ރޯހިތު ޝެޓީގެ ކުންފުންޏަށް ފަރާ ހާން ފިލްމެއް ޑައިރެކްޓްކޮށްދެނީ

ބޮލީވުޑްގެ އެންމެ ކާމިޔާބު ޑައިރެކްޓަރުންގެ ތެރޭގައި ހިމެނޭ ރޯހިތު ޝެޓީގެ ފިލްމު ކުންފުނި ރޯހިތު ޝެޓީ ޕިކްޗާޒަށް ފިލްމެއް ޑައިރެކްޓްކޮށްދޭން ފަރާ ހާން ސޮއިކޮށްފި އެވެ.

ބޮލީވުޑް ހަންގާމާ އިން ބުނި ގޮތުގައި މި ފިލްމަކީ އެކްޝަން-ކޮމެޑީއެކެވެ. ކޮރިއޮގްރާފަރެއްގެ ގޮތުގައި ބޮލީވުޑްގައި މަޝްހޫރު، ތިން ކުދިންގެ މަންމަ ފަރާއަކީ މީގެ ކުރިން ވެސް ކާމިޔާބު ފިލްމުތަކެއް ޑައިރެކްޓްކޮށްފައިވާ މީހެކެވެ.

އޭނާ ވަނީ މީގެ ކުރިން ރޯހިތު ޑައިރެކްޓް ކުރި ބައެއް ފިލްމުތަކުގެ ލަވަތަކުގެ ކޮރިއޯ ވެސް ހަދައިފަ އެވެ. އޭގެ ތެރެއިން އެންމެ ފާހަގަކޮށްލެވޭ އެއް ލަވައަކީ 2015 ގައި ރިލީޒް ކުރި ޝާހްރުކް ހާނާއި ކާޖޮލްގެ "ދިލްވާލޭ" ގެ "ގޭރުއާ" ލަވަ އެވެ.

ބޮލީވުޑްގެ އެންމެ ކާމިޔާބު ބަތަލާއިންގެ ތެރޭގައި މިހާރު ހިމެނޭ ދީޕިކާ ޕަދްކޯން 2007 ގައި ބޮލީވުޑަށް ޝާހްރުކާ އެކު ތައާރަފުކޮށް ދިން ފިލްމު "އޯމް ޝާންތޯ އޯމް" ވެސް ގެނެސް ދިން ފަރާ އެންމެ ފަހުން ޑައިރެކްޓް ކުރި ފިލްމަކީ 2014 ގެ "ހެޕީ ނިއު އިޔާ" އެވެ.

އޭނާ ޑައިރެކްޝަނަށް ވެސް ނުކުތީ ޝާހްރުކް ލީޑް ރޯލް ކުޅުނު 2004 ގެ "މޭ ހޫ ނާ" އިންނެވެ. މީގެ އިތުރުން އަކްޝޭ ކުމާރާއި ކެޓްރިނާ ކެއިފާ އެކު ފަރާ ވަނީ 2010 ގައި "ތީސް މާރް ހާން" ކިޔާ ފިލްމެއް ވެސް ގެނެސް ދީފަ އެވެ.

ހަންގާމާ އިން ބުނި ގޮތުގައި ފަރާ، ރޯހިތުގެ ކުންފުންޏަށް ޑައިރެކްޓްކޮށްދޭ ފިލްމުގެ ސްކްރިޕްޓް މިހާރު ގާތްގަނޑަކަށް ނިމިފައިވާ އިރު، އޭގެ ކާސްޓުން ވަރަށް އަވަހަށް އިއުލާން ކުރާނެ އެވެ. ފަހަރުގައި މި ފިލްމަކީ 2017 ގެ މިސް ވޯލްޑްގެ ތާޖް ހާސިލު ކުރި މަނޫޝީ ޗިލާރު، 21، ބޮލީވުޑަށް ތައާރަފުވާ ފިލްމަށް ވެސް ވެދާނެ އެވެ.

ދާދި ފަހުން މީޑިއާތަކުން ރިޕޯޓްކޮށްފައިވާ ގޮތުގައި ފަރާ ވަނީ، މަނޫޝީ ބޮލީވުޑަށް ތައާރަފުކޮށް ދިނުމުގެ ޒިންމާއާ ހަވާލުވެފަ އެވެ.

ސަތޭކަ ކްރޯޑް ރުޕީސް އަށް ވުރެ ބޮޑު އާމްދަނީއެއް ހޯދި ފިލްމުތައް އެންމެ ގިނަ ޑައިރެކްޓަރުގެ ރިކޯޑް އޮތް ރޯހިތުގެ އެންމެ ފަހުގެ ފިލްމަކީ ކަރަން ޖޯހަރުގެ ދަރްމާ ޕްރޮޑަކްޝަނާ ގުޅިގެން މިދިޔަ ޑިސެމްބަރު މަހު ގެނެސް ދިން "ސިމްބާ" އެވެ. އޭނާ މިހާރު އަންނަނީ އަކްޝޭ ކުމާރާ އެކު "ސޫރިޔާވަންޝީ" ކިޔާ ފިލްމެއްގެ މަސައްކަތް ކުރަމުންނެވެ.

ހަންގާމާ އިން ބުނި ގޮތުގައި ރޯހިތުގެ ކުންފުނިން އަޖޭ ދޭވްގަން ކުޅުނު ފިލްމު "ސިންގަމް" އެނިމޭޓެޑް ވާޝަނެއް ވެސް ކުޑަކުދިންނަށް ހާއްސަކޮށްގެން ޑިސްކަވަރީ ކިޑްސް އިން ވަރަށް އަވަހަށް ގެނެސް ދޭނެ އެވެ.