ކާތިކް އާރިޔަނަށް ކްރިކެޓް ފިލްމެއް

ކްރިކެޓަށް ބިނާކޮށް ހަދާ ފިލްމުތަކާއި ކްރިކެޓް ތަރިންގެ ވާހަކަ ކިޔައިދޭ ފިލްމުތައް ހެދުމުގެ ފޯރި ގަދަ ބޮލީވުޑްގައި، ޒުވާން އެކްޓަރު ކާތިކް އާރިޔަން ވެސް ކްރިކެޓް ފިލްމަކަށް ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނެފައިވާ ގޮތުގައި މި ފިލްމަކީ ކްރިކެޓް ކުޅުންތެރިއެއްގެ ހިޔާލީ ވާހަކައެއް ކިޔައިދޭން ކަރަން ޖޯހަރްގެ ދަރުމާ ޕްރޮޑަކްޝަނުން ހަދާ ފިލްމެކެވެ. އަދި މީގެ ޑައިރެކްޓަރަކީ މިދިޔަ އަހަރު ދަރުމާ އިން ޖާންވީ ކަޕޫރާ އެކު ގެނެސްދިން ބައޮގްރަފިކަލް ޑްރާމާ "ގުންޖަން ސަކްސޭނާ: ދަ ކަރްގިލް ގާލް" ގެ ޑައިރެކްޓަރު ޝަރަން ޝަރުމާ ކަމަށް މީޑިއާތަކުން ބުންޏެވެ.

ބޮލީވުޑް ލައިފުން ބުނިގޮތުގައި ފިލްމާ ބެހޭ ގޮތުން މަޝްވަރާކުރަން ކާތިކް މިހާތަނަށް ޝަރަންއާ އެކު ގިނަ ބައްދަލުވުންތަކެއް ބާއްވާފައިވާ އިރު، ފިލްމަށް ވާން ޖެހޭ ތައްޔާރީތައް ވެސް ވަރަށް އަވަހަށް ފަށާނެ އެވެ. އަދި ފިލްމަށް އޭ-ލިސްޓް ބަތަލާއަކު ހަމަޖެއްސުމުގެ މަސައްކަތް ވެސް މިހާރު އަންނަނީ ކުރަމުންނެވެ.

މި ފިލްމު ވާނީ ކުރިއަރަމުން އަންނަ ކާތިކް ފިލްމެއްގައި ކްރިކެޓް ކުޅުންތެރިއެއްގެ ރޯލު ކުޅޭ ފުރަތަމަ ފަހަރަށެވެ.

އޭނާގެ އަތުގައި މިހާރު ވެސް ދަރުމާގެ އެހެން ފިލްމެއް އެބައޮތެވެ. އެއީ 2019 ގައި ޝޫޓިން ފަށައި ފަހުން ކޮވިޑާ ހެދި ހުއްޓުމަކަށް އައި ގޮތަށް މަސައްކަތް އަލުން ނުފެށި އޮތް ރޮމޭންޓިކް ކޮމެޑީ "ދޯސްތާނާ 2" އެވެ.

މީގެ މަހެއްހާ ދުވަސް ކުރިން ކޮވިޑް ޖެހިގެން މަސައްކަތްތަކާ ދުރުގައި ހުރުމަށް ފަހު، ކާތިކް ބަލިން ރަނގަޅުވެފައީވާތީ މިހާރު އަންނަނީ އަލުން "ބޫލް ބުލައްޔާ 2" ގެ ޝޫޓިން ފަށަން ތައްޔާރުވަމުންނެވެ. އެ ފިލްމުގެ މަސައްކަތް ހުއްޓުނީ ކާތިކަށް ކޮވިޑް ޖެހުމާ ގުޅިގެންނެވެ.

މި އަހަރުގެ ނޮވެމްބަރު 13 ގައި ރިލީޒްކުރަން ނިންމާފައިވާ "ބޫލް ބުލައްޔާ 2" ގެ ކާސްޓްގައި ކިއާރާ އަދުވާނީ އާއި ތައްބޫ ވެސް ހިމެނެ އެވެ.

ނެޓްފްލިކްސް އިން ގެނެސްދޭން ހަމަޖެހިފައިވާ ފިލްމު "ދަމާކާ" ގެ އެކްޓަރުގެ ކުރިއަށް ހުރި އިތުރު ފިލްމުތަކުގެ ތެރޭގައި "ފްރެޑީ" އާއި ތެލެގޫ ފިލްމެއްގެ ރިމޭކް ހިމެނެ އެވެ.

މި އަހަރުގެ ނޮވެމްބަރު 5 ގައި ރިލީޒްކުރާ ޝާހިދު ކަޕޫރްގެ "ޖާޒީ" އަކީ ވެސް ކްރިކެޓްގެ ވާހަކަ ކިޔައިދޭނެ ފިލްމެކެވެ.