ކުރީގެ ރައީސް މައުމޫން އަބްދުލްގައްޔޫމް ހައްދަވާފައިވާ މަދަހައެއް، ލަވަކިއުންތެރިޔާ ޝަލަބީ އިބްރާހީމްގެ ފުރަތަމަ މަދަހަ ސީޑީ "ހިދާއީ ނޫރު"ން އަޑު އިވިގެން ދާނެ އެވެ.
މައުމޫން ހައްދަވާފައިވާ މަދަހައެއް ކިޔާލުމުގެ ފުރުސަތު އަރަމުން އަންނަ ލަވަކިއުންތެރިޔާ އަށް ލިބުމަކީ އާދައިގެ ކަމެއް ނޫނެވެެ. އެހެންވެ ޝަލަބީ ހުރީ ވަރަށް އުފުލުންނެވެ.
މި އުފާވެރިކަން އިތުރުވެގެން ދިޔައީ ސީދާ މައުމޫނާ ބައްދަލުކޮށްލުމުގެ ފުރުސަތު މިއަދު ޝަލަބީ އަށް ލިބުމުންނެވެ. މައުމޫންގެ އޮފީހުގައި އޮތް ބައްދަވުމުގައި ޝަލަބީ ވަނީ އޭނާ ކިޔާފައިވާ މަދަހައެއް މައުމޫނަށް އަޑު ވެސް އިއްވާލާފަ އެވެ. އަދި މައުމޫނާ އެކު ފޮޓޯ ވެސް ނެގި އެވެ.
އެ ފޮޓޯތަކާއި ވީޑިއާ ޝަލަބީގެ ފޭސްބުކް ޕޭޖުގައި ހުރިއިރު މިހާރު ފޭނުން އަންނަނީ ހެޓަކަށް ލައިކްދެމުންނެވެ.
ޝަލަބީ ބުނީ މައުމޫނާ ބައްދަލުވުމަކީ ލިބުނު ވަަރަށް ބޮޑު ފަހުރެއް ކަމަށެވެ.
"މަދަހަ ސީޑީގެ ބައެއް މަދަހަތައް ވެސް ރައީސް މައުމާނާ ހިއްސާ ކުރިން،" މޯލްޑިވިއަން އައިޑްލްގެ ދެ ވަނަ ހޯދި ލަވަ ކިއުންތެރިޔާ ބުންޏެވެ.
"މައުމޫން ވަރަށް ހިތްވަރު ވެސް ދެއްވި. އެކަމަށްޓަކައި ވަރަށް ބޮޑަށް ޝުކުރު ވެސް އަދާ ކުރަން."
އީދު ހަދިޔާގެ ގޮތުގައި ޝަލަބީގެ މަދަހަ ސީޑީ "ހިދާއީ ނޫރު" އާންމުންނަށް ހިލޭ ލިބޭނެ އެވެ.
ސީޑީގައި ހިމެނެނީ ޝަލަބީގެ އަމިއްލަ ރާގުތަކަށް ހަދާފައިވާ މަދަހަތަކެވެ. ސީޑީގެ ކަވަރުގައިވާ މަދަހަ ލިސްޓަށް ބަލާލާއިރު، ލިސްޓްގެ އެންމެ ކުރީގައި ވަނީ ރައީސް މައުމޫން ހެއްދެވި މަދަހަ، "ހިދާޔަތުގެ ދަންމަރު" އެވެ.