ބަންސާލީގެ "ހީރާ މަންޑީ" ހަދާނީ ނެޓްފްްލިކްސް އަށް؟

"ހީރާ މަންޑީ" ކިޔާ ބޮޑު ފިލްމެއް ހަދަން ޑައިރެކްޓަރު ބަންސާލީ އުޅޭ ކަމަށް ބުނާތާ މިހާރު 13 ވަރަކަށް އަހަރު ވެދާނެ އެވެ. މި ފިލްމާ ބެހޭ އެންމެ ފަހުގެ ޚަބަރުތައް މިހާރު ބުނާ ގޮތުން ފިލްމު ހަދަން ނިންމާފައި ވަނީ ނެޓްފްލިކްސްއާ ގުޅިގެން، އެ ޕްލެޓްފޯމަށް ގެނެސްދޭ ފިލްމެއްގެ ގޮތުގަ އެވެ. އެކަމަކު ފިލްމު ޑައިރެކްޓްކުރާނީ ބަންސާލީއެއް ނޫނެވެ.

ބޮލީވުޑް ހަންގާމާ އިން ބުނި ގޮތުގައި ހަށިވިއްކައިގެން އާމްދަނީ ހޯދަން އުޅުނު އަންހެނުންތަކެގެ ދިރިއުޅުމުގެ ވާހަކަ ކިޔައިދޭ ފިލްމު ބަންސާލީ ޕްރޮޑިއުސްކުރާ ފިލްމެއްގެ ގޮތުގައި، ޑައިރެކްޓްކުރާނީ ވިބޫ ޕޫރީ އެވެ.

އޭނާ އަކީ ބަންސާލީ 2015 ގައި ޕްރޮޑިއުސްކުރި އަޔޫޝްމަން ކްރާނާގެ ފިލްމު "ހަވާއީޒާދާ" ޑައިރެކްޓްކުރުމުގެ އިތުރުން ރިތިކް ރޯޝަނާއި އައިޝްވާރިއާ ރާއީ 2010 ގައި ކުޅުނު ބަންސާލީ ޑައިރެކްޓްކުރި "ގުޒާރިޝް" ޑައިލޮގް ރައިޓަރެވެ.

ހަންގާމާ އިން ބުނި ގޮތުގައި ބަންސާލީ ގެނެސްދޭ ފިލްމުތަކުގެ ފާޑުވެރިކަމާ އެއްގޮތަށް ވަރަށް އުންމީދީ ފިލްމެއްގެ ގޮތުގައި "ހީރާ މަންޑީ" ގެނެސްދޭން ތައްޔާރީތައް ވަމުން އަންނަ އިރު، އަންނަ އަހަރުގެ ކުރީކޮޅު ފިލްމުގެ ޝޫޓިން ފަށާނެ އެވެ. އަދި އެކަމުގެ ތައްޔާރީތައް ވިބޫ މިހާރު އަންނަނީ ވަމުންނެވެ.

ނަމަވެސް "ހީރާ މަންޑީ" ގެ ކާސްޓާ ބެހޭ ގޮތުން މި ދަނޑިވަޅުގައި އަދި އެއްވެސް ވާހަކައެއް ނުދެކެވެ އެވެ.

ބަންސާލީ މި ވަގުތު އަންނަނީ އޭނާ ޑައިރެކްޓްކުރާ "ގަންގްބާއީ ކަތިއަވާޅީ" ގެ މަސައްކަތްކުރަމުންނެވެ. މިއީ އާލިއާ ބަޓް ބަތަލާގެ ރޯލް ކުޅޭ ފިލްމެކެވެ.

"ރާން-ލީލާ" އާއި "ބަޖިރާއޯ މަސްތާނީ" އާއި "ޕަދުމާވަތު" ގެ އިތުރުން "ހަމް ދިލް ދޭ ޗުކޭ ސަނަމް" ފަދަ ރީތި، ކާމިޔާބު ފިލްމުތައް ގެނެސްދިން ޑައިރެކްޓަރު ގެނެސްދޭން ހަމަޖެހިފައިވާ ފިލްމުތަކުގެ ތެރޭގައި "ބައިޖޫ ބަވްރާ" ވެސް ހިމެނެ އެވެ. "ގަންގްބާއީ" އަށް ފަހު އޭނާ ޑައިރެކްޓްކުރާނީ އެ ފިލްމެވެ.