ކެޓްރީނާ ކައިފްގެ ސުޕަހީރޯ ފިލްމަށް 90 ކްރޯޑްގެ ބަޖެޓެއް

ބަތަލާ ކެޓްރީނާ ކައިފާ އެކު ސުޕަހީރޯ ފިލްމެއް ހަދަން ނިންމިކަން ޑައިރެކްޓަރު އަލީ އައްބާސް ޒަފަރު ކަށަވަރުކޮށް ދީފައި ވަނިކޮށް، އެ ފިލްމުގެ ބަޖެޓްގެ ވާހަކަތަކެއް ވެސް މީޑިއާތަކުގައި ދެކެވެން ފަށައިފި އެވެ.

ފިލްމީ ޚަބަރުތައް ގެނެސްދޭ ގިނަ ނޫސްތަކުން ބުނި ގޮތުގައި ފިލްމު ހަދަން ނިންމާފައި ވަނީ 90 ކްރޯޑް ރުޕީސް (12 މިލިއަން ޑޮލަރު) ގެ ބަޖެޓަކުންނެވެ. ބޮލީވުޑަކީ އާންމުކޮށް ބަތަލާއިން ލީޑްކުރާ ފިލްމުތަކަށް މި ވަރުގެ ބަޖެޓެއް ހޭދަކުރާ އިންޑަސްޓްރީއެއް ނޫނެވެ.

ނަމަވެސް ޒަމާން ބަދަލުވެ، ބަތަލާ އިން ސެންޓްރަލް ކެރެކްޓާތައް ކުޅޭ ފިލްމުތައް ވެސް ބޮކްސް އޮފީހުގައި މިހާރު ބޮޑު އާމްދަނީއެއް ހޯދާތީ ބޮޑު ބަޖެޓްތަކުން ބަތަލާއިން ލީޑްކުރާ ފިލްމުތައް ހެދުމަކީ މިހާރު މަޑުމަޑުން އިތުރުވަމުން އަންނަ ކަމެއްކަން ފާހަގަކުރެވެ އެވެ.

ބޮލީވުޑް ހަންގާމާ އަށް ދިން އިންޓަވިއުއެއްގައި ކެޓްރީނާއާ އެކު ސުޕަހީރޯ ފިލްމެއް ހަދާކަން ކަށަވަރުކޮށް ދެމުން އަލީ ބުނީ އޭގެ ތައްޔާރީތައްވަމުން އަންނަ ކަމަށެވެ. އެކަމަކު އެއްވެސް ތަފުސީލެއް ނުދެ އެވެ. ނަމަވެސް ނޫސްތަކުން ބުނިގޮތުގައި މި ފިލްމުވެގެން ދާނީ ގަލް ގެޑޯ ކުޅޭ ހޮލީވުޑްގެ އަންހެން ސުޕަހީރޯ ފިލްމު "ވޮންޑަ ވުމަން" ކަހަލަ ވަރުގަދަ ފިލްމަކަށެވެ. އަދި މިއީ ފްރެންޗައިޒަކަށް ހަދާނެ އެވެ.

ހަންގާމާ އިން ބުނިގޮތުގައި އަލީގެ ސުޕަހީރޯ ފިލްމަކީ ޒީ ސްޓޫޑިއޯސް އިން ހަދާ ފިލްމެކެވެ. އޭނާ އާއި ޒީ ދާދި ފަހުން ވަނީ "މިސްޓަ އިންޑިއާ" ގެ ޓްރިލޮޖީއެއް ހަދަން ނިންމިކަން ވެސް އިއުލާންކޮށްފަ އެވެ. ނަމަވެސް ރިޕޯޓްތައް ބުނާގޮތުން "މިސްޓަ އިންޑިއާ" ގެ ޓްރިލޮޖީގެ ފުރަތަމަ ބައިގެ ކުރިން އަލީ ހަދާނީ ކެޓްރީނާގެ ފިލްމެވެ.

އަލީ އެންމެ ފަހުން ވެސް ގެނެސްދިން ފިލްމަކީ މިދިޔަ އަހަރުގެ ކެޓްރީނާ ބަތަލާގެ ރޯލް ކުޅުނު "ބާރަތު" އެވެ. އެ ދެ މީހުން އެކީގައި މަސައްކަތްކުރި ފިލްމުތަކުގެ ތެރޭގައި 2018 ގެ "ޓައިގާ ޒިންދާ ހޭ" އާއި 2011 ގެ "މޭރޭ ބްރަދާ ކީ ދުލްހަން" ހިމެނެ އެވެ.