އެހެން ބައެއްގެ ޅެމެއް ކޮޕީކުރި ކަމަށް ތުހުމަތުކޮށް ޓޭލާ ސްވިފްޓަށް ދައުވާ ކުރަނީ

އެެހެން ބައެއްގެ ޅެމެއް ކޮޕީ ކުރި ކަމަށް ތުހުމަތުކޮށް، އެކަމުގެ ސަބަބުން ލިބުނު ގެއްލުމުގެ ބަދަލު ނަގައިދޭން އެދި، އެމެރިކާގެ މަޝްހޫރު އަންހެން ލަވަކިޔުންތެރިޔާ ޓޭލާ ސްވިފްޓާ ދެކޮޅަށް ދައުވާކޮށްފި އެވެ.

ޝޯން ހޯލް އާއި ނަތަން ބަޓްލާ، ސްވިފްޓަށް ކުރާ ދައުވާގައި ބުނަނީ އެމެރިކާގެ އަންހެން ބޭންޑެއް ކަމަށްވާ 3އެލްޑަބްލިއު އަށް އެ މީހުން 2001 ގައި ލިޔެ ދިން ލަވަ "ޕްލަޔަސް، ދޭ ގޮނަ ޕްލޭ އެންޑް ހޭޓާޒް، ދޭ ގޮނަ ހޭޓް" ލަވައިގެ ޅެން ސްވިފްޓް 2014 ގައި ނެރުނު ސިންގަލް "ޝޭކް އިޓް އޮފް" ގައި ކޮޕީކޮށްފައިވާ ކަމަށެވެ.

ސްވިފްޓްގެ އެ ލަވަ ލިޔެފައި ވަނީ އޭނާ އާއި މެކްސް މާޓިން އަދި ޝެލްބެކް އެވެ. އެ ލަވައިގެ ޅެމަށް ބަލާއިރު "ކޯޒް ދަ ޕްލެޔާޒް ގޮނަ ޕްލޭ، ޕްލޭ، ޕްލޭ، ޕްލޭ، އެންޑް ދަ ހޭޓާޒް ގޮނަ ހޭޓް ހޭޓް ހޭޓް" މި ކަނޑިތައް ހިމެނެ އެވެ.

މިކަމާ ބެހޭ ގޮތުން ސްވިފްޓްގެ ތަރުޖަމާން ޕީޕަލް އަށް ބުނީ ޅެން ކޮޕީ ކުރި ކަމަށް ބުނެ ކުރާ ދައުވާއަކީ އެއްވެސް ތާކުން ކުރެ ތާކު ޖެހޭ ދައުވާއެއް ނޫން ކަމަށާއި އެކަން ކުރާ މީހުންގެ މަގުސަދަކީ ފައިސާތަކެއް ހޯދައި ގަތުން ކަމަށެވެ.

"އެހެންވެ މިއީ އެ މީހުންނަށް ދައުވާ ވެސް ކުރެވޭނެ ކަމެއް ނޫން،" އޭނާ ބުންޏެވެ.

ޝޯން އާއި ނަތަން "ޝޭކް އިޓް އޮފް" ގެ ޅެމުގެ މައްސަލާގައި ދައުވާ ކުރާ އިރު، 2015 ވަނަ އަހަރު ލަވަ ކިޔުންތެރިޔާ ޖެސީ ގްރަހަމް ވެސް ވަނީ ހަމަ މި ލަވައިގެ ޅެމުގެ މައްސަލާގައި ދައުވާކޮށް، ސްވިފްޓްގެ އަތުން 42 މިލިއަން ޑޮލަރު ނަގައި ދޭން އެދި ކެލިފޯނިއާ ކޯޓަށް ހުށަހަޅައިފަ އެވެ.

ނަމަވެސް ކޯޓުން ވަނީ އެ މައްސަލަ ބޭރުކޮށްލައިފަ އެވެ.