ބޮލީވުޑްގެ އެކްޓަރު ސުޝާންތު ސިންގް ރާޖްޕޫތު މިހާރު ކުޅެމުން އަންނަ ފިލްމު "ކިޒީ އޯރް މެނީ" ގެ ބަތަލާ ސަންޖަނާ ސާންގީ އަށް އުނދަގޫވާ ވަރަށް ފިލްމުގެ ސެޓްގައި ސުޝާންތު ގައިގޯޅިވެ، ޖިންސީ ވާހަކަތަކެއް ދައްކާ ކަމަށް ބުނެ ބައެއް މީހުން ސުޝާންތަށް ޖިންސީ ފުރައްސާރައިގެ ތުހުމަތު ކޮށްފި އެވެ.
މިކަމާ ގުޅިގެން ބައެއް ނޫސްތަކުން ބުނި ގޮތުގައި ސުޝާންތުގެ އުނދަގޫ ބޮޑުވެގެން ސަންޖަނާ ފިލްމުގެ ޑައިރެކްޓު މުކޭޝް ޗަބްރާ ގާތު ޝަކުވާ ކުރުމުން އޭނާ އެކަމަށް އެއްވެސް ސަމާލު ކަމެއް ދީފައެއް ނުވެ އެވެ.
އެންމެ ފަހުން ސަންޖަނާގެ މައިންބަފައިންގެ ގާތު އެ ވާހަކަ ދެއްކުން އެ މީހުން އަމިއްލަ އަށް ފިލްމުގެ ސެޓަށް ގޮސް ދަރިފުޅުގެ ޝަކުވާތަކާއި ކަންބޮޑުވުންތައް ހިއްސާކޮށްފައިވާ ކަމަށްވެ އެވެ. އަދި ސުޝާންތުގެ އަމަލުތަކާ ހެދި، ސަންޖަނާ ހިތްހަމަނުޖެހިގެން، ފިލްމަށް ވަގުތު ދޭން ދެކޮޅު ހަދާތީ، ފިލްމުގެ މަސައްކަތް ވެސް މި ދޭ ތެރެއިން ވަރަށް ބޮޑަށް މަޑުޖެހިގެން ގޮސްފައިވާ ކަމަށް މީޑިއާތަކުން ބުންޏެވެ.
މިކަމާ ބެހޭ ސީދާ ސަންޖަނާ އެއްވެސް ވާހަކައެއް އަދި މީޑިއާތަކުގައި ދައްކައިފައި ނުވާ އިރު، މުކޭޝް ވަނީ މީޑިއާތަކުން ސުޝާންތާ ބެހޭ ގޮތުން ދެއްކި ވާހަކަތައް ދޮގުކޮށްފަ އެވެ.
އޭނާ ކުރި ޓްވީޓެއްގައި ބުނީ މީޑިއާތަކުން ބުނާ ކަހަލަ އެއްވެސް ކަމެއް "ކިޒީ އޯރް މެނީ" ގެ ސެޓްގައި މިހާތަނަށް ހިނގާފައި ނެތް ކަމަށެވެ. އޭނާ ބުނި ގޮތުގައި އެއްވެސް ކުށެއް ނެތް މައުސޫމު މީހުންގެ އަގު ވެއްޓޭ ފަދަ ވާހަކަތައް ދެއްކުމަކީ ވަރަށް ހިތާމަ ހުރި ކަމެއް ކަމަށެވެ.
އަދި ސުޝާންތު، 32، ކުރި ޓްވީޓްތަކެއްގައި ވަނީ ސަންޖަނާއާ ކުރި ޗެޓްތަކެއްގެ ލޮގް ހިއްސާކޮށް، އޭނާއާ ބެހޭ ގޮތުން ދައްކާ ވާހަކަތަކުގައި އެއްވެސް ހަގީގަތެއް ނެތް ކަމަށް ބުނެފަ އެވެ. ޒުވާން އެކްޓަރު ބުނި ގޮތުގައި ބައެއް މީހުން، ބައެއް ކަހަލަ ކެމްޕޭންތަކުގެ ނާޖާއިޒު ފައިދާ ނަގައިގެން، އަމިއްލަ އެޖެންޑާއެއް ހާސިލު ކުރަން އުޅުން ހުއްޓައިލަން ޖެހެ އެވެ. އަދި އެފަދަ ވާހަކަތަކަށް ސަމާލުކަން ނުދޭން ވެސް ސުޝާންތު ވަނީ އެދިފަ އެވެ.
ސުޝާންތާއި ސަންޖަނާ ކުޅޭ "ކިޒީ އޯރް މެނީ" އަކީ 2014 ގައި ރިލީޒް ކުރި ހޮލީވުޑްގެ ފިލްމު "ފޯލްޓް އިން އަވާ ސްޓާސް" ގެ ހިންދީ ރިމެކިން އެވެ. މިހާރު ޝޫޓިން ގާތްގަނޑަކަށް ނިމުމަކަށް އައިސްފައިވާ ފިލްމުގެ ޝޫޓިން ފެށީ މިދިޔަ ޖުލައި މަހުގެ ކުރީކޮޅު އެވެ.
ބޮލީވުޑްގައި ޖިންސީ ފުރައްސާރަތަކާ ދެކޮޅަށް #މީޓޫ މޫވްމަންޓް މިހާރު ވަރަށް ބާރަށް ކުރިއަށްދާ އިރު، މިހާތަނަށް ބައެއް އެކްޓަރުންނާއި ޑައިރެކްޓަރުންނާއި ޕްރޮޑިއުސަރުންނާއި ލަވަކިޔުންތެރިންނާއި މިއުޒިޝަނުންނާއި ލިޔުންތެރިންގެ މައްޗަށް ވަނީ ޖިންސީ ގޯނާގެ ތުހުމަތުކޮށްފަ އެވެ.