ޓައިގާ ޝްރޮފްގެ "ހީރޯޕަންތީ 2" ގެ ފުރަތަމަ ޝޫޓިން ޝެޑިއުލް ނިންމާލައިފި

ދާދި ފަހުން ޝޫޓިން ފެށި ޓައިގާ ޝްރޮފްގެ ފިލްމު "ހީރޯޕަންތީ 2" ގެ ފުރަތަމަ ޝޫޓިން ޝެޑިއުލް ބުރާސްފަތި ދުވަހު ނިންމާލައިފި އެވެ.

ސާޖިދު ނަދިއަދުވާލާ ޕްރޮޑިއުސްކޮށް، އެހުމަދު ޚާން ޑައިރެކްޓްކުރާ ފިލްމުގެ ފުރަތަމަ ޝެޑިއުލް މުމްބާއީގައި ނިންމައިލީ ކޮވިޑް-19 އިން ރައްކާތެރިކަން ހޯދަން ވެސް ގިނަ ފިޔަވަޅުތަކެއް އަޅައިގެންނެވެ. "ހީރޯޕަންތީ 2" އަކީ ޓައިގާ 2014 ގައި ބޮލީވުޑަށް ނުކުތް ފިލްމު "ހީރޯޕަންތީ" ގެ ސީކްއެލް އެވެ.

އެ ފިލްމުގައި އޭނާއާ އެކު ބަތަލާގެ ރޯލު ކުޅުނީ ކްރިތީ ސެނަން ކަމަށް ވިޔަސް ދެވަނައިގެ ބަތަލާ އަކީ ތާރާ ސުތާރިއާ އެވެ. އޭނާ އަކީ ޓައިގާ ބަތަލުގެ ރޯލު ކުޅުނު 2019 ގެ "ސްޓޫޑަންޓް އޮފް ދި އިޔާ 2" އިން ތައާރަފުވި ބަތަލާއެކެވެ.

ޓައިގާގެ ވަރަށް ވަރުގަދަ އެކްޝަންތަކެއް ފެނިގެންދާނެ "ހީރޯޕަންތީ" އަކީ މި އަހަރުގެ ޑިސެމްބަރު 3 ގައި ސިނަމާތަކަށް ގެންނަން ތާވަލުކޮށްފައި އޮތް ފިލްމެކެވެ. ޓައިގާގެ އެންމެ ފަހުގެ ފިލްމަކީ މިދިޔަ އަހަރު ރިލީޒްކުރި "ބާގީ 3" އެވެ. އެ ފިލްމަކީ ވެސް އެހުމަދު ޑައިރެކްޓްކުރި ފިލްމެކެވެ.

"ބާގީ 2" ވެސް އޭނާ ޑައިރެކްޓްކުރި އިރު، ޓައިގާއާ އެކު "ބާގީ 4" ވެސް އެހުމަދު ގެނެސްދޭނެ އެވެ.

"ހީރޯޕަންތީ 2" ނިންމައިލުމަށް ފަހު، ޓައިގާ ޝޫޓިން ފަށަން އޮތް ފިލްމަކީ ވިކާސް ބާލް ދެ ބަޔަކަށް ގެނެސްދޭ "ގަންޕަތު" އެވެ. އެ ފިލްމުން ޓައިގާއާ އެކު ކްރިތީ ފެންނާނެ އެވެ.

ވިކާސް މި ވަގުތު އަންނަނީ އަމީތާބް ބައްޗަނާއި ރަޝްމިކާ މަންދަނާ ހިމަނައިގެން "ގުޑްބާއި" ކިޔާ ތުރިލާއެއް ހަދަމުންނެވެ.