އަރިޔަން ފިލްމު ކުޅޭކަށް ބޭނުމެއް ނޫން: ޝާހްރުކް ޚާން

ޝާހްރުކް ޚާންގެ ދޮށީ ފިރިހެން ދަރިފުޅު ބޮޑު ސްކްރީނުން ނުފެނިދާނެ ކަމުގެ އިޝާރާތެއް ދީފި އެވެ.

ހުކުރު ދުވަހު ނެޓްފްލިކްސް އިން ސްޓްރީމްކުރި ޑޭވިޑް ލެޓަމަންގެ ޝޯ "މައި ނެކްސް ގެސްޓް ނީޑްސް ނޯ އިންޓްރޮޑަކްޝަން" ގައި ޝާހްރުކް ބުނީ 21 އަހަރުގެ ދަރިފުޅު ގަބޫލުކުރާ ގޮތުގައި އޭނާ އަކީ އެކްޓަރަކަށްވުމުގެ ހުނަރު ލިބިފައިވާ މީހެއް ނޫނެވެ. ޝާހްރުކް ބުނިގޮތުގައި އޭނާ ވެސް ގަބޫލުކުރާ ގޮތުގައި އެކްޓްކުރުމަކީ ގުދުރަތީގޮތުން ވެސް މީހާގެ ކިބައިގައި ހުރެގެން ނޫނީ ކުރިއަށް ނުދެވޭ ކަހަލަ މަސައްކަތެކެވެ.

"އަހަރެން އަރިޔަން ދައްކާ ސަބަބުތައް ގަބޫލުކުރަން. އޭނާ ގަބޫލުކުރާ ގޮތުގައި އަހަރެންގެ ދަރިއަކަށްވީމަ އެ ޕްރެޝަރު ބޮޑުވާނެ. އަދި މީހުންގެ އެކްސްޕެކްޓޭޝަންތައް މާ މަތީގައި ހުންނާނީ،" ޝާހްރުކް ބުންޏެވެ. "ހަމައެއާ އެކު އަހަންނާއި އަރިޔަން އަޅާކިޔުމަކީ އަބަދުވެސް ކުރާނެ ކަމެއް. އެހެންވެ މިކަހަލަ ސަބަބުތަކެއް ހުރުމާއި އަމިއްލަ އަށް އެކްޓްކުރުމުގެ ޝައުގުވެރިކަން ވެސް ނެތީމަ ދަރިފުޅު ބޭނުމެއް ނުވޭ އެކްޓަރަށްވާކަށް."

އަރިޔަން މިހާރު އަންނަނީ އެމެރިކާގެ ލޮސް އެންޖެލިސްގެ ސަދަން ކެލިފޯނިއާ ޔުނިވަސިޓީ (ޔޫއެސްސީ) ގައި ފިލްމު މޭކިން ކިޔަވަމުންނެވެ. ޝާހްރުކް ބުނިގޮތުގައި ދަރިފުޅަކީ ލިޔުންތެރިކަމަށް ވަރަށް ލޯބިކުރާ ޒުވާނެކެވެ. އެހެންވެ ފިލްމީ ދާއިރާގައި މަސައްކަތް ކުރިޔަސް، ކެމެރާގެ ފުރަގަހުގައި އަރިޔަން މަސައްކަތްކޮށްފާނެ ކަމަށް ބުންޏެވެ.

"އޭނާ ލިޔުންތެރިކަމަށް ވަރަށް ބޮޑަށް ލޯބިކުރޭ. ހީވަނީ އެކަހަލަ ދިމާއަކުންހެން އޭނާ ކެރިއާ ބިލްޑްކުރާނީ،" ޝާހްރުކް ބުންޏެވެ.

އެކްޓްކުރުން ޝައުވެރިކަން ނެތަސް އަރިޔަން ވަނީ ދާދި ފަހުން ނެޓްފްލިކްސް އިން ގެނެސްދިން "ލަޔަން ކިންގް" އިންޑިއާގައި ދެއްކި އިރު އެ ފިލްމުގެ ހިންދީ ވާޝަނަށް، ބައްޕައާ އެކު ފިލްމުގެ މައި އެއް ކެރެކްޓާ އަށް އަޑުއަޅައި ދީފަ އެވެ.

އަރިޔަން އެކްޓްކުރަން ޝައުގުވެރިކަން ނެތް ނަމަވެސް ޝާހްރުކްގެ އަންހެން ދަރިފުޅު ސުހާނާ ޚާން، 19، ފިލްމީ ތަރިއަކަށްވާނެކަމާ ދޭތެރޭ ޝައްކެއް ނެތް ކަމަށް ޝާހްރުކް ބުނެފައިވެ އެވެ.