ބެލުންތެރިންގެ ބޮޑު މަގުބުލޫކަމެއް ހޯދާފައިވާ ކޮމީޑިއަން ކަޕިލް ޝަރުމާގެ މަޝްހޫރު ޝޯ "ދަ ކަޕިލް ޝަރުމާ" ގެ އާ ސީޒަނުގެ ޕްރޮމޯ ދައްކާލައިިފި އެވެ.
ބެލުންތެރިންގެ އިންތިޒާރަށް ނިމުމެއް ގެންނާނީ އަންނަ މަހުގެ 23 ވަނަ ދުވަހު އެވެ. "ދަ ކަޕިލް ޝަރުމާ ޝޯ" އާ އެކު އެނބުރި އަންނަ ވާހަކަ މިދިޔަ އޮގަސްޓް މަހު ކަޕިލް ހިއްސާ ކުރި ހިސާބުން ވެސް އޭނާގެ މަޖާ ވާހަކަތަކާއި ހަރަކާތްތައް ދެކިލަން ފޭނުން ތިބީ ކެތްތެރިކަން ކުޑަވެފަ އެވެ.
ފާހަގަކޮށްލަން ޖެހޭ އަނެއް ކަމަކީ މި ފަހަރު ޝޯއާ އެކު ބެލުންތެރިންނާ ކަޕިލް ބައްދަލު ކުރާނީ އަލަތު ކައިވެނީގެ އުފަލާ ވެސް އެކުގައި ކަމެވެ. އޭނާ އާއި ލޯބިވެރިޔާ ގިނީ ޗަތުރަތު ކައިވެނި ކުރާނީ އަންނަ މަހުގެ 12 ވަނަ ދުވަހު އެވެ. ކަޕިލް ވަނީ އެކަން ރަސްމީކޮށް މިހާރު ސޯޝަލް މީޑިއާގައި ވެސް ހިއްސާކޮށްފަ އެވެ.
އިންޑިއާގެ އެންމެ ކާމިޔާބު ޓީވީ ޝޯތަކުގެ ތެރޭގައި ހިމެނޭ "ދަ ކަޕިލް ޝަރުމާ ޝޯ" އަލުން ބެލުންތެރިންނާ ހަމައަށް ސޮނީން މި ގެނެސް ދެނީ އެ ޝޯ ހުއްޓައިލިތާ އަހަރަކަށް ވުރެ ގިނަ ދުވަސް ފަހުންނެވެ. ޝޯ ހުއްޓައިލަން ޖެހުނު މައިގަނޑު އެއް ސަބަބަކީ ޝޯގެ ބައެއް ބައިވެރިންނާއި ކަޕިލްއާ ދެމެދު ހިތްހަމަނުޖެހުންތަކެއް އުފެދި، ޝޯގެ ހާއްސަ ބައެއް ބައިވެރިން ޝޯ ދޫކޮށްލުމުން އޭގެ ފޯރި ވަރަށް ބޮޑަށް ގެއްލި، ޓީއާރްޕީ ވެސް ދަށްވެގެންނެވެ.
އެހެންވެ "ދަ ކަޕިލް ޝަރުމާ ޝޯ" ހުއްޓައިލުމަށް ފަހު ސޮނީން ދެން ކަޕިލް ހިމަނައިގެން މި އަހަރުގެ ކުރީކޮޅު ގެނެސް ދޭން ފެށީ "ފެމިލީ ޓައިމް ވިތު ކަޕިލް ޝަރުމާ" ކިޔާ ޝޯއެކެވެ. މި ޝޯ ބެލުންތެރިންނަށް ބޮޑު ފޫއްސަކަށްވެ، ކަޕިލްގެ ފަރާތުން ވެސް ޝޯ އަށް އެއްބާރުލުން ލިބުން ކުޑަވާން ފެށުމުން އޭގެ ދެތިން އެޕިސޯޑެއް ގެނެސް ދިނުމަށް ފަހު "ފެމިލީ ޓައިމް ވިތު ކަޕިލް ޝަރުމާ" ވެސް ޖެހުނީ ހުއްޓައިލާށެވެ.
އޭގެ ފަހުން ކަޕިލް "ގެއްލި" އޭނާގެ ފޭނުން ބޮޑު ސުވާލު މާކެއްގެ ތެރޭގައި ތިއްބައި ކަޕިލް ވަނީ ޑިޕްރެޝަނާއި ރަލަށް ދެވި ހިފުން ފަދަ ސިއްހީ މައްސަލަތައް ކުރިމަތިވެ، ފަރުވާ ހޯދަމުން އަންނަ ކަމަށް ބުނެފަ އެވެ. އޭނާ އެނބުރި އަލުން ބެލުންތެރިން ހެއްވައިލަން މި އަންނަނީ ކުރިމަތިވި ހާޖާނުގަނޑުން ވެސް އެއްކޮށް އަރައި ގަތުމަށް ފަހު އެވެ.
އެހެންވެ "ދަ ކަޕިލް ޝަރުމާ ޝޯ" ގެ އިންތިޒާރުގައި ތިބި މީހުންނަށް ކަޕިލް އަސްލު ފޯމުގައި ފެންނާނެ ކަމަށް ބެލެވެ އެވެ. އެހެންވެ ޑިސެމްބަރު 23 ވަނަ ދުވަހުގެ ރޭ ވާނީ ވަރަށް ވެސް ހާއްސަ ރެއަކަށެވެ. ފުރަތަމަ އެޕިސޯޑްގައި މެހުމާނުންގެ ގޮތުގައި ފެނިގެން ދާނީ އަންނަ މަހުގެ 21 ގައި ރިލީޒް ކުރާ ފިލްމު "ޒީރޯ" ގެ ތަރިން ކަމަށްވާ ޝާހްރުކް ހާން، އަނުޝްކާ ޝަރުމާ އަދި ކެޓްރީނާ ކެއިފެވެ.
މި ފަހަރު "ދަ ކަޕިލް ޝަރުމާ ޝޯ" އާއި ކަޕިލްއާ އެކު ބައިވެރިވާ ކޮމީޑިއަނުންގެ ތެރޭގައި ކުރުޝްނާ އަބީޝެކް، ބާރުތީ ސިންގް، ކިކޫ ޝުރަދާ އަދި ޗަންދަން ޕްރަބާކާރް ހިމެނެ އެވެ.