މަންތުރާ: އިރްފާން ޚާންގެ އަދި ރިލީޒްނުވާ ފިލްމެއް

ބުދަ ދުވަހު މަރުވި އިންޑިއާގެ އެކްޓަރު އިރްފާން ޚާނަކީ އިންޑިއާގެ މަދު އެކްޓަރުންގެ ތެރެއިން ބޭރުގެ ފިލްމުތަކުގައި މަސައްކަތްކޮށްގެން ބެލުންތެރިންގެ ލޯބި ހޯދި މަދު އެކްޓަރުންގެ ތެރެއިން އެކެކެވެ. އޭނާ ކުޅުނު ފާހަގަކޮށްލެވޭ އިންޓަނޭޝަނަލް ފިލްމުތަކުގެ ތެރޭގައި "ސްލަމްޑޯގް މިލިއަނާ" އާއި "ލައިފް އޮފް ޕައި" އަދި "ޖުރަސިކް ވޯލްޑް" އަކީ ވަރަށް ކާމިޔާބު ފިލްމުތަކެވެ.

އިރުފާން އެންމެ ފަހުން ކުޅުނު ފިލްމަކީ މިދިޔަ މަހު ރިލީޒްކުރި ހިންދީ ފިލްމު "އަނގްރޭޒީ މީޑިއަމް" އެވެ. އެ ފިލްމަކީ އޭނާ 2018 އިން ފެށިގެން ކެންސަރު ބައްޔާ ހަނގުރާމަކުރަމުން ކުޅުނު ފިލްމެކެވެ. އިރުފާން ވަކިވެގެން ދިޔައީ މާ އަވަހަށް ކަމަށް ގަބޫލުކުރާ މީހުން ވަރަށް ގިނަ އެވެ. އޭނާ އަކީ އިންޑިއާގައި އުފެދުނު މި ޖީލުގެ އެންމެ ހުނަރުވެރި އެއް އެކްޓަރެވެ.

އިރުފާން އުމުރުން އެންމެ 53 އަހަރުގައި ވަކިވެގެން ދިޔަ އިރު އޭނާގެ ރިލީޒްނުވާ ފިލްމެއް އަދި އެބަ އޮތެވެ. މި ވެސް އިންޓަނޭޝަނަލް ޕްރޮޖެކްޓެކެވެ. އިންޑިއާ އާއި ބޭރުގެ މަސްހުނި ކާސްޓެއް އެކުލެވޭ މި ފިލްމަކީ ސްވިޒްލެންޑްގެ ރަށްވެހިކަން އޮންނަ އިންޑިއާ ދަރިކޮޅުގެ ޑައިރެކްޓަރު އަނޫޕް ސިންގް ޑައިރެކްޓްކޮށްފައިވާ "މަންތުރާ: ދަ ސޯންގް އޮފް ސްކޯޕިއަންސް" އެވެ.

މި ފިލްމު ވަނީ 2017 ގައި ބޭއްވި 70 ވަނަ ލޮކާނޯ އިންޓަނެޝަނަލް ފިލްމު ފެސްޓިވަލްގައި ވެސް ޕްރިމިއާކޮށްފަ އެވެ. އެކަމަކު އިރުފާން މަރުވި އިރު ވެސް ފިލްމު ރިލީޒްކުރާނެ ތާރީހެއް އިއުލާންކޮށްފައެއް ނުވެ އެވެ.

"މަންތުރާ: ސޯންގް އޮފް ސްކޯޕިއަން" ގެ ކާސްޓްގައި ހިމެނެނީ މިދިޔަ ހަފުތާގައި ނެޓްފްލިކްސް އިން ސްޓްރީމްކުރަން ފެށި އެކްޓަރު ކްރިސް ހެމްސްވޯތުގެ ފިލްމު "އެކްސްޓްރެކްޝަން" ގައި ވެސް މުހިއްމު ރޯލެއް ކުޅެފައިވާ އިރާނަށް އުފަން ފްރާންސްގެ ބަތަލާ ގޮލްޝިފްތޭ ފަރަހާނީ އާއި ޓިލޮޓޯމާ ޝޯމާއި ވަހީދާ ރަހްމާނާއި ޝަޝަންކް އަރޯރާ އާއި ސާރާ އަރުޖުން އާއި ޝެފާލީ ބުޝަން އެވެ.

މި ފިލްމުގެ ޑައިރެކްޓަރު އަނޫޕާ އެކު އިރުފާން އެހެން ފިލްމެއްގައި ވެސް މަސައްކަތްކޮށްފައިވެ އެވެ. އެއީ 2013 ގެ "ގިއްސާ" އެވެ. އެ ފިލްމަކީ އެ އަހަރު ބޭއްވި 38 ވަނަ ޓޮރޮންޓޯ އިންޓަނެޝަނަލް ފިލްމު ފެސްޓިވަލް (ޓިއައިއެފްއެފް) ގައި އިންޓަނެޝަނަލް އޭޝިއަން ފިލްމުގެ އެވޯޑް ލިބުނު ފިލްމެކެވެ.