ކުރީގެ ލޯބިވެރިޔާ ސުޝާންތު ސިންގް ރާޖްޕޫތާ އެކު ފިލްމު ކުޅެން އަންކިތާ ތައްޔާރު

ކުރީގެ ލޯބިވެރިޔާ އަދި އެކްޓަރު ސުޝާންތު ސިންގް ރާޖްޕޫތާ އެކު މަސައްކަތްކުރަން ތައްޔާރު ކަމަށް ބަތަލާ އަންކިތާ ލޯކަންދޭ ބުނެފި އެވެ.

އަންނަ ހުކުރު ދުވަހު ރިލީޒްކުރާ ފިލްމު "މަނިކަރްނިކާ: ދި ކްއީން އޮފް ޖާންސީ" އިން ބޮލީވުޑަށް ތައާރަފުވާ ބަތަލާ ބުނި ގޮތުގައި އެކްޓަރެއްގެ ހައިސިއްޔަތުން ވަކި މީހަކާ އެކު މަސައްކަތް ނުކުރުމަކީ އޭނާ ގެންގުޅޭ އުސޫލެއް ނޫނެވެ.

ޓައިމްސް އިފް އިންޑިއާ އަށް ދިން އިންޓަވިއުއެއްގައި އަންކިތާ ބުނި ގޮތުގައި ސުޝާންތާ އެކު ފިލްމެއްގައި މަސައްކަތްކޮށްލަން އޭނާ އަށް އެއްވެސް މައްސަލައެއް ނެތެވެ. އެކަމަކު އެ ފިލްމެއްގެ ސްކްރިޕްޓަކީ އޭނާ އަށް ކަމުދާ އެއްޗަކަށް ވާން ޖެހޭނެ އެވެ.

"އެއީ ޝަރުތަކީ. ސްކްރިޕްޓް އަހަންނަށް ކަމުދާ ކަމަށް ވަންޏާ ސުޝާންތާ އެކު ކުޅެން ލިބޭ ފިލްމެއް ދޫކޮށްލަން ޖެހޭ ސަބަބެއް ނެތް،" އަންކިތާ ބުންޏެވެ.

ސުޝާންތާއި އަންކިތާ ދިމާވެ، ލޯބީގެ ގުޅުމެއް ފެށުނީ ދެ މީހުން އެކުގައި 2009-2014 އަށް ކުޅުނު ޒީޓީވީގެ ކުރީގެ ސިލްސިލާ "ޕަވިތުރަ ރިޝްތާ" ގެ ސެޓުންނެވެ. އޭގެ ފަހުން 2016 އާ ހަމައަށް ދެ ތަރިންގެ ލޯބީގެ ގުޅުން ވަރަށް ބަދަހިކޮށް ދެމިއޮތެވެ. ގުޅުން ނިމުމަކަށް އައީ 2016 ގައި ފަހުކޮޅު ކައިވެނި ކުރަން ވެސް ތައްޔާރުވެފައި ވަނިކޮށެވެ.

ފިލްމު "ކައި ޕޯ ޗޭ" އިން 2013 ގައި ބޮލީވުޑަށް ތައާރަފުވި ސުޝާންތު ފަހުން ވަނީ އޭނާ އެކު 2017 ގެ "ރާބްތާ" ކުޅުނު ކްރިތީ ސެނަންއާ ވެސް ލޯބީގެ ގުޅުމެއް ބާއްވައިފަ އެވެ. އެކަމަކު އެ ފިލްމުގެ ނާކާމިޔާބީއާ އެކު، އެ ގުޅުން ވެސް ނިމުމަމަކަށް އަ އެވެ.

މިހާރު މިޑިއާތަކުން ރިޕޯޓް ކުރަމުން އަންނަ ގޮތުގައި މިދިޔަ އަހަރު ރިލީޒް ކުރި ސުޝާންތުގެ "ކެދަރުނާތު" ގެ ބަތަލާ ސާރާ އަލީ ހާނާ ދެމެދު މިހާރު އަންނަނީ ސިއްރު ގުޅުމެއް ހިނގަމުންނެވެ.

އަންކިތާ މިހާރު ލޯބީގެ ގޮތުން ގުޅިގެން އުޅެނީ މުމްބާއީގެ ޒުވާން ވިޔަފާރިވެރިއެއް ކަމަށްވާ ވިކީ ޖެއިންއާ އެވެ. އަދި ދެ މީހުންގެ މި އަހަރުގެ ތެރޭގައި ކައިވެނި ކުރާނެ ކަމަށްވެ އެވެ.