"އެވެޓާ" ސީކްއެލްތަކުގެ ބޮޑު ބައި ކަނޑު އަޑީގައި

ދެހާސް ނުވަ ވަނަ އަހަރު ރިލީޒް ކުރި ޖޭމްސް ކެމެރެންގެ "އެވެޓާ" އަކީ ބެލުންތެރިން މުޅިން ތަފާތު ދުނިޔެއަކަށް ގެންގޮސް ދިން ފިލްމެކެވެ. އިންސާނުންނާ ވައްތަރުކޮށް ތިބޭ ތަފާތު މަހުލޫގުންތަކެއްގެ އާދަޔާލިފު ދުނިޔެ "ޕެންޑޯރާ" ގެ ހިތްގައިމުކަން ވެސް ބެލުންތެރިން އެ ފިލްމުން ތަޖުރިބާކޮށްލި އެވެ.

"އެވެޓާ" ގެ ހަތަރު ފިލްމެއް ކުރިއަށް އޮތް އިރު، "އެވެޓާ 2" އާއި "އެވެޓާ 3" ގެ މަސައްކަތް އެކު އެކީގައި މިހާރު އަންނަނީ ކުރަމުންނެވެ. ފިލްމްގެ ގެ މުހިއްމު ރޯލްތަކުން ގިނަ ކުޑަކުދިންތަކެއް ވެސް ފެނިގެން ދާނެ އެވެ. މިއީ "އެވެޓާ" އިން ފެނިގެން ދާނެ ތަފާތު ކަމެކެވެ.

ކެމެރެން ބުނީ ކުރި އޮތް ހަތަރު ފިލްމަކީ ކަނޑު އަޑި އަށް ވަރަށް ބޮޑަށް ބިނާކޮށްފައިވާ ފިލްމްތަކެއް ކަމަށެވެ. ހާއްސަކޮށް، ދެވަނަ ބަޔާއި ތިން ވަނަ ބައެވެ. ސީކްއެލްތަކުގެ ފުރަތަމަ ދެ ބައިގެ ޝޫޓިން މިހާރު ކުރިއަށްދާ އިރު، އޭނާ ވަނީ މުނިފޫހި ފިލުވުމުގެ ހަބަރުތައް ގެނެސްދޭ ކޮލައިޑާއާ އެ ތަޖުރިބާ ހިއްސާ ވެސް ކޮށްފަ އެވެ.

ކެމެރެން ބުނި ގޮތުގައި ކުޑަކުދިންތަކެއް ލައިގެން ކަނޑު އަޑީގައި ޝޫޓް ކުރަން ޖެހުމަކީ ބުރަ އަދި އުނދަގޫ މަސައްކަތެކެވެ. އެކަމަކު ޝޫޓިން ފެށީ ވަރަށް ގިނަ ދުވަހު ޓެސްޓިން މަރުހަލާތަކަށް ފަހު، ކާމިޔާބު މަސައްކަތްތަކެއް ކުރުމަށް ފަހު، ކާސްޓަށް ހަމަ ދުވަހުގެ ޓްރޭނިން ވެސް ދިނުމަށް ފަހު ކަމަށް ބުންޏެވެ.

"ފިލްމްގެ ވަރަށް މުހިއްމު ރޯލްތަކުން ހަތް ކުއްޖަކު ފެނިގެންދާ އިރު، އޭގެ ތެރޭގައި އެންމެ ހަތް އަހަރުގެ ކުއްޖަކު ވެސް ހިމެނޭ،" ކެމެރެން ބުންޏެވެ. "އެހެން ކުދިންނަކީ ޓީނޭޖް ކުދިން. ފެނު އަޑީގައި އެކްޓް ކުރުމަކީ ހީކުރާ ވަރަށް ވުރެ މާ ބޮޑަށް އުނދަގޫ ކަމެއް."

އޭނާ ބުނީ "އެވެޓާ" ފިލްމްތައް ވެގެން ދާނީ މީގެ ކުރިން ކަނޑު އަޑީގެ މަންޒަރުތަކެއް ސްކްރީނުން ނުފެންނަހާ ތަފާތުކޮށް، އަދި އެހާމެ ހިތްގައިމުކަމާއި ފުރިހަމަކާ އެކު ފެނިގެން ދާނެ ފިލްމްތަކެވެ.

"މިއީ ވަރަށް ތަފާތު ތަޖުރިބާއެއް. މިހާރު ވެސް ޔަގީންކަން ދެވިދާނެ ކަނޑު އަޑީގެ ހިތްގައިމުކަން އަހަރެމެން އެވެޓާގެ ޕެންޑޯރާ ޕްލެނެޓްގެ ފެނުގެ ތެރޭގައި ދައްކުވައި ދޭނެކަން މީގެ ކުރިން އެއްވެސް ފިލްމަކުން ނުފެންނަހާ ތަފާތުކޮށް، ފުރިހަމަކޮށް،" ޝޫޓް ކުރަން ވެސް އާ ޓެކްނޮލޮޖީއެއް ބޭނުން ކުރާކަން ފާހަގަކޮށް ކުޅަދާނަ ޑައިރެކްޓަރު ބުންޏެވެ.

ގިނަ ބަޔަކު މިހާރު ވެސް ކެތްތެރި ކަމެއް ނެތި "އެވެޓާ" ކުރިއަށް ހުރި ފިލްމްތަކަށް އިންތިޒާރު ކުރަމުން އަންނަ އިރު، "އެވެޓާ 2" ސިނަމާތަަކަށް އަންނާނީ ޑިސެމްބަރު 22، 2018 ގަ އެވެ.