އަދިތިޔާއާ ކައިވެނިކުރި ސަބަބު ރާނީ ކިޔައިދީފި

ޑައިރެކްޓަރު/ޕްރޮޑިއުސަރު އަދިތިޔާ ޗޯޕްރާގެ ހަޔާތަށް ބަތަލާ ރާނީ މުކަރްޖީ އައުމަކީ އާދީގެ އާއިލާ އިން ކުރި އެހާ ރުހުނު ކަމެއް ނޫނެވެ. އޭނާގެ އަލަތު ކައިވެނި ރޫޅުމުގެ ޒިންމާ ވެސް ބައެއް މީހުން ރާނީގެ ބޮލުގައި އަޅުވާފައިވެ އެވެ. އެކަމަކު އެއީ މިހާރު މާޒީ އެވެ.

އެ ދެ މީހުން ކައިވެނިކޮށްގެން މިހާރު ހަތަރު އަހަރުގެ އަންހެން ދަރިއަކު ވެސް އެބަ ހުއްޓެވެ. ރާނީ އާއި އާދީ ކައިވެނިކުރީ އިޓަލީގައި ބޭއްވި ވަރަށް ސިއްރު ހަފުލާއެއްގައި 2014 ގަ އެވެ.

އިންޑިއާގެ އެންމެ ބޮޑު ފިލްމު ފިލްމު ކުންފުނި އަދި އާއިލީ ސްޓޫޑިއޯ ޔާޝާރާޖް ފިލްމްސް (ވައިއާރްއެފް) މިހާރު ހިންގުމުގެ ޒިންމާއާ ނަގަމުން އަންނަ އާދީއާ ބެހޭ ގޮތުން އިންޑިއާގެ ޓީވީ ޗެނަލަކަށް ދިން އިންޓަވިއުއެއްގައި ރާނީ ބުނީ އޭނާ އަށް އަދީ ދެކެ ލޯބިވެވުނީ އޭނާ އަކީ ވަރަށް ޕްރައިވެޓް މީހަކަށްވާތީ ކަމަށެވެ. އަދި އާދީ އަކީ އެއްގޮތަކަށް ވެސް ސޯޝަލައިޒްވެގެން އުޅޭ މީހަކަށް ނުވުމާއި އާއިލާއާ އެކު ގިނަ ވަގުތު ހޭދަކުރާ މީހަކަށްވުމަކީ ވަރަށް ބޮޑު ނަސީބެއް ކަމަށް ރާނީ ބުންޏެވެ.

ކާމިޔާބު އެތައް ފިލްމެއް ކުޅެފައިވާ ހުނަރުވެރި ބަތަލާ ބުނީ ފިރިމީހާ އަކީ ޑައިރެކްޓަރު/ޕްރޮޑިއުސަރު ކަރަން ޖޯހަރު ކަހަލަ މީހެއް ނަމަ އޭނާ އަށް އާދީ ދެކެ ގަޔާނުވެވުނީސް ކަމަށެވެ.

"ކަރަން ނޫޅޭ ތަނެއް ނޯންނާނެ. ކޮންމެ ތާކު ކޮންމެ ކަމެއް ކުރިޔަސް އޭނަ ހުންނާނެ. އޭނަ އަކީ ވަރަށް ސޯޝަލައިޒް މީހެއް. އެއާ ހިލާފަށް އާދީ އަކީ އެއްގޮތަކަށް ވެސް ސޯޝަލައިޒްނުވާ ވަރަށް ޕްރައިވެޓް މީހެއް. އަހަންނަށް ހަމަ ވަރަށް ޔަގީން އާދީ އަކީ ކަރަން ކަހަލަ މީހަކަށްވި ނަމަ އަހަންނަށް އޭނަ ދެކެ ލޯބިނުވެވުނީސް." ރާނީ ވިދައިލި ފިލްމު "ކުޗް ކުޗް ހޯތާ ހޭ" ގެ ޑައިރެކްޓަަރާ ގުޅުވައިގެން ބުންޏެވެ.

ރާނީ ބުނީ އާދީ އަކީ ބޭރުތެރެއަށް ނުކުމެ ގިނަ ވަގުތު މަސައްކަތުގައި އުޅޭ މީހެއް ނަމަ އެކަމާ ކަންބޮޑުވެގެން މޮޔަވީސް ކަމަށެވެ. އެކަމަކު ފިރިމީހާ އަކީ މަސައްކަތަށް ވުރެ އާއިލާ އިސްކުރާ އަދި އާއިލާއާ އެކު ވަރަށް ގިނަ ވަގުތު ހޭދަކުރާ މީހެއް ކަމަށް ބުންޏެވެ.

"އާދީގެ ރޫޓިން އަކީ ގެއިން ސްޓޫޑިއޯ އަށް، ސްޓޫޑިއޯ އިން ގެއަށް. އަދި އަބަދު ވެސް އަހަރެން ބޭނުންވީ އެ ގޮތަށް އާއިލާ އިސްކުރާ ފިރިހެއް. އާދީ އަކީ ވަރަށް ޕްރައިވެޓް މީހަކަށްވުމަކީ އަހަންނަށް ވަރަށް ބޮޑު ނަސީބެއް." ރާނީ ބުންޏެވެ. "އަހަރެން އުފާކުރަން އަދީ ކަހަލަ ބައިވެރިއެއް ލިބުނީމަ. އޭނަ އަކީ އަހަންނާއި ދަރިފުޅާއި މުޅި އާއިލާ ދެކެ ވަރަށް ލޯބިވާ އާއިލީ މީހެއް. އަހަރެމެންގެ ލައިފް ވަރަށް ހެޕީ."

ފިލްމު ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖޭ) 1995 ގައި ޑައިރެކްޓްކޮށްގެން މަޝްހޫރުވި އާދީ އަކީ މީޑިއާތަކާ ވެސް ވަރަށް ބީރައްޓެހި މީހެކެވެ. އަދި އޭނާ މުޅިންހެން ވެސް އުޅެނީ މީޑިއާތަކަށް ފިލައިގެންނެވެ. އާދީގެ ސޫރަ ކެމެރާއެއްގެ ލެންސަށް އެރުމަކީ ވެސް ވަރަށް ނާދިރު ކަމެކެވެ. އެހެންވެ އޭނާ އަކީ އަސްލު އުޅޭ މީހެއްކަމާ ދޭތެރޭ ވެސް ބައެއް މީހުން ސުވާލު އުފައްދަ އެވެ.

އިންޑއާގެ އެންމެ ކުޅަދާނެ ޑައިރެކްޓަރުންގެ ތެރޭގައި ގުނާލެވޭ އާދީ މިހާތަނަށް ޑައިރެކްޓްކޮށްފައި ވަނީ ހަތަރު ފިލްމެވެ. އެއީ ޑީޑީއެލްޖޭގެ އިތުރުން މޮހައްބަތޭން (2000)، ރަބް ނެ ބަނާދީ ޖޯޅީ (2008) އަދި ބޭފިކުރޭ (2016) އެވެ.

އާދީގެ މަޝްހޫރު ޑައިރެކްޓަރު ޔާޝް ޗޯޕްޅާގެ ދޮށީ ފިރިހެން ދަރިފުޅެވެ.