އަޕޫރްވާއާ އެކު "އަނޫޕަމާ" ގެ ޕްރޮމޯއެއް

ސްޓާ ޕްލަސްގެ "އަނޫޕަމާ" ގެ ކާސްޓާ އަލަށް ގުޅުނު އެކްޓަރު އަޕޫރްވާ އަގްނިހޯތުރީއާއެކު ސިލްސިލާގެ ޕްރޮމޯއެއް ދައްކާލައިފި އެވެ.

އޭގައި ފެންނަނީ އަނޫޕަމާ (ރުޕާލީ ގަންގޫލީ) އާއި ފިރިމީހާ ވަންރާޖް ޝާހް (ސުދާޝްންޝޫ ޕާންޑޭ) އާ ދެމެދު ހިނގާ ޒުވާބުގަނޑަކަށް ފަހު، އަނޫޕަމާ ހޭނެތިގެން ވެއްޓުމުން ޑޮކްޓަރަކަށް ގެންގޮސްފައިވާ ތަނެވެ. ޑޮކްޓަރަކީ އަޕޫރްވާ އެވެ. އޭނާގެ ކެރެކްޓާގެ ނަމަކީ ޑރ. އަދުވައިތު ކަންނާ އެވެ.

ޕްރޮމޯ އިން ފެންނަ ގޮތުގައި އަނޫޕަމާ ބެލުމަށް ފަހު، ޑޮކްޓަރު ވަންރާޖަށް ދެނީ އަނޫޕަމާއާ ބެހޭ ގޮތުން ވަރަށް ހައިރާންކުރުވަނިވި ޚަބެރެކެވެ. އެއީ ކޮން ކަމެއްތޯ މިރެއިން ފެށިގެން ގެނެސްދޭ އެޕިސޯޑްތަކުން އެނގޭނެ އެވެ.

އިންޑިއާގެ އެންމެ މަގުބޫލު ސިލްސިލާގެ މަގާމުގައި އޮތް "އަނޫޕަމާ" އަކީ ސްޓާ ޕްލަސް އިން މިދިޔަ އަހަރުން ފެށިގެން ދައްކަމުން އަންނަ ސިލްސިލާއެކެވެ. މިއީ ބޭވަފާތެރި ފިރިއެއްގެ ސަބަބުން އާއިލާއަކަށް ކުރިމަތިވާ ކަންތައްތަކެއް ދައްކުވައިދޭ ސީރީސްތަކެކެވެ.

"އަނޫޕަމާ" ގެނެސްދެނީ ކޮންމެ ހަފުތާއެއްގެ ހޯމަ އިން ހޮނިހިރު ދުވަހުގެ ރެއާ ހަމައަށް ރާއްޖެ ގަޑިން 9:30 ގަ އެވެ. ސިލްސިލާގެ ކާސްޓާ މިހާރު އަޕޫރްވާ ގުޅިފައި ވާތީ، ކުރިއަށް ހުރި އެޕިސޯޑްތަކުން އަނެއްކާ ވެސް ޝައުގުވެރި ގިނަ ޓްވިސްޓްތަކެއް ފެންނާނެ ކަމަށް ބެލެވެ އެވެ.