ދެހާސް ނަވާރަ ވަނަ އަހަރު ރިލީޒްކުރި ކަންގަނާ ރަނާވަތުގެ ތާރީހީ ފިލްމު "މަނިކަރްނިކާ" އަކީ އިންޑިއާގެ ވަރުގަދަ އަންހެން ހަނގުރާމަވެރިންގެ ވާހަކަ ކިޔައިދޭ ފްރެންޗައިޒަކަށް ހަދަން ނިންމައި، މީގެ ދެވަނަ ބައި އިއުލާންކޮށްފި އެވެ.
ފުރަތަމަ ފިލްމު ޖާންސީގެ ރާނީ ލަކްޝަމީބާއީ އަށް ބިނާކޮށް "މަނިކަރްނިކާ: ދި ކްއީން އޮފް ޖާންސީ" ގެ ނަމުގައި އުފެއްދުމަށް ފަހު ދެވަނަ ބައި އިއުލާންކުރީ "މަނިކަރްނިކާ: ދަ ލެޖެންޑް އޮފް ޑިއްޑާ" ގެ ނަމުގަ އެވެ.
އެ ފިލްމުގެ ވާހަކަ ކަންގަނާ ވަނީ ހިންދީ ބަހުން ކުރި ޓްވީޓެއްގައި ވެސް ޔަގީންކޮށް ދީފަ އެވެ. "މަނިކަރްނިކާ: ދަ ލެޖެންޑް އޮފް ޑިއްޑާ" އަކީ ކަޝްމީރަށް ނިސްބަތްވާ 12 ވަނަ ގަރުނުގެ ކުރީގެ ރާނީ ޑިއްޑާގެ ވާހަކަ ކިޔައިދޭނެ ފިލްމެކެވެ.
މީޑިއާތަކުން ބުނީ "މަނިކަރްނިކާ" ފްރެންޗައިޒް ގެނެސްދޭނީ ކަންގަނާ އާއި ޕްރޮޑިއުސަރު ކަމަލް ޖެއިން ގުޅިގެން ކަމަށެވެ. އޭނާ އަކީ ފުރަތަމަ ބައިގެ ވެސް ޕްރޮޑިއުސަރެކެވެ. ނަމަވެސް ފިލްމާ ބެހޭ މާ ގިނަ ތަފުސީލުތަކެއް އަދި ހާމައެއްނުކުރެ އެވެ.
ކަންގަނާ ޓައިޓްލް ރޯލު ކުޅުނު "މަނިކަރްނިކާ: ދި ކްއީން އޮފް ޖާންސީ" އަކީ ކަންގަނާ ޑައިރެކްޝަނަށް ވެސް ނުކުތް ފިލްމެވެ. އެ ފިލްމު ޝޫޓްކުރަމުން ދިޔަ ދުވަސްވަރު ޑައިރެކްޓަރު ކްރިޝްގެ މަސައްކަތުގެ ތެރެއަށް ކަންގަނާ އަތްބާނައި، މަސައްކަތްތަކަށް ފާޑުކިޔަން ފެށުމުން މައްސަލަ ވަރަށް ބޮޑަށް ހޫނުވެ، ކޯޅުންތަކަށް ދާން ޖެހުމުން ކްރިޝް ވަނީ ވަކި ހިސާބަކުން ފިލްމު ދޫކޮށްލައިފަ އެވެ. އެހެންވެ އެ ނިންމައި ސްކްރީނަށް ގެނައީ ކަންގަނާގެ ޑައިރެކްޝަންގެ ދަށުންނެވެ.
ނަމަވެސް "މަނިކަރްނިކާ: ދަ ލެޖެންޑް އޮފް ޑިއްޑާ" އަކީ ކަންގަނާގެ ޑައިރެކްޓްކުރާނެ ފިލްމެއް ކަމެއް އަދި ކަށަވަރެއް ނުވެ އެވެ.
ގާތްގަނޑަކަށް 125 ކްރޯޑް ރުޕީސް (17.11 މިލިއަން ޑޮލަރު) ގެ ބަޖެޓަކުން ހެދި "މަނިކަރްނިކާ: ދި ކްއީން އޮފް ޖާންސީ" އަކީ ބޮކްސް އޮފީހުގައި 152 ކްރޯޑް ރުޕީސް (20.81 މިލިއަން ޑޮލަރު) ގެ އާމްދަނީއެއް ލިބުނު ފިލްމެކެވެ.
އިންޑިއާގެ އަންހެން ހަނގުރާމަވެރިންގެ ވާހަކަ ފިލްމު ސީރީޒެއްގެ ގޮތުގައި ގެނެސްދޭން ކަންގަނާ ނިންމި އިރު، އަޖޭ ދޭވްގަން ވެސް ވަނީ މިފަދަ މަސައްކަތެއް ފަށައިފަ އެވެ. އޭނާ ގެނެސްދޭން ފަށާފައިވާ ހަނގުރާމަވެރިންގެ ފުރަތަމަ ފިލްމަކީ މިދިޔަ އަހަރު ގެނެސްދިން "ތާނާޖީ: ދި އަންސަންގް ވޮރިއާ" އެވެ. އަޖޭގެ މި ސީރީޒް ކުރިއަށް ގެންދާނީ "ދި އަންސަންގް ވޮރިއާ" ގެ ނަމުގަ އެވެ.