"ކިލް ބިލް" ގެ ހިންދީ ރިމެކިންއެއް ހަދަނީ

ކަލްޓް ފިލްމެއްގެ ދަރަޖަ ހޯދާފައިވާ ހޮލީވުޑްގެ މަޝްހޫރު އެކްޝަން ފިލްމް "ކިލް ބިލް" ގެ ހިންދީ ރިމެކިންއެއް ގެނެސް ދޭން ނިންމައިފި އެވެ.

ކްއެންޓިން ޓެރެންޓީނޯގެ ކާމިޔާބު ފިލްމްތަކުގެ ތެރޭގައި ހިމެނޭ "ކިލް ބިލް" ގެ އިންޑިއާގެ ސިނަމާ އަށް ހެޔޮވަރުކޮށްގެން ގެނެސް ދެނީ "ތަމަންޗޭ" އާއި "ހޭޓް ސްޓޯރީ" ފަދަ ފިލްމްތައް ވެސް ކުޅެފައިވާ އަދި މިހާރު ޕްރޮޑިއުސަރެއްގެ ގޮތުގައި މަސައްކަތް ކުރާ ނިކިލް ދިވެދީ އެވެ.

އޭނާ އެންމެ ފަހުން ޕްރޮޑިއުސަރެއްގެ ގޮތުގައި ހިއްސާވި ފިލްމަކީ އެކްތާ ކަޕޫރާއި ރިއާ ކަޕޫރްގެ ކާމިޔާބު ޗިލް ފްލިކް އަދި ޖޫންގައި ރިލީޒް ކުރި "ވީރޭ ދީ ވެޑިން" އެވެ.

"ކިލް ބިލް" ގެ ހިންދީ ރިމެކިންއާ ބެހޭ މާ ބޮޑު ތަފުސީލެއް އަދި ހާމައެއް ނުކުރެ އެވެ. އެކަމަކު ނިކިލްގެ ތަރުޖަމާން ވަނީ "ކިލް ބިލް" ގެ ދެ ފިލްމްގެ ރައިޓްސް ނިކިލް ގަނެފައިވާކަން ކަށަވަރުކޮށް ދީފަ އެވެ. އަދި ހިންދީ ރިމެކިން ވަރަށް އަވަހަށް ރަސްމީކޮށް އިއުލާން ކުރާނެ ކަމަށް ބުންޏެވެ.

"ކިލް ބިލް" ވޮލިއުމް ވަން ގެނެސް ދެނީ 2003 ގަ އެވެ. އަދި ވޮލިއުމް ޓޫ ބެލުންތެރިންނަށް ގެނެސް ދިނީ 2004 ގަ އެވެ. އެ ދެ ފިލްމްގެ އެންމެ މުހިއްމު ތަރިއަކީ އުމާ ތާމަން އެވެ.

"ކިލް ބިލް" ގެ ދެ ފިލްމް ފާހަގަ ކުރެވިފައި ވަނީ ހޮލީވުޑްގައި ނެރުނު އެންމެ ކާމިޔާބު އަންހެން އެކްޝަން ފިލްމްތަކުގެ ގޮތުގަ އެވެ.

"ކިލް ބިލް: ވޮލިއުމް 1" 30 މިލިއަން ޑޮލަރުގެ ބަޖެޓަކުން ހެދި އިރު، ބޮކްސް އޮފީހުގައި ފިލްމަށް 180.9 މިލިއަން ޑޮލަރުގެ އާމްދަނީއެއް ލިބުނެވެ. ދެވަނަ ބަޔަށް 152.2 މިލިއަން ޑޮލަރު ލިބުނެވެ.