށްފަހުގަ އެވެ.
ސުޝާންތު އަދިވެސް އޭނާގެ ހަޔާތަށް އެނބުރި އަންނާނެ ކަމުގެ އުންމީދުގައި އަންކިތާ އަދިވެސް ހުރި ކަމަށްވެ އެވެ.