ހުސްހަށިބަޔަކަށް ހުރުމަކީ ވޭން ހުރި ކަމެއް: އެންޖެލީނާ ޖޮލީ

ހުސްހަށިބަޔަށް ހުރުމަކީ ގަޔާވާ ކަމެއް ނޫން ކަމަށާއި އެކަމުން ވޭން ހުރި އިހުސާސްތަކެއް ކުރެވޭ ކަމަށް، ކުރި ތިން ކައިވެނި ވެސް ރޫޅިފައިވާ ހޮލީވުޑްގެ މަޝްހޫރު ބަތަލާ އެންޖެލީނާ ޖޮލީ ބުނެފި އެވެ.

އޭނާ އެންމެ ފަހުން ކައިވެނިކޮށްގެން އުޅުނު އެކްޓަރު ބްރެޑް ޕިޓް ކައިރިން ވަރިވާން މިދިޔަ އަހަރުގެ ސެޕްޓެމްބަރު މަހުގެ ތެރޭގައި ވަނީ ކޯޓަށް ހުށަހަޅައިފަ އެވެ. އެކަމަކު ވަރީގެ މައްސަލާގައި ގޮތެއް ނުނިމި އަދިވެސް އޮތީ އެ މައްސަލަ އޮތީ އެވެ.

އިނގިރޭސިވިލާތުގެ ނޫހަކަށް ދިން އިންޓަވިއުއެއްގައި 42 އަހަރުގެ ބަތަލާ ބުނީ ހުސްހަށިބަޔަށް ހުރުމަކީ އޭނާ އެއް އިރެއްގައި ވެސް ބޭނުންވި ކަމެއް ނޫން ކަމަށެވެ.

"މިއީ ވަރަށް އުނދަގޫ ކަމެއް. އަހަރެން އެއްގޮތަކަށް ވެސް ގަޔާވާ ކަމެއް ނޫން މިއީކީ. މިގޮތަށް ދިރިއުޅުމަކީ ވަރަށް ބޮޑު ބުރައެއް،" އެންޖެލީނާ ބުންޏެވެ.

އޭނާ ބުނީ މިހާރު ހުރިހާ ހިތްހަމަޖެހުމެއް ލިބެނީ ދަރިން ކައިރީގައި ތިބުމުން ކަމަށެވެ.

"އެކަމަކު އެއީ ހުރިހާ އުފަލެއް ހާސިލްވުން ކަމަކަށް ނުދެކެން. ރަނގަޅު ހަމަޖެހޭ ދިރިއުޅުމަކަށް އަޅާލާނެ ބައިވެރިއަކު ވެސް ބޭނުން ވާނެ،" ފަސްޓް ދޭ ކިލްޑް މައި ފާދާގެ ނަމުގައި ދާދި ފަހުން ފިލްމެއް ޑައިރެކްޓް ކުރި އެންޖެލީނާ ބުންޏެވެ.

އޭނާ ބުނީ ހަޔާތުގައި މިހާރު ކުރިމަތިވެފައިވާ އަޑިގަނޑުން އަރައިގަންނަން ބޭނުންވާ ކަމަށާއި ބޭނުން ވަނީ ހަމަޖެހޭ ދިރިއުޅުމެއް ހޯދުން ކަމަށެވެ.

"އަހަރެން ބޭނުން އަމިއްލަ ދިރިއުޅުމުގެ ކަންތައްތަކާ އެކު މިހާރު އިތުރަށް މަސައްކަތްކޮށް، ހަޔާތުގެ ކަންކަން ބެލެންސް ކުރަން. އެހެންވެ މަސައްކަތް ކުރުމުގެ ޝައުގުވެރިކަން ވެސް މިހާރު ބޮޑު،" ކާމިޔާބު ގިނަ ފިލްމްތަކެއް ކުޅެފައިވާ ހުނަރުވެރި ބަތަލާ ބުންޏެވެ. "އެކަމަކު އެނގޭ އެކަން ކުރަން މިހާރު އެހާ ފަސޭހައެއް ނުވާނެކަން ވެސް. އެއް ކަމަކީ އެކަނިމާއެކަނި އާއިލާ ބަލަހައްޓަން ޖެހުން."

ދާދި ފަހުން މީޑިއާތަކުން ރިޕޯޓްކޮށްފައިވާ ގޮތުގައި އެންޖެލީނާ އުޅެނީ އިނގިރޭސި ވިޔަފާރިވެރިއަކާ ރައްޓެހިވެގެންނެވެ. އަދި ފިލްމް ކުޅުން އެއް ފަރާތްކޮށްލުމަށް ފަހު، އޭނާ މިހާރު ބޭނުން ވަނީ ފިލްމް ޑައިރެކްޓް ކުރުމާއި ޕްރޮޑަކްޝަން ސައިޑްގައި މަސައްކަތް ކުރާށެވެ.