"އޭކް ވިލަން 2" ގެ ނަން "ދޯ ވިލަން" އަށް ބަދަލުކޮށްފި

އަހުމަދު އަދްޝަން، މިހާރު

01 މެއި 2020 - 10:11

ޑައިރެކްޓަރު މޯހިތު ސޫރީ އަންނަ އަހަރު ގެނެސްދޭން ނިންމާފައިވާ ފިލްމު "އޭކް ވިލަން 2" ގެ ނަން "ދޯ ވިލަން" އަށް ބަދަލުކޮށްފައިވާ ކަމަށް ރިޕޯޓްތައް ބުނެފި އެވެ.

މި ފިލްމަކީ އެކްތާ ކަޕޫރްގެ ބާލާޖީ އާއި ބުޝަން ކުމާރު ޓީ ސީރީޒް ގުޅިގެން 2015 ގައި ގެނެސްދިން "އޭކް ވިލަން" ގެ ދެވަނަ ބައެވެ. އެކަމަކު މި ފަހަރު ފިލްމު ގެނެސްދޭން ނިންމާފައި ވަނީ މުޅިން ތަފާތު ކާސްޓަކާ އެކީގަ އެވެ.

"ދޯ ވިލަން" ގެ ކާސްޓުންނަކީ މިދިޔަ ފެބްރުއަރީގައި މޯހިތު ގެނެސްދިން "މަލަންގް" ގެ ލީޑް ރޯލް ކުޅުނު އަދިތިޔާ ރޯއި ކަޕޫރާއި ޑިޝާ ޕަޓާނީގެ އިތުރުން ޖޯން އަބްރަހަމާއި ތާރާ ސުތާރިއާ އެވެ. "އޭކް ވިލަން" ގެ މުހިއްމު ރޯލްތައް ކުޅުނީ ސިދާތު މަލްއުތުރާ އާއި ޝްރަދާ ކަޕޫރާއި ރިތޭޝް ދޭޝްމުކެވެ.

"ދޯ ވިލަން" އަކީ އަންނަ އަހަރުގެ ޖެނުއަރީ 8 ގައި ސިނަމާތަކަށް ގެންނަން ތާވަލުކޮށްފައިވާ ފިލްމެކެވެ. ނަމަވެސް ކޮރޯނާވައިރަހާ ހެދި އިންޑިއާ ލޮކްޑައުނެއްގައި އޮތުމުން ފިލްމުގެ ޝޫޓިން ފެށޭނެ އިރެއް އަދި ނޭނގެ އެވެ.