އަމީތާބް ބައްޗަންގެ "ކޭބީސީ 13" ފަށަނީ

ބޮލީވުޑްގެ އެކްޓަރު އަމީތާބް ބައްޗަންއާ އެކު ސޮނީ ޓީވީން ގެނެސްދޭ ކޯން ބަނޭގާ ކަރޯޑްޕަތީ (ކޭބީސީ) ގެ 13 ވަނަ ސީޒަން ގެނެސްދޭން ތައްޔާރުވާން ފަށައިފި އެވެ.

ޝޯގައި ބައިވެރިވާން ބޭނުންވާ މީހުންނަށް މި މަހުގެ 10 އިން ފެށިގެން ރެޖިސްޓްރޭޝަނަށް ހުޅުވާލަން ނިންމައި މިހާރު ވަނީ އޭގެ ޕްރޮމޯ ވެސް ދައްކަން ފަށައިފަ އެވެ. "ކޭބީސީ" އަކީ ސުވާލާއި ޖަވާބު ޝޯއެކެވެ. މި ޝޯގައި ކުރެވޭ ސުވާލުތަކަށް ޖަވާބުދީގެން ކަރޯޑްޕަތީއަކަށް ނުވަތަ މިލިއަނަކަށްވުމުގެ ފުރުސަތު ލިބެ އެވެ. އެގޮތުން ކުރާ ކޮންމެ ސުވާލެއްގެ ރަނގަޅު ޖަވާބަކަށް ފައިސާގެ ބޮޑު އިނާމެއް ލިބެ އެވެ. އަދި ޝޯ އިން ހާސިލުކުރެވޭ އެންމެ ބޮޑު އަދަދަކީ 7 ކްރޯޑް ރުޕީސް (946,553 ޑޮލަރު) އެވެ.

"ކޭބީސީ" ގެ އެންމެ ބޮޑު މަގުސަދަކީ އިންޑިއާ މީހުންގެ އާންމު މައުލޫމާތު މުއްސަނދިކޮށް ދިނުމާ އެކު، ދިރިއުޅުމުގެ ހާލަތު ވެސް ޝޯގެ ތެރެއިން ލިބޭ ފައިސާ އިން ރަނގަޅުކޮށް ދިނުމެވެ. މި ޝޯގެ ތެރޭގައި ހިލޭ ސާބަހަށް މަސައްކަތްކުރާ އިޖުތިމާއީ އެކިއެކި މަސައްކަތްކުރާ ޖަމިއްޔާތަކަށް ވެސް ފައިސާ ހޯދުމުގެ ފުރުސަތު ދެ އެވެ.

"ކޭބީސީ" ގެ 12 ވަނަ ސީޒަން ގެނެސްދިނީ މިދިޔަ އަހަރު އެވެ.

މި ޝޯ އަކީ އިނގިރޭސިވިލާތުގެ މަޝްހޫރު ޝޯ "ހޫ ވޯންޓްސް ޓު ބީ އަ މިލިއަނާ؟" ގެ އިންޑިއާ ވާޝަނެވެ. ސޮނީން "ކޭބީސީ" ގެނެސްދެނީ 2010 ވަނަ އަހަރުން ފެށިގެންނެވެ.

އެކަމަކު މި ޝޯގެ ފެށުން އައިސްފައި ވަނީ ސްޓާ ޕްލަސް އިން 2000 ވަނަ އަހަރު އެވެ. އެގޮތުން 2007 އާ ހަމައަށް "ކޭބީސީ" ގެނެސްދިނީ އެ ޗެނެލުންނެވެ.

ޝޯގެ ތިން ވަނަ ސީޒަން ފިޔަވައި އެހެން ހުރިހާ ސީޒަނެއްގެ ހޯސްޓަކީ އަމީތާބެވެ. ތިން ވަނަ ސީޒަން ހޯސްޓްކުރީ ޝާހްރުކް ޚާނެވެ.