ސާޖިދު ޚާނާ އެކު މަސައްކަތްކުރާނަން: ފީރޯޒް ނަދިއަދްވާލާ

ޖިންސީގެ ގޯނާގެ ގިނަ ތުހުމަތުތަކެއް ކުރެވި މިދިޔަ އަހަރުން ފެށިގެން ބޮލީވުޑުން އެއްފަރާތްކޮށްފައިވާ ޑައިރެކްޓަރު ސާޖިދު ޚާނާ އެކު މަސައްކަތްކުރަން ތައްޔާރަށް ހުރި ކަމަށާއި އޭނާއާ އެކު މިހާރު ވެސް ޕްރޮޖެކްޓަކަށް ތައްޔާރުވަމުން އަންނަ ކަމަށް ޕްރޮޑިއުސަރު ފިރޯޒް ނަދިއަދުވާލާ ބުނެފި އެވެ.

ބޮލީވުޑް ހަންގާމާ އަށް ދިން އިންޓަވިއުއެއްގައި "އާވާރާ ޕާގަލް ދީވާނާ" އާއި "ހީރާ ޕޭރީ" އަދި "ވެލްކަމް" ސީރީޒްގެ ޕްރޮޑިއުސަރު ބުނީ ސާޖިދާ އެކު މަސައްކަތްނުކުރަން ޖެހޭ އެއްވެސް ސަބަބެއް ނެތް ކަމަށެވެ.

"އޭނަ އަކީ އަހަރެންގެ ކޮއްކޮއެއް ކަހަލަ ދުވަސްވީ ގާތް ރައްޓެއްސެއް. އަހަރެންގެ ނެތް ސާޖިދާ އެކު މަސައްކަތްނުކުރަން ޖެހޭ އެއްވެސް ސަބަބެއް،" ކޮރިއޮގްރާފަރު/ޑައިރެކްޓަރު ފަރާ ޚާންގެ ކޮއްކޮއާ ބެހޭ ގޮތުން ފީރޯޒް ބުންޏެވެ. "އަހަރެން އޭނާ ދޫކޮށެއް ނުލާނަން. މިހާރުގެ ފެޝަނެއް ކަންނޭނގޭ މީހަކާ ބެހޭ ގޮތުން ބަޔަކު ވާހަކައެއް ދައްކާލާ އިރަށް އެ މީހަކު އެކަހަރިކޮށްލައިގެން އުޅުމަކީ. އެކަމަކު އަހަރެން އެހެނެއް ނަހަދާނަން. އަހަންނަކީ އަބަދު ވެސް ކަންކަމާ ދޭތެރޭ ޕޮޒިޓިވްކޮށް ދެކޭ، ޕޮޒިޓިވްކޮށް ވިސްނާ މީހެއް."

އޭނާ ބުނީ ސާޖިދާ އެކު މި ވަގުތު ވެސް ފިލްމަކާ ބެހޭ ގޮތުން ވާހަކަ ދެކެވެމުން އަންނަ ކަމަށެވެ. އަދި އެ ފިލްމަކީ މީޑިއާތަކުން ކުރިން ރިޕޯޓްކޮށްފައިވާ ގޮތަށް 2002 ގައި ވިކްރަމް ބަޓް ޑައިރެކްޓްކުރި "އާވާރާ ޕާގަލް ދީވާނާ" ގެ ސީކްއެލްއެއް ނޫން ކަމަށް ބުންޏެވެ.

"އެއީ ތެދެއް ނޫން. އަހަރެމެން ދެ މީހުން އަދި ފައިނަލެއް ނުކުރަން ކޯޗެއްތޯ ހަދާނީކީއެއް. އެކަމަކު ވަރަށް އަވަހަށް ސާޖިދު ހިއްސާވާ ޕްރޮޖެކްޓެއްގެ މަސައްކަތް ފަށާނެ." ފީރޯޒް ބުންޏެވެ.

މިދިޔަ އަހަރު ގިނަ އަންހެނުންތަކެއް ސާޖިދުގެ މައްޗަށް ކުރި ޖިންސީ ގޯނާގެ ތުހުމަތުތަކާ ގުޅިގެން އޭރު އޭނާ ޑައިރެކްޓްކުރަމުން ދިޔަ ފިލްމު "ހައުސްފުލް 4" ގެ ޑައިރެކްޝަނުން ވެސް ވަކިކޮށްފައިވެ އެވެ. އަދި ވަރަށް ގިނަ ތަރިން ވަނީ އެކިއެކި ތުހުމަތުތައް ކުރެވޭ މީސްމީހުންނާ އެކު މަސައްކަތްނުކުރާނެ ކަމަށް ބުނެފަ އެވެ.

ސާޖިދާ އެކު ފިލްމެއް ހަދަން އުޅޭކަން ފީރޯޒް ބުނެފައި މި ވަނީ މި ހަފުތާގެ ކުރީކޮޅު ވެސް އިތުރު އަންހެނަކު ސާޖިދަށް ޖިންސީ ގޯނާގެ ތުހުމަތުކޮށްފައި ވަނިކޮށެވެ.