މޯލްޑިވްސް ފިލްމް އެސޯސިއޭޝަން (އެމްއެފްއޭ) ގެ ހަތަރު ވަނަ އެވޯޑް ހަފުލާ އަންނަ އޮކްޓޯބަރު މަހު ބާއްވަން ނިންމައިފި އެވެ.
މިދިޔަ އެޕްރީލް މަހު ކުރިން ބާއްވަން ނިންމި އެވޯޑް ހަފުލާ އެކި ސަބަބުތަކާ ހެދި ލަސްވި ނަމަވެސް، އޮކްޓޯބަރު އެވޯޑް ހަފުލާ ބާއްވަން ނިންމިކަން ރޭ ވަނީ ރަސްމީކޮށް އިއުލާންކޮށް، އެވޯޑް ހަފުލާ ލޯންޗްކޮށްފަ އެވެ.
ނަމަވެސް ހަފުލާ އޮންނާނެ ސީދާ ތާރީހެއް އަދިވެސް އިއުލާނެއް ނުކުރެ އެވެ.
މި ފަހަރު އެވޯޑް ހަފުލާ ބާއްވަނީ ޕަބްލިކް ސާވިސް މީޑިއާ (ޕީއެސްއެމް)އާ ގުޅިގެންނެވެ.
އެވޯޑް ހަފުލާ ލޯންޗް ކުރަން ބޭއްވި ރަސްމިއްޔާތުގައި ޕީއެސްއެމްގެ ޗެއާމަން އިބްރާހިމް އުމަރު މަނިކު ވިދާޅުވީ މި އަހަރުގެ ފިލްމް އެވޯޑް ހަފުލާ ވަރަށް ފުރިހަމަ އަދި ކާމިޔާބު ހަފްލާއަކަށް ހެދުމުގެ މަސަކަތް އެ ކުންފުނީގެ ފަރާތުން ކުރާނެ ކަމަށެވެ.
އެމްއެފްއޭގެ ރައީސް އަދި ރައްޔިތުންގެ މަޖިލީހުގެ އިހަވަންދޫ ދާއިރާގެ ޕީޕީއެމްގެ މެމްބަރު މުހައްމަދު އަބްދުﷲ (މުހައްމާ) ވިދާޅުވީ މި ފަހަރުގެ ފިލްމު އެވޯޑް ވާނީ، މިހާތަނަށް ބޭއްވޭ އެންމެ ފެންވަރު ރަނގަޅު އެވޯޑް ހަފްލާއަށް ކަމަށެވެ. އަދި ދައުލަތުގެ މީޑިއާއާ ގުޅިގެން އެމްއެފްއޭ އެވޯޑް ހަފުލާ ބޭއްވުމަކީ ވަރަށް އުފާވާ ކަމެއް ކަމަށް އޭނާ ވިދާޅުވި އެވެ.
މި އަހަރު ބާއްވާ އެމްއެފްއޭ އެވޯޑް ހާއްސަކޮށްފައި ވަނީ 2014 އާއި 2015 ގެ ފިލްމުތަކަށެވެ. ފާއިތުވި ދެ އަހަރު ނުކުމެފައި ވަނީ ޖުމްލަ ނުވަ ފިލްމެވެ.
2014 ގައި ރިލީޒްވި ފިލްމްތައް:
* ހުޅުދާން
* 24 ގަޑި އިރު
* އާދޭސް
* އިންސާނާ
* އަނިޔާ
2015 ގައި ރިލީޒްވި ފިލްމްތައް:
* އެންމެ ފަހު ވިންދާ ޖެހެންދެން
* މިކޮއެ ބައްޕަ ބައޭބައޭ
* ރަންދަރި
* އަހްޝަމް
އެމްއެފްއޭ އެވޯޑް ހަފުލާ ދެ އަހަރު ފަހުން ބާއްވާއިރު، ފިލްމީ ދާއިރާގެ ގިނަ ބަޔަކު ތިބީ އެވޯޑް ހަފުލާއަށް ވަރަށް ބޮޑަަށް އުންމީދުކޮށްގެންނެވެ.