"ތަޚުތު" ބާއްވާފައި ކަރަން ޖޯހަރް އެހެން ފިލްމެއް ހަދަނީ

އެކި ސަބަބުތަކާ ހެދި ޝޫޓިން ނުފެށި އޮތް ކަރަން ޖޯހަރުގެ ތާރީހީ ލޯބީގެ ބޮޑު ފިލްމު "ތަޚުތު" ބާއްވާފައި އޭނާ އެހެން ފިލްމެއް ހަދަން ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި މި ވަގުތު ބުރަ ބޮޑު "އިންޓެންސް" ފިލްމަކަށް ވަގުތު ހުސްކުރުމުގެ ބަދަލުގައި ކަރަން ބޭނުން ވަނީ ތަންކޮޅެއް "ލައިޓްހާޓެޑް" އެއްޗެއް ހަދާށެވެ. އެގޮތުން އަލަށް ހަދާ ފިލްމުވެގެން ދާނީ އޭނާގެ އަލަތު ފިލްމު ކަމަށްވާ 1998 ގެ "ކުޗް ކުޗް ހޯތާ ހޭ" ކަހަލަ ފިލްމަކަށް ކަމަށަށާއި ފިލްމުގެ ސްޓޯރީލައިން ކަރަން ރޭވީ މި ލޮކްޑައުންގެ ތެރޭގައި ކަމަށް ބުންޏެވެ.

ބޮލީވުޑް ހަންގާމާ އިން ބުނިގޮތުގައި ފިލްމުގެ ވާހަކަ މިހާރު ރަންވީރު ސިންގް އާއި އާލިއާ ބަޓަށް ނެރޭޓްކޮށް ދިނުމުން ދެ ތަރިން ވަނީ އެ ކުޅެދޭން ވެސް އެއްބަސްވެފަ އެވެ. އެހެންވެ އޭގެ މަސައްކަތް ފަށާނީ އަންނަ އަހަރުގެ ކުރީކޮޅު ކަމަށް ބުންޏެވެ.

އިންޑިއާގައި މުގާލްގެ ރަސްކަން އޮތް ދުވަސްވަރުގެ ވާހަކައެއް ކިޔައިދޭން ހަމަޖެހިފައިވާ "ތަޚުތު" ގެ ކާސްޓްގައި ވެސް ރަންވީރާއި އާލިއާ ހިމެނެ އެވެ. އެ ފިލްމުގެ ދެން ހިމެނެކީ ކަރީނާ ކަޕޫރާއި ވިކީ ކޯޝަލާއި އަނިލް ކަޕޫރާއި ބޫމީ ޕިޑްނޭކަރްގެ އިތުރުން ޖާންވީ ކަޕޫރެވެ. "ތަޚުތު" ސިނަމާތަކަށް ގެންނަން ތާވަލުކޮށްފައި އޮތީ އަންނަ އަހަރުގެ ޑިސެމްބަރުގެ 24 ގައި ކަމަށް ވިޔަސް، އޭގެ މަސައްކަތާ ނޫޅެތީ އެ ފުރުސަތު ވަރަށް ކުޑަ އެވެ.

އާލިއާ އަކީ ކަރަން 2012 ގައި ގެނެސްދިން "ސްޓޫޑަންޓް އޮފް ދި އިޔާ" އިން ބޮލީވުޑަށް ނެރުނު ބަތަލާއެކެވެ. ކަރަންގެ އާ ފިލްމުވެގެން ދާނީ އޭނާ ޑައިރެކްޓްކުރާ ފިލްމެއްގައި ރަންވީރު މަސައްކަތްކުރާ ފުރަތަމަ ފަހަރަށެވެ.

އާލިއާ އާއި ރަންވީރު އެކީގައި ކުޅުނު ފުރަތަމަ ފިލްމަކީ މިދިޔަ އަހަރު ޒޯޔާ އަޚްތަރު ގެނެސްދިން "ގަލީ ބޯއި" އެވެ.

ކަރަން އެންމެ ފަހުން ޑައިރެކްޓްކުރި ފިލްމަކީ ރަންބީރް ކަޕޫރާއި އަނުޝްކާ ޝަރުމާ އާއި ފަވާދު ޚާނާއި އައިޝްވާރިއާ ރާއީ 2016 ގައި ކުޅުނު "އޭ ދިލް ހެ މުޝްކިލް" އެވެ.