ރިތިކާއި ސިދާތުގެ އާ ފިލްމަކީ "ފައިޓާ"

މިދިޔަ އަހަރު "ވޯ" ގެނެސްދިން ޑައިރެކްޓަރު ސިދާތު އާނަންދާ އެކު ރިތިކް ރޯޝަން "ފައިޓާ" ކިޔާ އޭރިއަލް އެކްޝަން ތުރިލާއެއްގައި މަސައްކަތްކުރަން ހަމަޖެހިފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނިގޮތުގައި ފިލްމުގެ ވާހަކަ ރިތިކަށް ނެރޭޓްކޮށް ދިނުމާ އެކު ވަގުތުން އޭނާ ވަނީ މިއަށް ފެހި ސިގްނަލް ދީފަ އެވެ. "ފައިޓާ" ގެ މައިގަނޑު ޕްލޮޓަކީ ފައިޓަ ޖެޓްތަކުގެ ހަރަކާތްތަކެވެ.

ބޮލީވުޑް ހަންގާމާ އިން ބުނި ގޮތުގައި މި ފިލްމުގެ މަސައްކަތް ފަށާނެ ކަމަށް ބެލެވެނީ 2022 ގެ ތެރޭގަ އެވެ. ސިދާތު މި ވަގުތު އަންނަނީ ޝާހްރުކާއި ދީޕިކާ ޕަދްކޯނާއި ޖޯން އަބްރަހަމް މުހިއްމު ރޯލްތައް ކުޅޭ އެކްޝަން ތުރިލާ "ޕަތާން" ގެ މަސައްކަތްކުރަމުންނެވެ. މިދިޔަ މަހުގެ ތެރޭގައި ޝޫޓިން ފެށި އެ ފިލްމުގެ ޝޫޓިން ނިންމައިލެވޭނެ ކަމަށް ބެލެވެނީ އަންނަ އަހަރުގެ ޖުލައިގަ އެވެ. އަދި ފިލްމު ސިނަމާތަކަށް އަންނާނީ އަންނަ އަހަރުގެ ނޮވެމްބަރު މަހުގެ ތެރޭގަ އެވެ.

ސިދާތުގެ "ފައިޓާ" ކިޔާ ފިލްމަކަށް ރިތިކް ރުހުން ދީފައިވާ އިރު، މިދިޔަ އަހަރު ގެނެސްދިން "ވޯ" އާއި "ސުޕަ 30" އަށް ފަހު، އޭނާ ކުޅޭނެ އެއްވެސް ފިލްމެއް މިހާތަނަށް ރަސްމީކޮށް އިއުލާންކޮށްފައެއް ނުވެ އެވެ. އެކަމަކު "ވޯ" ގެ ބޮޑު ކާމިޔާބީއާ ގުޅިގެން އޭތި ފްރެންޗައިޒަކަށް ހަދަން ވަނީ ނިންމައިފަ އެވެ.

ރިތިކްގެ ކުރިއަށް ހުރި ޕްރޮޖެކްޓްތަކުގެ ތެރޭގައި އޭނާގެ ބައްޕަ ރާކޭޝް ރޯޝަން ޑައިރެކްޓްކުރާ ސުޕަހީރޯ ފްރެންޗައިޒް "ކްރިޝް" ގެ ހަތަރު ވަނަ ފިލްމު ހިމެނެ އެވެ. ދާދި ފަހުން މީޑިއާތަކުން ރިޕޯޓްކޮށްފައިވާ ގޮތުގައި ރިތިކް ވަނީ ހޮލީވުޑްގެ ސްޕައި ތުރިލާއަކަށް އޮޑިޝަން ވެސް ހަދައިފަ އެވެ. އެކަމަކު އެކަމާ ބެހޭ ރަސްމީ އެއްވެސް ވާހަކައެއް އަދިއެއް ނެތެވެ.

"ވޯ" ގެ ކުރިން ރިތިކް ވަނީ ސިދާތާ އެކު 2014 ގެ "ބޭންގް ބޭންގް" ގައި ވެސް މަސައްކަތްކޮށްފަ އެވެ.