ލަވަ ކިޔުންތެރިއެއްގެ ގޮތުގައި ވެސް ކުރިއަށް ދާން ބޭނުންވޭ: ޕާލް ވީ ޕޫރީ

މިއުޒިކަށް ވަރަށް ބޮޑަށް ލޯބިކުރާ ކަމަށާއި ލަވަކިިޔުންތެރިއެއްގެ ގޮތުގައި ވެސް ކެރިއަރެއް ބިނާ ކުރަން ބޭނުންވާ ކަމަށް ޓީވީ އެކްޓަރު ޕާލް ވީ ޕޫރީ ބުނެފި އެވެ.

ކަލާޒުން ދާދި ފަހުން ދައްކަން ފެށި އާ ސިލްސިލާ "ބޭޕަނާ ޕިޔާރު" ގެ ބަތަލު ޅެން ހަދައި، ކޮމްޕޯޒްކޮށް، ކިޔާފައިވާ ލަވައެއްގެ ވީޑިއޯއެއް ވެސް މިދިޔަ މަހު ޓީ ސީރީޒުން ނެރެފައިވެ އެވެ. "ޕީރް މޭރީ" ގެ ނަން ދީފައިވާ އެ ލަވައިން ޕާލްއާ އެކު ފެނިގެން ދަނީ ސިލްސިލާ "ނާގިން 3" ގައި އޭނާއާ އެކު މަސައްކަތް ކުރި މަޝްހޫރު ޓީވީ ބަތަލާ އަނީތާ ހަސަންދާނީ އެވެ.

ހިންދުސްތާން ޓައިމްސް އަށް ދިން އިންޓަވިއެއްގައި 29 އަހަރުގެ އެކްޓަރު ބުނީ އޭނާ ސީރިއަސްކޮށް ލަވަ އާއި މިއުޒިކް ހަދަން ފެށީ ގްރޭޑް 8 ގައި ކިޔެވި އިރު ކަމަށެވެ.

"މިހާތަނަށް ސަތޭކައެއްހާ ކޮމްޕޮޒިޝަން އަހަރެން ހަދައިފިން. އަހަރެން ވަރަށް ބޭނުންވޭ އެކްޓިންއާ އެކުއެކީގައި ލަވަކިޔުމުގެ ކެރިއަރެއް ވެސް ބިނާ ކުރަން. އަދި މިއީ އެކަން ކުރަން އެންމެ ރަނގަޅު އެއް ދަނޑިވަޅު ވެސް މެ،" ޕާލް ބުންޏެވެ. "އާ ފަންނާނުންނަށް މިހާރު ކުރިއަށް ދެވޭނެ ފްލެޓޯމްތައް އެބަހުރި. އަހަރެން ޝުކުރު ވެސް އަދާ ކުރަން ޓީ ސީރީޒުން ފަހިކޮށް ދިން ފުރުސަތަށް."

"މޭރީ ސާސޫ މާ" އާއި "ޕިރް ބީ ނާ މާނޭ...ބައްތަމީޒް ދިލް" އަދި "ނާގުރުޖުނާ: އޭކް ޔޯދާ" ފަދަ ސިލްސިލާތައް ކުޅެފައިވާ ޕާލް ބުނީ ލަވަކިޔުންތެރިއެއްގެ ގޮތުގައި ވެސް ގިނަ ބަޔަކު އޭނާ ބަލައި ގަތުމަކީ ދެކޭ ހުވަފެނެއް ކަމަށެވެ.

"އަހަރެން މިހާރު ބޭނުމެއް ނޫން ލައިފްގެ އެއްވެސް ހިނދުކޮޅެއް ބޭކާރުކޮށްލާކަށް. ހުރި ހުނަރުތައް ދައްކާލައިގެން ކުރިއަށް ދާން ބޭނުން ވަނީ. އެގޮތުން ލަވަކިޔުމަކީ އަހަރެން ވަރަށް ބޮޑަށް ވެސް ކުރަން ބޭނުންވާ ކަމެއް،" އޭނާ ބުންޏެވެ. "އެއީ އަހަރެންގެ ހާއްސަ ޕެޝަނެއް. ބޭނުންވޭ ކުރިއަށް ދާން."