ކަޕިލް ޝަރުމާ ޝޯ އަށް އަންނާނީ ކުޑަ މެދުކެނޑުމެއް

ބެލުންތެރިންގެ މެދުގައި ވަރަށް މަގުބޫލު ސޮނީ ޓީވީގެ "ދަ ކަޕިލް ޝަރުމާ ޝޯ" އަންނަ މަހުގެ ތެރޭގައި މެދުކަނޑާލަން އުޅޭކަން ޝޯގެ ހޯސްޓް ކަޕިލް ކަށަވަރުކޮށް ދީފި އެވެ. އެކަމަކު އޭނާ ބުނީ އެއީ ވަރަށް ކުޑަ މެދުކެނޑުމެއް ކަމަށެވެ.

ޝޯ މެދުކަނޑާލަނީތޯ ފޭނަކު ޓްވިޓާގައި ކުރި ސުވާލަކަށް ޖަވާބުދެމުން ކަޕިލް ބުނީ "ކުޑަކުޑަ ބްރޭކެއް ނަގަނީ" ކަމަށެވެ. އަދި އެއީ ކީއްވެތޯ އެހެން މީހަކު އެހުމުން ކަޕިލް ބުނީ ދެވަނަ ދަރިޔަކު ލިބެން އުޅޭތީ އާއިލާގެ ގާތުގައި ހުންނަން ވަރަށް ބޮޑަށް ވަގުތު ބޭނުންވާ ކަމަށެވެ.

މީޑިއާތަކުން ކުރިން ރިޕޯޓްކޮށްފައިވާ ގޮތުގައި އަންނަ މަހުގެ ތެރޭގައި "ކަޕިލް ޝަރުމާ ޝޯ" އަށް ގެންނަ ބްރޭކަށް ފަހު ޝޯ އަލުން ފަށާ އިރު ކުދިކުދި ބައެއް ބަދަލުތައް ވެސް ފެންނާނެ އެވެ. އެކަމަކު އެކަމާ ބެހޭ އެއްވެސް ވާހަކައެއް ކަޕިލް ނުދައްކަ އެވެ.

މި ޝޯ އަލުން ސޮނީން ގެނެސްދޭން ފެށީ ހުއްޓާލާފައި އޮންނަތާ އަހަރެއްހާ ދުވަސްފަހުން 2018 ގެ ޑިސެމްބަރު މަހުގެ ފަހުކޮޅު އެވެ. އޭރު ޝޯ ފެށީ އެ މަހުގެ 12 ގައި ކަޕިލް ކައިވެނި ކުރުމަށް ފަހު އެވެ.

ކަޕިލްގެ ޝޯ ވަގުތީ ގޮތުން ކުޑަ ދުވަސްކޮޅަކަށް މެދުކަނޑާލާކަން ޔަގީންކޮށް ދިން އިރު، އޭނާ ދާދި ފަހުން ވަނީ ނެޓްފްލިކްސްގެ ޝޯއަކަށް ސޮއިކޮށްފަ އެވެ. އެކަން ރަސްމީކޮށް އިއުލާންކޮށްފައި އޮތަސް އެ ޝޯއާ ބެހޭ އެއްވެސް ތަފުސީލެއް އަދި ހާމައެއްނުކުރެ އެވެ.

"ދަ ކަޕިލް ޝަރުމާ ޝޯ" އަކީ ހޮނިހިރާއި އާދީއްތަ ދުވަހުގެ ރޭ ރާއްޖެ ގަޑިން 9:00 ގައި ސޮނީން ގެނެސްދޭ ޝޯއެކެވެ.