އާމިރު ހާނާއި ސައިފް އަލީ ހާން އަލުން އެކީގައި ފެނިދާނެ

އަހުމަދު އަދްޝަން، މިހާރު

01 އޯގަސްޓް 2019 - 07:18

އާމިރު ހާނާއި ސައިފް އަލީ ހާން މިހާތަނަށް އެކުގައި ދެ ފިލްމެއްގައި މަސައްކަތްކޮށްފައިވެ އެވެ. އެއީ 2001 ގައި ފަރުހާން އަހްތަރު ޑައިރެކްޝަނަށް ނުކުތް "ދިލް ޗާހަތާ ހޭ" އާއި 1993 ގައި ޔާޝް ޗޯޕްޅާ ގެނެސް ދިން "ޕަރަމްޕަރާ" ގަ އެވެ.

ރިޕޯޓްތައް މިހާރު ބުނާ ގޮތުން އާމިރާއި ސައިފް އަލުން އެކީގައި ސްކްރީނުން ފެނުމުގެ ފުރުސަތު ބޮޑެވެ. އެގޮތުން ޑައިރެކްޓަރު ނީރަޖް ޕާންޑޭ ދެ ތަރިންނަށް ފިލްމު ހުށަހެޅުމުން އެ މީހުންނަށް ސްކްރިޕްޓް ވަރަށް ކަމުގޮސްފައިވާތީ އެ ފިލްމަށް އެއްބާސްވާނެ ކަމުގެ އިޝާރާތްތަކެއް މިހާރު ވަނީ ދީފަ އެވެ.

ނަމަވެސް ސައިފާއި އާމިރު ވެސް މި ވަގުތު އުޅެނީ އެހެން ޕްރޮޖެކްޓްތަކެއްގައި ބުރަކޮށެވެ.

ސައިފް އަލަށް އުފެއްދި ފިލްމު ކުންފުނި ބްލެކްނައިޓް ފިލްމްސް އިން ހަދާ ފުރަތަމަ ފިލްމު "ޖަވާނި ޖާނެމަން" މިދިޔަ މަހުން ފެށިގެން ލަންޑަނުގައި އަންނަނީ ޝޫޓް ކުރަމުންނެވެ. އެ ފިލްމަށް ފަހު އޭނާ "ބޫތު ޕޮލިޝް" ގެ މަސައްކަތް ފަށާނެ އެވެ.

އާމިރަކީ އަބަދު ވެސް އަހަރަކު އެއް ފިލްމަށް ފޯކަސް ކުރާ އެކްޓަރަކަށްވެފައި، އޭނާގެ ކުރިއަށް އޮތް ފިލްމު "ލާލު ސިންގް ޗައްޑާ" ގެ ޝޫޓިން އަންނަ އޮކްޓޯބަރުގައި ފަށާތީ ނީރަޖްގެ ފިލްމަށް އޭނާ ވަގުތު ދޭ ނަމަ އެކަން ކުރާނީ އަންނަ އަހަރު ކަމަށް ބެލެވެ އެވެ. ސައިފްގެ އަންހެނުން ކަރީނާ ކަޕޫރް ބަތަލާގެ ރޯލް ކުޅޭ "ލާލު ސިންގް ޗައްޑާ" އަކީ އަންނަ އަހަރުގެ ކްރިސްމަހަށް ތާވަލުކޮށްފައި އޮތް ފިލްމެކެވެ.

އެހެންވެ ނީރަޖަށް އޮތް ގޮތަކީ އާމިރާއި ސައިފް ހިމަނައިގެން ފިލްމެއް ހަދާ ނަމަ އިންތިޒާރުގައި ހުރުމެވެ. އޭނާ އެންމެ ފަހުން ޑައިރެކްޓްކޮށް ގެނެސް ދިން ފިލްމަކީ މިދިޔަ އަހަރު ސިދާތު މަލްއުތުރާ އާއި މަނޯޖް ބަޖްޕާއީއާ އެކު ގެނެސް ދިން "އައްޔާރީ" އެވެ.