އަޝުތޯޝް ގޮވަރިކާގެ އާ ފިލްމު ފަރުހާން އަޚްތަރަށް

ބޮލީވުޑްގެ އެންމެ ހުނަރުވެރި ޑައިރެކްޓަރުންގެ ތެރޭގައި ހިމެނޭ އަޝުތޯޝް ގޮރަވިކާގެ އާ ފިލްމު ފަރުހާން އަޚްތަރާ އެކު ހަދަން ނިންމައިފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި މި ފިލްމު ހަދަން ނިންމާފައި ވަނީ އަޝުތޯޝްގެ އަމިއްލަ ފިލްމު ކުންފުނި އަޝުތޯޝް ގޮވަރިކާ ޕްރޮޑަކްޝަނާއި ފަރުހާންގެ އެކްސަލް އެންޓަޓައިންމަންޓް ގުޅިގެންނެވެ. އާންމުކޮށް ޕީރިއަޑް ޑްރާމާތައް ހަދާ އަޝުތޯޝްގެ އާ ފިލްމަކީ ކޮންޓެމްޕޮރަރީ އެކްޝަން ފިލްމެކެވެ.

ބޮލީވުޑް ހަންގާމާ އިން ބުނި ގޮތުގައި އަދި ރަސްމީކޮށް ނަމެއް ހަމަނުޖައްސާ ފިލްމުގައި ފަރުހާން ކުޅޭނީ ފޮރެސްޓް ރޭންޖާއެއްގެ ރޯލެވެ. އަދި މީގެ މައިގަނޑު ޕްލޮޓަކީ ޖަންގަލިތައް ޕެޓްރޯލްކުރަން އުޅުމުގެ ތެރޭގައި ފޮރެސްޓް އޮފިސަރުން ކުރިމަތިލާ ނުރައްކާތެރި ހާދިސާތަކެވެ.

ހަންގާމާ އިން ބުނީ ފިލްމުގެ ސްކްރީންޕްލޭ ލިޔަނީ ފަރުހާންގެ ބައްޕަ ޅެންވެރިޔާ ޖާވިދު އަޚްތަރު ވެސް ހިމެނޭ ބޮޑު ޓީމަކުން ކަމަށާއި ސްކްރީންޕްލޭގެ މަސައްކަތް މި ވަގުތު ވަރަށް ބާރަށް ކުރިއަށްދާ ކަމަށެވެ. ފިލްމުގެ ޝޫޓިން ފަށަން ޕްލޭންކުރަނީ އަންނަ އަހަރުގެ މެދުތެރޭގަ އެވެ.

މި ފިލްމު ވާނީ އަޝުތޯޝްއާ އެކު ފަރުހާން މަސައްކަތްކުރާ ފުރަތަމަ ފިލްމަށެވެ. އޭނާގެ ކުރިއަށް އޮތް ފިލްމަކީ 2013 ގެ ބައޮގްރަފިކަލް ޑްރާމާ "ބާގް މިލްކާ ބާގް" އިން އެންމެ މޮޅު އެކްޓަރުގެ ނެޝަނަލް އެވޯޑް ހޯދައި ދިން އޯމް ޕްރަކާޝް މެހެރާގެ "ތޫފާން" އެވެ. މި ސްޕޯޓްސް ޑްރާމާގައި ފަރުހާން ފެނިގެން ދާނީ ބޮކްސިންތެޅުންތެރިއެއްގެ ރޯލުންނެވެ. ފިލްމު އަންނަ އަހަރަށް ފަސްކޮށްފައިވާ އިރު އޭނާ އެންމެ ފަހުން ފެނިފައި ވަނީ މިދިޔަ އަހަރު ރިލީޒްކުރި "ދަ ސްކައި އިޒް ޕިންކް" އިންނެވެ.

އާމިރު ޚާންގެ "ލަގާން" އާއި ޝާހްރުކް ޚާންގެ "ސްވަދޭސް" ގެ އިތުރުން ރިތިކް ރޯޝަންގެ "މޮހެންޖޮ ދާރޯ" ގެނެސްދިން އަޝުތޯޝްގެ އެންމެ ފަހުގެ ފިލްމަކީ މިދިޔަ އަހަރު އަރުޖުން ކަޕޫރާއި ސަންޖޭ ދަތާ އެކު ގެނެސްދިން "ޕާނިޕަތު" އެވެ.