ތަމަޅަ ޑައިރެކްޓަރު އެޓްލީގެ ފިލްމުގައި ޝާހްރުކާ އެކީ ދެކުނުގެ ބަތަލާއެއް

އިންޑިއާގެ ތަމަޅަ ޑައިރެކްޓަރު އެޓްލީއާ އެކު ޝާހްރުކް ޚާން ކުޅެން ހަމަޖެހިފައިވާ ފިލްމުގެ ބަތަލާއަކަށް ދެކުނު ފިލްމު އިންޑަސްޓްރީގެ ބަތަލާ ނަޔަންތަރާ ގެންނަން ނިންމާފައިވާ ކަމަށް ރިޕޯޓްތައް ބުނެފި އެވެ.

ދެކުނުގެ އެންމެ މަޝްހޫރު މަޝްހޫރު ބަތަލާއިންގެ ތެރޭގައި ހިމެނޭ ނަޔަންތަރާ އަކީ ތަމަޅަ ފިލްމުގެ އިތުރުން ތެލެގޫ އަދި މަލަޔާޅަމް ފިލްމު ވެސް ކުޅޭ ބަތަލާއެކެވެ. ފިލްމީ ޚަބަރުތައް ގެނެސްދޭ ނޫސްތަކުން ބުނެފައިވާ ގޮތުގައި އެޓްލީގެ ފުރަތަމަ ހޮވުމަކީ ޝާހްރުކްގެ ފިލްމަށް ނަޔަތަންތަރާ، 36، ކަމަށްވާތީ އޭނާއާ އެކު މިހާރު އަންނަނީ މަޝްވަރާކުރަމުންނެވެ.

ފިލްމެއް ކުޅެން ޝާހްރުކާ އެކީ ފުރުސަތެއް ލިބުމަކީ އިންޑިއާގެ ވަރަށް ގިނަ ބަތަލާއިން އަބަދު ވެސް ދެކޭ ހުވަފެނަކަަށްވާތީ އެޓްލީގެ ފަރާތުން ލިބުނު ފުރުސަތު ނަޔަންތަރާ ދޫކޮށްލާނެ ކަމަކަށް ނުބެލެވެ އެވެ.

މީގެ ކުރިން ވެސް ޝާހްރުކް ދެކުނުގެ ބަތަލާއާ އެކު މަސައްކަތްކޮށްފައިވެ އެވެ. އެއީ 2013 ގެ "ޗެންނައި އެކްސްޕްރެސް" ގަ އެވެ. ދީޕިކާ ޕަދްކޯން ބަތަލާގެ ރޯލު ކުޅުނު ޑައިރެކްޓަރު ރޯހިތު ޝެޓީގެ އެ ފިލްމުގެ ހާއްސަ ލަވަ "ވަން ޓޫ ފޯ ތުރީ" ގައި ޝާހްރުކާ އެކީ މަސައްކަތްކުރީ ދެކުނުގެ ބަތަލާ ޕްރިޔަމަނީ އެވެ.

އެޓްލީގެ ފިލްމުގެ ވާހަކަ 2019 އިން ފެށިގެން ދެކެވެމުން ދިޔަ ނަމަވެސް ރަސްމީކޮށް މިހާތަނަށް ފިލްމާ ބެހޭ އެއްވެސް ވާހަކައެއް ހާމަކޮށްފައެއް ނުވެ އެވެ.

ނަމަވެސް ރިޕޯޓްތައް ބުނާ ގޮތުން އަންނަ އަހަރުގެ ތެރޭގައި ޝޫޓިން ފަށާ ފިލްމުގައި ޝާހްރުކް ކުޅޭނީ ޑަބަލް ރޯލެކެވެ. އަދި އޭނާ ވަނީ ފިލްމުގެ ސްކްރިޕްޓަށް ވެސް މިހާރު ރުހުން ދީފަ އެވެ