ޑައިރެކްޓަރު އަމްޖަދު އިބްރާހީމް (އަމްޖޭ)ގެ ފިލްމް "ގިލަން" އަކީ އޭނާ އަށް ވަރަށް ހާއްސަ ފިލްމެކެވެ. ފިލްމުގެ މަސައްކަތުގެ ބޮޑު ބައެއް މިދިޔަ އަހަރު ވަނީ ނިންމައިފަ އެވެ. އެ ފިލްމަކީ ކުރިން މިދިޔަ އަހަރު ރިލީޒް ކުރަން ވެސް ޕްލޭން ކުރި ފިލްމެކެވެ.
"ގިލަން" އަކީ އަމްޖޭގެ 50 ވަނަ ޑައިރެކްޝަނެވެ. އެހެންވެ ކުރިން ނިންމީ މިދިޔަ އަހަރު ފާހަގަ ކުރި ރާއްޖޭގެ މިނިވަން 50 އާ ދިމާކޮށް އެ ފިލްމު ނެރޭށެވެ. އެކަމަކު ކަންތައް ދިމާވި ގޮތުން އެކަން ކުރެވޭ ގޮތެއް ނުވި އެވެ.
އަމްޖޭ ބުނީ "މި ފިލްމު ރިލީޒް ކުރާނީ ވަރަށް ހާއްސަ ދުވަހެއްގައި" ކަމަށާއި މި އަހަރު ސިނަމާ އަށް އައުން އެކަށީގެންވާ ކަމަށެވެ. އަދި އެ ފިލްމް ރިލީޒް ކުރާ ދުވަހަކީ އޭނާގެ ހަޔާތަށް އަންނާނެ ވަރަށް ހާއްސަ އުފާވެރި ދުވަހަކަށް ވާނެ ކަމަށް ބުންޏެވެ.
"މި އަހަރު ފިލްމު ފެނުމަކީ ވެސް ހަމަ ވެދާނެ ކަމެއް،" އަމްޖޭ
"މި ފިލްމަކީ އަހަންނަށް ވަރަށް ހާއްސަ ފިލްމެއް. އެހެންވީމާ ޔަގީނުން ވެސް ފިލްމު އަޅުވާނީ ވަރަށް ހާއްސަ ތާރީހެއްގައި. ވަރަށް ހާއްސަ ކަންތައްތަކަކާ އެކު." ފިލްމު އަޅުވާނީ ކޮން އިރަކުތޯ އެހުމުން އަމްޖޭ ދިން ޖަވާބަކީ މިއެވެ.
"ގިލަން" ރިލީޒް ކުރާނެ ތާރީހެއް ނިންމައިފައި ނެތަސް، އަމްޖޭ ވަނީ ފިލްމު މި އަހަރު ފެންނާނެ ކަމުގެ އިޝާރާތެއް ވެސް ދީފަ އެވެ.
"މިހާރު އަހަރެން ޑައިރެކްޓް ކުރަމުން މި އަންނަ "ދޭތީ އަނިޔާ" ނިންމާލާފައި ގިލަންގައި ނުނިމި ހުރި މަސައްކަތްތައް ނިންމަން ފަށާނަން،" އޭނާ ބުންޏެވެ. "އެހެންވީމާ މި އަހަރު ފިލްމު ފެނުމަކީ ވެސް ހަމަ ވެދާނެ ކަމެއް."
"ގިލަން" އަކީ 1997 ވަނަ އަހަރު ވާހަކަ ލިއުންތެރިޔާ މުހައްމަދު ގާސިމް "މިއަދު" ނޫހުގައި ހަމަ އެ ނަމުގައި ޝާއިއު ކުރި ވާހަކަ އަށް ބިނާކޮށް ހަދާފައިވާ ފިލްމެެކެވެ. އާއިލާއެއްގެ ތެރޭގައި ހިނގާ ހާދިސާތަކެއް ދައްކުވައިދޭ ވާހަކަ ފިލްމެއްގެ ގޮތުގައި ގެނެސްދޭ އިރު، ވާހަކަ އަށް ވަނީ ބައެއް ބަދަލުތައް ވެސް ގެނެސްފަ އެވެ.
އަމްޖޭ ބުނީ "ގިލަން" އާންމުންނަށް ކަމުދާނެކަމާ ދޭތެރޭ އެއްވެސް ޝައްކެއް ނެތް ކަމަށެވެ. އެ ފިލްމުގައި ލީޑް ރޯލް ކުޅެފައި ވަނީ ޔޫސުފް ޝަފީއު (ޔޫއްޕެ) އާއި މަރިޔަމް ނޫރާ، އަލީ އާޒިމް (ދޮން އައްޔަ) އަދި ފާތުމަތު އާޒިފާ (އަޒޫ) އެވެ.
ފިލްމުގެ އިތުރު ކާސްޓުންގެ ތެރޭގައި މުހައްމަދު ރަޝީދު (ދަރާ)، މަރިޔަމް ޝަކީލާ އަދި އަހުމަދު ސައީދު ވެސް ހިމެނެ އެވެ.