ރަންބީރް ކަޕޫރާއި ޝްރަދާ ކަޕޫރް ޖޯޑު ސްކްރީނަށް ގެންނަނީ

މިހާތަނަށް އަދި އެކުގައި ފިލްމެއް ކުޅެފައި ނުވާ ރަންބީރު ކަޕޫރާއި ޝްރަދާ ކަޕޫރް އަލަށް އެކުގައި ކުޅޭ ފިލްމަކަށް ސޮއިކޮށްފި އެވެ.

ނަން އަދި އިއުލާންްނުކުރާ މި ފިލްމަކީ މިދިޔަ އަހަރުގެ ކާމިޔާބު ފިލްމު "ސޯނޭ ކޭ ޓިޓޫ ކީ ސްވީޓީ" ގެނެސްދިން ޑައިރެކްޓަރު ލަވް ރަންޖަން ޑައިރެކްޓްކުރާ ފިލްމެކެވެ. ފިލްމު ސިނަމާތަކަށް ގެންނަން ނިންމާފައި ވަނީ މާޗް 26، 2021 ގަ އެވެ.

ލަވްގެ މި ފިލްމަކީ ރަންބީރާއި އަޖޭ ދޭވްގަން މިދިޔަ އަހަރު ސޮއިކުރި ފިލްމު ކަމަށް ބެލެވެ އެވެ. އެކަމަކު މީގެ މަސައްކަތްތައް ނުފެށި ވަރަށް ބޮޑަށް ދިގުލައިގެން ދިއުމާއި އަޖޭ އަށް ލިބުނު ކެރެކްޓާއާ ދޭތެރޭ ފަހުން އޭނާ ހިތްހަމަނުޖެހިގެން ފިލްމު ދޫކޮށްލާފައިވާ ކަމަށްވެ އެވެ. އަދި ފިލްމުގެ ބަތަލާ އަކީ ރަންބީރުގެ ކުރީގެ ލޯބިވެރިޔާ ދީޕިކާ ޕަދްކޯން ކަމަށް ވެސް ދާދި ފަހުން އަޑުއަރާފައިވެ އެވެ.

ކޮންމެއަކަސް ރަންބީރާއި ޝްރަދާ ލަވްގެ ފިލްމުން ސްކްރީނުން ގެންނަން ނިންމުމަކީ ބެލުންތެރިންނަށް މުޅިން އާ ޖޯޑެއްގެ ކެމިސްޓްރީއެއް ފެނިގެންދާނެ ކަމަކަށްވާނެ އެވެ. މި ދެ ތަރިން އެކުގައި ފިލްމެއް ކުޅެފައި އަދި ނެތަސް، ރަންބީރުގެ ބައްޕަ ރިޝީ ކަޕޫރާއި ޝްރަދާގެ ބައްޕަ ޝަކްތީ ކަޕޫރް އެކީގައި ވަރަށް ގިނަ ފިލްމުތަކެއްގައި މަސައްކަތްކޮށްފައިިވެ އެވެ.

ލަވްގެ އާ ފިިލްމުގެ ކާސްޓާއި ރިލިޒްކުރާ ތާރީހު އިއުލާންކުރި އިރު، ބައެއް މީޑިއާތަކުން ރިޕޯޓްކޮށްފައިވާ ގޮތުގައި 1982 ގައި ރިލީޒްކުރި ކާމިޔާބު ފިލްމު "ސައްތޭ ޕޭ ސައްތާ" ގެ ރިކެމް ޑައިރެކްޓްކުރަން ވެސް ލަވަށް ހުށަހަޅާފައިވެ އެވެ. އަދި އެ ފިލްމު އަންނަ މަހުގެ ތެރޭގައި ރަސްމީކޮށް އިއުލާންކުރާނެ ކަމަށާއި ފިލްމުގެ ލީޑް ރޯލް ކުޅޭނީ ރިތިކް ރޯޝަނާއި ދީޕިކާ ކަމަށް މީޑިއާތަކުން ރިޕޯޓްކޮށްފައިވެ އެވެ.

މި އަހަރު "ސާހޯ" އާއި "ޗިޗޯރް" އިން ފެނިގެން ދިޔަ ޝްރަދާ އަންނަ އަހަރު ފެނިގެންދާނެ ފުރަތަމަ ފިލްމަކީ އަންނަ މަހުގެ 24 ގައި ރިލީޒްކުރާ "ސްޓްރީޓް ޑާންސާ" އެވެ. އޭގެ ފަހުން މާޗް 6 ގައި "ބާގީ 3" ސިނަމާތަކަށް އަންނާނެ އެވެ.

ރަންބީރުގެ ވެސް ދެ ފިލްމެއް އަންނަ އަހަރު ރިލީޒްވާނެ އެވެ. އެއީ ޖުލައި 31 ގައި ގެނެސްދޭ "ޝަމްޝޭރާ" އާއި ތާރީހު އިއުލާންނުކުރާ "ބުރައްމަސްތުރާ" އެވެ. ކަރަން ޖޯހަރު ޕްރޮޑިއުސްކޮށް، އަޔާން މުކަރްޖީ ޑައިރެކްޓްކުރާ "ބުރައްމަސްތުރާ" އަކީ ރަންބީރު ލޯބިވެރިޔާ އާލިއާ ބަޓާ އެކު ކުޅޭ ފުރަތަމަ ފިލްމެވެ.