ބޮލީވުޑްގެ ބަތަލާ ކަންގަނާ ރަނާވަތު ޕްރޮޑިއުސަރެއްގެ ގޮތުގައި ހިއްސާވާ ފިލްމެއްގައި އޭނާ އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ރޯލު ކުޅޭނެ ކަމަށް ބުނެފި އެވެ.
ނަން އަދި އިއުލާން ނުކުރާ މި ފިލްމާ ބެހޭ ގޮތުން އޭނާ މީޑިއާތަކަށް ބުނީ އިންޑިއާގައި މިހާތަނަށް ބޮޑުވަޒީރުކަން ކުރެއްވި ހަމައެކަނި އަންހެނާގެ ޝަރަފު ލިބުނު އިންދިރާގެ ރޯލު ކުޅޭނީ އޭނާގެ ވާހަކަ ކިޔައިދޭ ބައޮގްރަފިކަލް ޑްރާމާއެއްގައި ނޫން ކަމަށެވެ. ކަންގަނާ ބުނި ގޮތުގައި މި ފިލްމަކީ އިންދިރާގެ ދައުރުގައި ހިނގާފައިވާ މުހިއްމު ހާދިސާތަކެއްގެ މައްޗަށް ބިނާކޮށް ގެނެސްދޭ ޕީރިއަޑް ޕޮލިޓިކަލް ޑްރާމާއެކެވެ. އެގޮތުން މީގައި އިންދިރާގެ ދައުރުގައި ގައުމުގައި އިއުލާންކުރި ކުއްލި ހާލަތާއި އޮޕަރޭޝަން ބްލޫގެ ސްޓާގެ ކަންކަން ފަދަ ހާދިސާތައް ފިލްމުގައި ދައްކުވައި ދޭނެ އެވެ.
އިންދިރާ ވަނީ މަގާމުގައި ހުންނަވިކޮށް 1984 ގައި އަވަހާރަކޮށްލައިފަ އެވެ. އެކަމަނާ އަކީ ބޮޑުވަޒީރުގެ މަގާމުގައި ހުންނަވަނިކޮށް 1991 ގައި އަވަހާރަކޮށް ރަޖީވް ގާންދީގެ މަންމާފުޅެވެ.
ކަންގަނާ ބުނީ ފިލްމު ހަދަން ނިންމާފައި ވަނީ އިންދިރާގެ ދައުރާ ބެހޭ ގޮތުން ލިޔެފައިވާ ފޮތެއްގެ މައްޗަށް ބިނާކޮށެވެ. އެކަމަކު އެ ފޮތުގެ ނަމެއް ހާމައެއްނުކުރެ އެވެ. ފިލްމުގެ ސްކްރީންޕްލޭ ލިޔެ، ޑައިރެކްޓްކުރާނީ ކަންގަނާ 2014 ގައި ކުޅުނު ފިލްމު "ރިވޯލްވާ ރާނީ" ގެ ޑައިރެކްޓަރ ސައި ކަބީރެވެ.
"މި ފިލްމު ވަރަށް ގިނަ މަޝްހޫރު ތަރިންތަކެއް ވެސް ފެންނާނެ. އަހަރެން ފިލްމުގައި ފެންނާނީ އިންޑިއާގެ ސިޔާސީ ދާއިރާ އިން މިހާތަނަށް ފެނުނު އެންމެ ނުފޫޒު ގަދަ އަންހެނާގެ ގޮތުގައި،" ކަންގަނާ ބުންޏެވެ. "މިފަދަ ފިލްމެއް ހަދަން ނިންމީ މިހާރުގެ ޖީލަށް އިންޑިއާގެ ސިޔާސީ މަސްރަހުގެ ވާހަކަތަކެއް ގެނެސް ދިނުމުގެ ބޭނުމުގައި."
ނަމަވެސް ފިލްމުގެ މަސައްކަތް ފަށާނެ އިރަކާއި ބެލުންތެރިންނަށް ފިލްމު ގެނެސްދޭނެ އިރެއް އަދި އިއުލާނެއް ނުކުރެ އެވެ. އެކަމަކު ކަންގަނާ އާއި ކަބީރާ ދެމެދު އަންނަނީ ފިލްމާ ބެހޭ ގޮތުން ގިނަ މަޝްވަރާތަކެއް ކުރެވެމުންނެވެ.
އިންޑިއާގެ ޓަމިލް ނާޑޫ ސްޓޭޓްގެ ކުރީގެ ޗީފް މިނިސްޓަރު ޖަޔަލަލީތާގެ ބައޮގްރަފިކަލް ޑްރާމާ "ތަލައިވީ" ގެ މަސައްކަތް އެއްކޮށް ނިންމައިލުމަށް ފަހު، ކަންގަނާ މި ވަގުތު އަންނަނީ ބޯޕާލްގައި އެކްޝަން ތުރިލާ "ދާޅަކް" ގެ މަސައްކަތްކުރަމުންނެވެ. މި ފިލްމު ނިންމާފައި ދެން އޭނާ ޝޫޓިން ފަށާނީ ވައިގެ އަސްކަރީ އޮފިސަރެއްގެ ރޯލު ކުޅޭ "ތޭޖާސް" ގެ މަސައްކަތެވެ.
ކަންގަނާ އިއުލާންކޮށްފައިވާ ޕްރޮޖެކްޓްތަކުގެ ތެރޭގައި 2019 ގައި ގެނެސްދިން "މަނިކަރްނިކާ: ދި ކްއީން އޮފް ޖާންސީ" ސީރީޒްގެ ދެވަނަ ފިލްމު "މަނިކަރްނިކާ: ދަ ލެޖެންޑް އޮފް ޑިއްޑާ" ގެ އިތުރުން ބާބްރީ މިސްކިތާއި އަޔޯދިއާ ފައްޅީގެ މައްސަލަގަނޑަށް ހަދާ ފިލްމެއް ހިމެނެ އެވެ.
ތިން ނެޝަނަލް އެވޯޑް ހޯދާފައިވާ ކަންގަނާ އެންމެ ފަހުން ފެނިފައި ވަނީ މިދިޔަ އަހަރުގެ ކުރީކޮޅު ރިލީޒްކުރި "ޕަންގާ" އިންނެވެ.
