"ކިލް ބިލް" ގެ ހިންދީ ފިލްމުގައި ޝާހްރުކް ޚާން؟

މިދިޔަ އަހަރު ރިލީޒްކުރި ފިލްމު "ޒީރޯ" ގެ ބޮޑު ނާކާމިޔާބީއާ ގުޅިގެން އެކްޓިން އިން ބްރޭކެއް ނަގައިގެން ހުރި އެކްޓަރު ޝާހްރުކް ޚާން ކޮންމެވެސް ފިލްމަކަށް އެއްބަސްވި ކަމަށް ބުނާ ވާހަކައެއް މީޑިއާތަކުގެ ސުރުހީތަކަށް ނާރާ ދުވަހެއް މަދުވާނެ އެވެ.

އަނެއްކާ ހަމަ މި ކަހަލަ ވާހަކަ އެވެ. ފިލްމީ ޚަބަރުތައް ގެނެސްދޭ ނޫސްތަކުން މިހާރު ރިޕޯޓްކުރަމުން އަންނަ ގޮތުގައި ހޮލީވުޑްގެ ޑައިރެކްޓަރު ކްއެންޓިން ޓެރެންޓީނޯ 2003 ހައި ގެނެސްދިން ދިން ކާމިޔާބު ފިލްމު "ކިލް ބިލް" އަސްލަކަށް ބަލައިގެން ހަދާ ފިލްމުގެ ވިލަން (ބިލް) ގެ ރޯލަށް ޝާހްރުކް ވަނީ ސޮއިކޮށްފަ އެވެ.

މީގެ ހިންދީ ފިލްމު ހަދަން ނިންމާފައި ވަނީ ދޭތެރެ ދޭތެރެއިން ފިލްމުތަކުން ފެންނަ އެކްޓަރު ނިކިލް ދިވެދީ އާއި ޑައިރެކްޓަރު އަނޫރާގް ކެޝަޕް ގުޅިގެންނެވެ. އަދި އަނޫރާގް ހަދާ ފިލްމެއްގައި މަސައްކަތްކޮށްލުމުގެ ޝައުގުވެރިކަން ޝާހްރުކް ބޮޑުކަމުން ފިލްމަށް އެއްބަސްވީ ކަމަށްވެ އެވެ.

ނަމަވެސް މިކަމާ ބެހޭ ގޮތުން އެ ތިން މީހުން ވެސް އަދި އެއްވެސް ވާހަކައެއް ނުދައްކަ އެވެ.

މި ފަހުން ޝާހްރުކް ސޮއިކުރި ކަމަށް ބުނާ ފިލްމުތަކުގެ ތެރޭގައި ފަރާ ޚާންގެ "ސައްތޭ ޕޭ ސައްތާ" ގެ ރިމެކާއި ޑައިރެކްޓަރު ރާޖްކުމާރު ހިރާނީގެ ފިލްމަކާއި ސަންޖޭ ލީލާ ބަންސާލީގެ ފިލްމެއްގެ އިތުރުން ޑައިރެކްޓަރު އަލީ އައްބާސް ޒަފަރުގެ ފިލްމެއް ހިމެނެ އެވެ.

ނަމަވެސް ޝާހްރުކް ކުރި ޓްވީޓެއްގައި ވަނީ މީޑިއާތަކުން ރިޕޯޓްކުރާ ގޮތަށް އޭނާ އާ އެއްވެސް ފިލްމަކަށް ސޮއިނުކުރާ ކަމަށާއި ފިލްމަކަށް ސޮއިކުރި އިރަކުން އެ ވާހަކަ ހިއްސާކުރާނެ ކަމަށް ބުނެފަ އެވެ.

މިދިޔަ ޖުލައި މަހު "ވަންސް އަޕޮން އަ ޓައިމް ހޮލީވުޑް" ގެނެސްދިން ޓެރަންޓީނޯ ވަނީ "ކިލް ބިލް" ގެ ދެ ފިލްމެއް ގެނެސް ދީފަ އެވެ. އެއީ 2003 ގައި ރިލީޒްކުރި "ވޮލިއުމް 1" އާއި 2004 ގައި ރިލީޒްކުރި "ވޮލިއުމް 2" އެވެ. މި ދެ ފިލްމުގެ އެންމެ މުހިއްމު ތަރިއަކީ ބަތަލާ އުމާ ތާމަން އެވެ.