ބްރެޑް ޕިޓްގެ ހަޔާތަށް މި ފަހަރު ޕްރޮފެސަރެއް؟

ބްރެޑް ޕިޓް މިހާތަނަށް ދެ ބަތަލާއަކާ ކައިވެނި ކޮށްފި އެވެ. އަދި އެހެން ބައެއް ބަތަލާއިންނާ އެކު ލޯބީގެ ސިއްރު ގުޅުންތަކެއް ވެސް ބޭއްވި އެވެ. އެކަމަކު ހަގީގަތަކީ މަޝްހޫރު ދެ ބަތަލާއަކާ ވެސް ކައިވެނިކޮށް ޕިޓް ތަޖުރިބާ ކުރީ ނާކާމިޔާބީ ކަމެވެ.

ބަތަލާ ޖެނިފާ އެނިސްޓަން އާއި އެންޖެލީނާ ޖޮލީއަކީ މިހާރު ޕިޓްގެ މާޒީ އެވެ. އެހެންވެ މިހާރު ބަތަލާއިންނާ ހިތާވުން އޭނާ ނިމުމަކަށް ގެނައީ ކަމަށް ވެސް ވެދާނެ އެވެ. އެހެން ބުނަން ޖެހޭ ސަބަބަކީ މިހާރު މާ ބޮޑަށް ވެސް ތަފާތު ދާއިރާއެއްގެ އަންހެނަކާ ޕިޓް ގުޅިގެން އުޅޭ ކަމަށް މީޑިއާތަކުން ރިޕޯޓް ކުރާތީ އެވެ.

ހޮލީވުޑްގެ ހަބަރުތައް ގެނެސްދޭ މަޝްހޫރު ނޫސްތަކުން މިހާރު ރިޕޯޓް ކުރަމުން އަންނަ ގޮތުގައި 54 އަހަރުގެ އެކްޓަރުގެ ހަޔާތަށް މިހާރު އައިސްފައި ވަނީ ފްރޮފެސަރެކެވެ. އާކިޓެކްޓެކެވެ. އެއީ މެސަޗޫޓެސް އިންސްޓިޓިއުޓް އޮފް ޓެކްނޮލޮޖީގެ ޕްރޮފެސަރެއް ކަމަށްވާ ނޭރީ އޮޒްމާން، 42، އެވެ.

ބައެއް ރިޕޯޓްތައް ބުނާ ގޮތުގައި ޕިޓާއި ނެރީ ބައްދަލުވީ އާކިޓެކްޗާ ޕްރޮޖެކްޓެއްގެ ތެރެއިންނެވެ. އީ ނިއުސް އިން ބުނާ ބުނާ ގޮތުގައި ދެ މީހުންގެ ދޭތެރޭގައި މިހާރު އޮތީ އެކުވެރި ކަމަކަށް ވުރެ "ގާތް" ގުޅުމެކެވެ.

ޕޭޖް ސިކްސްގެ ރިޕޯޓްތައް ބުނާ ގޮތުން ޕިޓާއި ނެރީ ރައްޓެހިވެގެން އުޅޭ ކަމަށް މީޑިއާތަކުގައި ވާހަކަ ދައްކަން ފެށުމާ އެކު، އެ ގުޅުން ވީހާ ވެސް ބޮޑަށް ސިއްރު ކުރެވޭތޯ މިހާރު އަންނަނީ މަސައްކަތްތަކެއް ވެސް ކުރަމުންނެވެ. އަދި ނޭރީގެ ގާތް ބައެއް މީހުންނާ ހަވާލާދީ ބައެއް ނޫސްތަކުން ބުނީ ހޮލީވުޑްގެ އެކްޓަރަކާ ލޯބީގެ ގޮތުން ގުޅުމުގެ އެއްވެސް ޝައުގުވެރި ކަމެއް ނެރީގެ ނެތް ކަމަށެވެ.

ޕިޓްއާ ގުޅުވައިގެން ނެރީގެ ވާހަކަ މީޑިއާތަކުގެ ފަލަ ސުރުހީތަކަށް އަރާފައިވާ އިރު، ގަބޫލު ކުރަން ޖެހޭ ހަގީގަތަކީ އަލިފާނާ ނުލައި ދުމެއް ނާރޭނޭ ކަމަށް ބުނާ ވާހަކަ މަތިން ހަނދާން އާކޮށްލުމެވެ.

ނެރީއަކީ އިޒްރޭލަށް އުފަން މީހެއްކެވެ. އޭނާގެ ބައްޕައަކީ އެމެރިކާ މީހެކެވެ. މަންމަ ނިސްބަތް ވަނީ އިޒްރޭލަށެވެ.

ނޭރީ ވެސް ވަނީ މީގެ ކުރިން ކައިވެންޏެއްކޮށްފަ އެވެ. އެއީ އާޖެންޓީނާގެ މިއުޒިކް ކޮމްޕޯޒަރު އޮޒްވަލްޑޯ ގޮލިޖޯވް، 57، އާ އެވެ. އެކަމަކު 2011 ގައި ކުރި އެ ކައިވެނި ވަނީ ފަހުން ވަނީ ރޫޅިފަ އެވެ. ނޭރީ އަށް ދަރިއަކު ލިބިފައެއް ނުވެ އެވެ.