ވަރުން އާއި ނަތާޝާގެ ކައިވެނި މި މަހުގެ 24 ގައި

ބޮލީވުޑްގައި މިހާރު އެ ކައިވެންޏެއްގެ ވާހަކަ ދެކެވޭތާ ތިން އަހަރެއްހާ ދުވަސްވެފައިވާ ވަރުން ދަވަން އާއި ލޯބިވެރިޔާ ނަތާޝާ ދަލާލް މި މަހުގެ 24 ގައި ކައިވެނިކުރާނެ ކަމަށް މީޑިއާތަކުން ބުނެފި އެވެ.

އެންގޭޖް ވެސް ވެފައިވާކަން ދާދި ފަހުން ކަށަވަރުކޮށްދިން އަދި ކޮންމެ ވަގުތަކު ވެސް ކައިވެންޏަށް ތައްޔާރަށް ހުރި ކަމަށް ބުނެފައިވާ ވަރުން މި މަހުގެ 24 ގައި ކައިވެނިކުރާ ވާހަކަ އިންޑިއާގެ ވަރަށް ގިނަ ނޫސްތަކުން ގެނެސްދީފައި ވަނީ ވަރަށް ކަށަވަރު ޚަބަރެއްގެ ގޮތުގަ އެވެ.

ގިނަ މީޑިއާތަކުން ބުނީ ވަރުން އާއި ނަތާޝާގެ ކައިވެނީގެ ހަފުލާ އޮންނާނީ އަލީބާގްގެ ރިސޯޓެއްގައި ކަމަށާއި އެ ހަފުލާ އަށް އެތަން އެއްކޮށް ނަގާފައިވާ ކަމަށެވެ. ތިން ދުވަހުގެ މުއްދަތަށް ދެމިގެންދާ ގޮތަށް ބާއްވާ ކައިވެނީގެ ކަންކަން އޮންނާނީ ކޮވިޑް-19 އަށް އަޅަން ޖެހޭ ރައްކާތެރިކަމުގެ ހުރިހާ ފިޔަވަޅުތަކެއް ވެސް އަޅައިގެންނެވެ.

ކައިވެނީގެ ހަފުލާތައް ކުރިއަށްދާނީ މި މަހުގެ 22، 23 އަދި 24 ގަ އެވެ.

މީޑިއާތަކުން ބުނެފައިވާ ގޮތުގައި ވަރުން އާއި ނަތާޝާގެ އާއިލާގެ މީހުންގެ އިތުރަށް ކައިވެނީގެ ހަފުލާގައި ހާއްސަ މެހުމާނުންގެ ގޮތުގައި ބައިވެރިވާނީ 40-50 ވަރަކަށް މީހުންނެވެ. އަދި ކައިވެނީގެ ވާހަކަ މި ހަފުތާގެ ކުރީކޮޅު ވަރުންގެ އާއިލާ އިން ރަސްމީކޮށް އިއުލާންކުރާނެ ކަމަށް ވެސް މިޑިއާތަކުން ބުނެ އެވެ.

ބޮލީވުޑްގެ އެންމެ ކާމިޔާބު އެކްޓަރުންގެ ތެރޭގައި ހިމެނޭ ވަރުން އަކީ މަޝްހޫރު ޑައިރެކްޓަރު ޑޭވިޑް ދަވަންގެ ދެ ފިރިހެން ދަރިންގެ ތެރެއިން ހަގު ދަރިފުޅެވެ. ދެބަފައިން އެންމެ ފަހުން އެކީގައި ގެނެސްދިން ފިލްމަކީ ޑިސެމްބަރުގައި އެމެޒޯން ޕްރައިމް ވީޑިއޯ އިން ޕްރިމިއާކުރި "ކޫލީ ނަމްބަރު 1" އެވެ.

ވަރުން އާއި ނަތާޝާ ލޯބީގެ ގޮތުން ގުޅިގެން އުޅޭތާ ގިނަ ދުވަސްތަކެއްވެފައިވާ އިރު އެ ދެ މީހުންނަކީ ކިޔަވަން އުޅުނު ދުވަސްވަރުން ފެށިގެން ގާތް ދެ ރައްޓެހިންނެވެ.

ފިލްމީ ދާއިރާއާ ވަރަށް ދުރުގައި އުޅޭ ނަތާޝާ އަކީ ފެޝަން ޑިޒައިނިން ކިޔަވާފައިވާ ކުއްޖެކެވެ.

ވަރުންގެ ކައިވެނިވެގެން ދާނީ މި އަހަރު ބޮލީވުޑުން ފެނިގެންދާނެ ފުރަތަމަ ބޮޑު ކައިވެންޏަށެވެ. މިއީ ގިނަ ބަޔަކު 2018 އިން ފެށިގެން އިންތިޒާރުކުރަމުން އަންނަ ކަމެކެވެ.