ސިދާތު "ތަޅަމް" ގެ ރިމޭކް ދޫކޮށްލުމުން އަދިތިޔާ އަށް

ޑަބަލް ރޯލެއް ކުޅެން މިދިޔަ އަހަރުގެ ކުރީކޮޅު ސިދާތު މަލްއުތުރާ ސޮއިކުރި ފިލްމު "ތަޅަމް" ގެ ރިމޭކްގެ ސްކްރީންޕްލޭއާ މެދު ހިތްހަމަނުޖެހުންތަކެއް ހުރެގެން އޭނާ ފިލްމު ދޫކޮށްލުމުން، އޭގެ ބަތަލުގެ ރޯލު އަދިތިޔާ ރޯއި ކަޕޫރަށް ދީފި އެވެ.

"ތަޅަމް" އަކީ 2019 ގައި ރިލީޒްކުރި ތަމަޅަ ފިލްމެކެވެ. މީގެ ހިންދީ ރިމޭކް ސިދާތުއާ އެކު ހަދަން އިއުލާންކުރީ މިދިޔަ އަހަރުގެ މާޗް މަހުގެ ތެރޭގަ އެވެ. އޭރު ނިންމީ މެއި މަހުގެ ތެރޭގައި ޝޫޓިން ފަށައި އެ އަހަރުގެ ނޮވެމްބަރުގައި ފިލްމު ރިލީޒްކުރާ ގޮތަށެވެ.

ނަމަވެސް ކޮވިޑް-19 އާ ހެދި ފިލްމު ލަސްވެގެން ގޮސްފައި ވަނިކޮށް، ސިދާތު ފިލްމު ދޫކޮށްލީ އޭގެ ސްކްރީންޕްލޭގައި އޭނާ އަށް ގަޔާނުވެވޭ ކަންތައްތަކެއް ހުރުމާ ގުޅިގެންނެވެ. "ތަޅަމް" ގެ ރިމޭކް ހަދަނީ ޓީ ސީރީޒްގެ ބުޝަން ކުމާރާއި ޕްރޮޑިއުސަރު މުރާދު ކެތާނީ ގުޅިގެންނެވެ.

ބޮލީވުޑް ހަންގާމާ އިން ބުނީ އަދިތިޔާ އަށް ފިލްމު ހުށަހެޅުން އޭނާ އަށް ސްކްރިޕްޓް ކަމުގޮސްފައިވާތީ ވަގުތުން ފިލްމަށް އެއްބަސްވެފައިވެ އެވެ. އަދި އޭނާ ޝޫޓިން ފަށައި މިހާރު ނިމުމަކާ ހަމައަށް ގޮސްފައިވާ "އޯމް: ދަ ބެޓްލް ވިތިން" ނިންމައިލުމަށް ފަހު "ތަޅަމް" ގެ މަސައްކަތް ފަށާނެ އެވެ.

މި ފިލްމު ވާނީ އަދިތިޔާ ޑަބަލް ރޯލެއް ކުޅޭ ފުރަތަމަ ފަހަރަށެވެ. ފިލްމުގެ ބަތަލާއަކަށް ނަގާފައި ވަނީ މުރުނާލް ތާކޫރެވެ. އޭނާ އަކީ އަންނަ މަހުގެ 21 ގައި އެމެޒޯން ޕްރައިމް ވީޑިއޯ އިން ޕްރިމިއާކުރާ ފަރުހާން އަޚްތަރުގެ "ތޫފާން" ގެ ބަތަލާ އެވެ.

ސިދާތުގެ ކުރިއަށް ހުރި ފިލްމުތަކުގެ ތެރޭގައި "މިޝަން މަޖުނޫ" އާއި "ތޭންކް ގޯޑް" އަދި ޝޫޓިން ނިންމާފައި އޮތް "ޝޭރު ޝާހް" ހިމެނެ އެވެ.