ގްލިމޯ ޑެލް ޓޯރޯ ނެޓްފްލިކްސް އަށް "ޕިނޯކިއޯ" ޑައިރެކްޓް ކުރަނީ

ގްލިމޯ: "ޕިނޯކިއޯ" ގެ ސްޓޮޕް-މޯޝަން ފިލްމެއް ގެނެސް ދޭނެ.

އަހުމަދު އަދްޝަން، މިހާރު

24 އޮކްޓޯބަރ 2018 - 07:23

މި އަހަރު ބޭއްވި 90 ވަނަ އޮސްކާ އެވޯޑް ހަފުލާގައި "ދަ ޝޭޕް އޮފް ވޯޓާ" އިން އެންމެ މޮޅު ޑައިރެކްޓަރުގެ އެވޯޑް އުފުލައިލި، ގްލިމޯ ޑެލް ޓޯރޯ ނެޓްފްލިކްސް އަށް "ޕިނޯކިއޯ" ޑައިރެކްޓްކޮށް ދޭން ނިންމައިފި އެވެ.

އޭނާ ޕްރޮޑިއުސަރެއްގެ ގޮތުގައި ވެސް ހިއްސާވާ މި ފިލްމު އުފައްދަން ނިންމާފައި ވަނީ ސްޓޮޕް-މޯޝަންގަ އެވެ. "ޕިނޯކިއާ" ނަމަކަށް ކިޔާ ލަކުޑި ޕަޕެޓެއްގެ ހިތްގައިމު އަދި އަސަރުން ފުރިގެންވާ ވާހަކަ ގްލިމޯ ކިޔައިދޭނީ އަމިއްލަ އަށް ލިޔާ ސްކްރިޕްޓަކަށެވެ.

މި ފިލްމާ ބެހޭ ގޮތުން އޭނާ ނެރުނު ބަޔާނެއްގައި ބުނީ ހިޔާލީ ކެރެކްޓާތަކުގެ ތެރެއިން އަބަދު ވެސް ހިތާ އެންމެ ގާތީ ޕިނޯކިއޯގެ ވާހަކަ ކަމަށެވެ. އެހެންވެ ފިލްމެއްގެ ގޮތުގައި "ޕިނީކިއޯ" ގެނެސް ދެވުމަކީ ވަރަށް ވެސް ޖަޒުބާތީ ކަމެއް ކަމަށް ބުންޏެވެ.

ގްލިމޯ ބުނީ ފިލްމުގެ މަސައްކަތް ފެށުމުގެ އެންމެ ފަހުގެ ތައްޔާރީތައް މިހާރުވަމުން އަންނަ ކަމަށާއި ފިލްމު ހެދުމުގެ މަސައްކަތް ރަސްމީކޮށް ފަށާނީ އަންނަ މާޗް މަހު އިޓަލީގައި ކަމަށެވެ.

Breaking Guillermo del Toro news: The Academy Award-winning filmmaker will write, produce, and direct a stop motion musical version of Pinocchio for Netflix. Del Toro explained, “I’ve wanted to make this movie for as long as I can remember.” Jiminy Cricket! pic.twitter.com/25cVRITSrT
— Netflix Film (@NetflixFilm) October 22, 2018

ނެޓްފްލިކްސްގެ ޓްވީޓް.

"އަހަރެން ވަރަށް މަސައްކަތް ކުރާނަން އަމިއްލަ ތަޖުރިބާގެ އަލީގައި ޕިނޯކިއޯ ވަރަށް ވެސް އަސަރުގަދަ ހިތްތަކާ ކުޅެލާ ކަހަލަ ފިލްމެއްގެ ގޮތުގައި ގެނެސް ދޭން،" ޕެސިފިކް ރިމް (2013) އާއި ޕޭން ލެބްރިންތު (2006) ފަދަ ފިލްމުތައް ގެނެސް ދިން 54 އަހަރުގެ ޑައިރެކްޓަރު ބުންޏެވެ.

ގްލިމޯ ނެޓްފްލިކްސް އަށް "ޕިނޯކިއާ" ހަދައި ދޭން ނިންމި އިރު، އޭނާ މީގެ ކުރިން ވަނީ ސްޓްރީމިން ސާވިސްގެ "ޓްރޯލްހަންޓާ" ގައި ވެސް ހިއްސާވެފަ އެވެ. އަދި ނެޓްފްލިކްސް އިން ގްލިމޯގެ ބިރުވެރި އެންތޮލޮޖީ ސީރީޒް "ގްލިމޯ ޑެލް ޓޯރޯ ޕްރެޒެންޓްސް 10 އާފްޓަ މިޓްނައިޓް" ވަރަށް އަވަހަށް ސްޓްރީމް ކުރަން ފަށާނެ އެވެ.

މީގެ ކުރިން ބެލުންތެރިންނަށް އެނިމޭޓެޑް ފިލްމެއްގެ ގޮތުގައި "ޕިނީކިއޯ" ބޮޑު ސްކްރީނަށް ގެނެސް ދިން ވޯލްޓް ޑިޒްނީން މިހާރު އަންނަނީ މީގެ ލައިވް-އެކްޝަން ފިލްމެއް ހެދުމުގެ މަސައްކަތް ކުރަމުންނެވެ.