އިންޑިއާގެ ކުރީގެ މަޝްހޫރު ފިލްމީ ތަރި ދިލިޕް ކުމާރު މިއަދު މަރުވެއްޖެ އެވެ.
ފާއިތުވި މަހެއްހާ ދުވަހު، ހާލު ގޯސްވެގެން ތިން ފަހަރެއްގެ މަތިން ހޮސްޕިޓަލްގައި އެޑްމިޓްކޮށް ފަރުވާ ދެނިކޮށް އުމުރުން 98 އަހަރުގެ އެކްޓަރު މިއަދުގެ ވަރަށް ހެނދުނުގެ ވަގުތެއްގައި މަރުވީ މުމްބާއީގެ މުމްބާއީ ހިންދޫޖާ ހޮސްޕިޓަލްގަ އެވެ.
ދިލިޕް މަރުވި ވާހަކަ އާއިލާ އިން ޓްވީޓްކުރުމާ އެކު އިންޑިއާގެ ބޮޑުވަޒީރު ނަރެންދުރަ މޯދީ ވެސް ހިތާމަފާޅުކޮށް އާއިލާ އަށް ތައުޒިޔާ ކިޔާފައިވެ އެވެ. އަދި އިންޑިއާގެ ފިލްމީ ދާއިރާގެ އެތައް ބަޔަކާއި އާންމުން އަންނަނީ ދިލިޕްގެ މަރާ ގުޅިގެން ސޯޝަލް މީޑިއާގައި ހިތާމަ ފާޅުކުރަމުންނެވެ.
ދިިލިޕަކީ ކުރީގެ މަޝްހޫރު ބަތަލާ ސާއިރާ ބާނޫ، 76، ގެ ފިރިމީހާ އެވެ. ދެމަފިރިންނަށް ދަރިޔަކު ލިބިފައެއް ނުވެ އެވެ.
ދިލިޕަކީ ހިންދީ ސިނަމާގެ ރަންޒަމާނުގެ އެންމެ ކާމިޔާބު އެއް އެކްޓަރެވެ. އޭނާގެ ކެރިއަރުގައި ރީތި، މޮޅު އެތައް ފިލްމެއް ކުޅެފައިވެ އެވެ. އޭގެ ތެރެއިން ވެސް އެންމެ ފާހަގަކޮށްލެވެނީ ހިންދީ ސިނަމާގެ އެންމެ އައިކޮނިކް އެއް ފިލްމު ކަމަށްވާ 1960 ގެ "މުގްލޭ އާޒަމް" އެވެ.
އެ ފިލްމުގެ އިތުރުން ދިލިޕްގެ ފާހަގަކޮށްލެވޭ އިތުރު ފިލްމުތަކުގެ ތެރޭގައި "ނަޔާ ދައުރު"، "ޖުގްނޫ"، "ދާގް"، "އާޒާދު"، "އަންދާޒް" "އަދި "ރާމް އޯރް ޝާމް" ފަދަ އެތައް ފިލްމެއް ހިމެނެ އެވެ.
ދިޕިލް އެންމެ ފަހުން ފެނުނު ފިލްމަކީ 1998 ގެ "ގިލާ" އެވެ.
