ޝާހްރުކްގެ "ޑާލިންސް" ހަދަނީ އާލިއާއާ ގުޅިގެން

ޝާހްރުކް ޚާންގެ ފިލްމު ކުންފުނި ރެޑް ޗިލީޒް އެންޓައިންމަންޓަށް ބަތަލާ އާލިއާ ބަޓް ސޮއިކުރި ފިލްމު "ޑާލިންސް" އާލިއާގެ އަމިއްލަ ފިލްމު ކުންފުނި ސަންޝައިން ޕްރޮޑަކްޝަންސްއާ ގުޅިގެން ގެނެސްދޭ ގޮތަށް ނިންމައި ފިލްމުގެ ޓައިޓްލް ލޯގޯ ވެސް ދައްކާލައިފި އެވެ.

މި މަހު ޝޫޓިން ފަށާ މި ފިލްމަކީ ސްކްރީން ރައިޓަރު ޖަސްމީތު ކޭ ރީން ލިޔެ، ޑައިރެކްޓްކުރާ ފިލްމެކެވެ. މީޑިއާތަކުން ކުރިން ވެސް ރިޕޯޓްކޮށްފައިވާ ގޮތަށް "ޑާލިންސް" ގެ ލީޑް ކާސްޓްގައި އާލިއާއާ އެކު ހިމެނެނީ ވިޖޭ ވަރުމާ އާއި ރޯހަން މެތިއުގެ އިތުރުން ޝެފާލީ ޝާހެވެ.

ވިޖޭ އަކީ އާލިއާ އާއި ރަންވީރު ސިންގްގެ 2019 ގެ ފިލްމު "ގަލީ ބޯއި" ގެ ވެސް ރޯލެއް ކުޅުނު އެކްޓަރެކެވެ.

ޝާހްރުކްގެ "ޑާލިންސް" އަށް ސޮއިކުރި އިރު އާލިއާ 2012 ގައި ބޮލީވުޑަށް ތައާރަފުވި ކަރަން ޖޯހަރްގެ "ސްޓޫޑަންޓް އޮފް ދި އިޔާ" އަކީ ވެސް ޝާހްރުކްގެ ރެޑް ޗިލީޒް އިން ހިއްސާވެގެން ހެދި ފިލްމެކެވެ. އަދި ޝާހްރުކާއި އާލިއާ އެކީގައި ކުޅުނު 2016 ގެ "ޑިއާ ޒިންދަގީ" އަކީ ވެސް ރެޑް ޗިލީޒްގެ ފިލްމެކެވެ.

އެ ސްޓޫޑިއޯ އިން މި އަހަރު ގެނެސްދޭނެ އެއް ފިލްމަކީ އަބީޝެކް ބައްޗަންގެ "ބޮބް ވިސްވާސް" އެވެ. އަދި ބޮބީ ޑިއޯލް އާއި ސާނިއާ މަލްއުތުރާގެ "ލަވް ހޯސްޓެލް" އަކީ ވެސް ޝާހްރުކް ޕްރޮޑިއުސްކުރާ ފިލްމެކެވެ.

ދާދި ފަހުން މީޑިއާތަކުން ބުނިގޮތުގައި ކާތިކް އާރިޔަންގެ "ފްރެޑީ" އާއި އަރުޖުން ކަޕޫރް ވެސް ރެޑް ޗިލީޒްގެ ފިލްމަކަށް ސޮއިކޮށްފައިވެ އެވެ.

އެ ސްޓޫޑިއޯ އިން މި ފަހުން ގެނެސްދިން އެންމެ ކާމިޔާބު ފިލްމަކީ އަމީތާބް ބައްޗަނާއި ތާޕްސީ ޕައްނޫގެ 2019 ގެ "ބަދުލާ" އެވެ.

"ޑާލިންސް" އަކީ އާލިއާގެ އަމިއްލަ ފިލްމު ކުންފުނިން ޕްރޮޑަކްޝަން ހައުސްއެއްގެ ކްރެޑިޓް ނަގާނެ ފުރަތަމަ ފިލްމެވެ.